ಆಗ್ರಾ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಭೇಟಿ ಹಿನ್ನೆಲೆಯಲ್ಲಿ ಅಹಮದಾಬಾದ್ನಲ್ಲಿನ ಸ್ಲಮ್ಗಳಿಗೆ ಗೋಡೆ ನಿರ್ಮಿಸಿದ್ದು ಭಾರಿ ಸುದ್ದಿಯಾಗಿತ್ತು. ಇದೀಗ ಮತ್ತೊಂದು ಯೋಜನೆಯನ್ನು ಭಾರತ ಸರ್ಕಾರ ಪೂರ್ಣಗೊಳಿಸಿರುವುದು ಬೆಳಕಿಗೆ ಬಂದಿದೆ. ಅದೇನೆಂದರೆ, ಬಹು ವರ್ಷಗಳ ಬಳಿಕ ತಾಜ್ ಮಹಲಿನಲ್ಲಿನ ಎರಡು ಗೋರಿಗಳನ್ನು ಟ್ರಂಪ್ ಭೇಟಿಗಾಗಿ ಶುಚಿಗೊಳಿಸಲಾಗಿದೆ.
ಅಹಮದಬಾದ್ನಲ್ಲಿನ ನಮಸ್ತೆ ಟ್ರಂಪ್ ಕಾರ್ಯಕ್ರಮ ಮುಗಿಸಿ ಅಧ್ಯಕ್ಷ ಟ್ರಂಪ್ ಕುಟುಂಬ ಸಮೇತ ನೇರವಾಗಿ ತಾಜ್ ಮಹಲ್ ವೀಕ್ಷಣೆಗೆ ತೆರಳಿದರು. ಹೀಗಾಗಿ ಟ್ರಂಪ್ ಆಗಮನಕ್ಕೂ ಮುನ್ನ ತಾಜ್ ಮಹಲ್ ಸುತ್ತಲೂ ಸ್ವಚ್ಛಗೊಳಿಸಲಾಗಿತ್ತು. ವಿಶೇಷವೆಂದರೆ ತಾಜ್ ಮಹಲಿನೊಳಗಿರುವ ಒಂದೇ ರೀತಿಯ ಎರಡು ಗೋರಿಗಳನ್ನು ಸುಮಾರು 300 ವರ್ಷಗಳ ಬಳಿಕ ಶುಚಿಗೊಳಿಸಲಾಗಿದೆ. ಗೋರಿಗಳಲ್ಲಿ ಉಂಟಾಗಿದ್ದ ರಂಧ್ರಗಳಿಗೆ ಜೇಡಿ ಮಣ್ಣನ್ನು ಪ್ಯಾಕ್ ಮಾಡಿ ಮರು ಜೀವವನ್ನು ನೀಡಲಾಗಿದೆ.
ಭಾರತೀಯ ಮಹಿಳೆಯು ಸುಂದರವಾಗಿ ಕಾಣಲು ಮುಖಕ್ಕೆ ಹಾಕುವ ಫೇಸ್ಪ್ಯಾಕ್ನಿಂದ ಈ ಜೇಡಿ ಮಣ್ಣಿನ ಪ್ಯಾಕ್ ಯೋಜನೆ ಸ್ಫೂರ್ತಿ ಪಡೆದುಕೊಂಡಿದೆ. ಈ ಹಿಂದೆ ಅರಿಶಿನ ನೀರಿನ ಮೂಲಕ ತೊಳೆಯಲಾಗುತ್ತಿತ್ತು ಎಂದು ತಿಳಿದುಬಂದಿದೆ. ತಾಜ್ ಮಹಲ್ಗೆ ಈವರೆಗೂ ಐದು ಬಾರಿ ಜೇಡಿ ಮಣ್ಣಿನ ಪ್ಯಾಕ್ ಮಾಡಲಾಗಿದೆ. ಆದರೆ, ಅದರ ಒಳಗಿರುವ ಗೋರಿಗಳಿಗೆ ಒಮ್ಮೆಯೂ ಪ್ಯಾಕ್ ಮಾಡಿರಲಿಲ್ಲ. ಆ ಗೋರಿಗಳು ಮೊಘಲ್ ರಾಜ ಶಹಜಹಾನ್ ಮತ್ತು ಆತನ ಪತ್ನಿ ಮುಮ್ತಾಜ್ರದ್ದಾಗಿದೆ.
ನಮಸ್ತೆ ಟ್ರಂಪ್ ಕಾರ್ಯಕ್ರಮ ಹಿನ್ನೆಲೆಯಲ್ಲಿ ಟ್ರಂಪ್ ಕುಟುಂಬ ಸಮೇತ ತಾಜ್ ಮಹಲ್ಗೆ ಇಂದು ಭೇಟಿ ನೀಡಿದ್ದರು. ಆದರೆ, ಗೋರಿಗಳ ಬಳಿ ತೆರಳಲು ಇರುವ ಪ್ರವೇಶ ದ್ವಾರ ಕೇವಲ 5 ಅಡಿ ಇದ್ದುದ್ದರಿಂದ ಗೋರಿಗಳನ್ನು ನೋಡಲು ಸಾಧ್ಯವಾಗಲಿಲ್ಲ. ಈ ಮೊದಲೇ ಟ್ರಂಪ್ ಭದ್ರತಾ ತಂಡ ಭೇಟಿ ನೀಡಿ ಪರಿಶೀಲನೆ ನಡೆಸಿತ್ತು. 17ನೇ ಶತಮಾನದ ಗೋರಿಗಳನ್ನು ನೋಡಲು ಟ್ರಂಪ್ ಅವರಿಗೆ ಬಾಗುವುದಕ್ಕೆ ಸಾಧ್ಯವಾಗುವುದಿಲ್ಲ ಎಂದು ತಿಳಿಸಿದ್ದರು.
ಗೋರಿಗಳನ್ನು ನೋಡಲು ವರ್ಷಕ್ಕೆ ಮೂರು ಬಾರಿ ಮಾತ್ರ ಸಾರ್ವಜನಿಕರಿಗೆ ತೆರೆದಿರುತ್ತದೆ. ಮೊಘಲ್ ರಾಜ್ಯ ಶಹಜಹಾನ್ ಮರಣ ವಾರ್ಷಿಕೋತ್ಸವ ಸಂದರ್ಭದಲ್ಲಿ ಮಾತ್ರ ತೆರೆದಿರುತ್ತದೆ. (ಏಜೆನ್ಸೀಸ್)