ನವದೆಹಲಿ: ದೆಹಲಿಯಿಂದ ಇತ್ತೀಚೆಗೆ ಆಸ್ಟ್ರೇಲಿಯಾಕ್ಕೆ ಹೊರಟ ಬಣ್ಣಬಣ್ಣದ ಲೆಹೆಂಗಾಗಳ ಸರಕನ್ನು ಕಸ್ಟಮ್ ಅಧಿಕಾರಿಗಳು ತಡೆ ಹಿಡಿದಿದ್ದಾರೆ. ಕಾರಣ ಕೇಳಿದರೆ ಬೆಚ್ಚು ಬೀಳುತ್ತೀರಿ…. ಬಣಬಣ್ಣದ ಕಸೂತಿ ಕಲೆಯುಳ್ಳ ಈ ಲೆಹೆಂಗಾಗಳ ಮೇಲಿದ್ದ ಕಸುಬುಗಾರಿಕೆಯಲ್ಲಿ ಡ್ರಗ್ಸ್ ಅಡಗಿತ್ತು! ಹೌದು, ಬಟ್ಟೆಯನ್ನು ರಫ್ತು ಮಾಡುವ ಸೋಗಿನಲ್ಲಿ ಎಂಡಿಎಂಎ ಡ್ರಗ್ಸ್ನ ಬೃಹತ್ ಕಂಸೈನ್ಮೆಂಟ್ ಒಂದು ರವಾನೆಯಾಗಲು ಸಿದ್ಧವಾಗಿತ್ತು.
ಬೇಹುಗಾರರ ಸುಳಿವಿನ ಮೇರೆಗೆ ದೆಹಲಿಯ ಫಾರಿನ್ ಪೋಸ್ಟ್ ಆಫೀಸಿ(ಎಫ್ಪಿಒ)ನಲ್ಲಿ ಆಸ್ಟ್ರೇಲಿಯಾಕ್ಕೆ ಕಳುಹಿಸಲಾಗುತ್ತಿದ್ದ ಕನ್ಸೈನ್ಮೆಂಟ್ ಒಂದನ್ನು ಕಸ್ಟಮ್ಸ್ ಅಧಿಕಾರಿಗಳು ತೆರೆದು ನೋಡಿದರು. ಅದರಲ್ಲಿ ಬಣ್ಣಬಣ್ಣದ ಕಲಾಗಾರಿಕೆ ಹೊಂದಿದ್ದ ಭಾರತದ ಪಾರಂಪರಿಕ ಮಹಿಳಾ ಉಡುಗೆಗಳಾದ ಲೆಹೆಂಗಾಗಳು ಇದ್ದವು. ಸೂಕ್ಷ್ಮವಾಗಿ ಗಮನಿಸಿದಾಗ ಆ ಲೆಹೆಂಗಾಗಳ ಆಕರ್ಷಕ ಲೇಸ್ಗಳ ನಡುವೆ ಎಂಡಿಎಂಎ ಎಂಬ ಸಿಂಥೆಟಿಕ್ ಡ್ರಗ್ಅನ್ನು ಬಚ್ಚಿಟ್ಟಿರುವುದು ಬೆಳಕಿಗೆ ಬಂತು.
ಇದನ್ನೂ ಓದಿ: ಲಿಕ್ಕರ್ ಮಾಫಿಯಾ ಮಟ್ಟಹಾಕಲು ಹೋದ ಪೇದೆಯ ಹತ್ಯೆ, ಎಸ್ಐ ಸ್ಥಿತಿ ಗಂಭೀರ: ಸಿಎಂ ಯೋಗಿ ಖಡಕ್ ಆದೇಶ
ಎಕ್ಸ್ಟೆಸಿ ಎಂದೇ ಜನಪ್ರಿಯವಾದ ಎಂಡಿಎಂಎ, ಮೆದುಳನ್ನು ಉತ್ತೇಜಿತಗೊಳಿಸುವುದರೊಂದಿಗೆ ಭ್ರಮೆ ಉಂಟುಮಾಡುತ್ತದೆ. ಇದನ್ನು ಸೇವಿಸುವುದರಿಂದ ಲಿವರ್, ಕಿಡ್ನಿ ಮತ್ತು ಹಾರ್ಟ್ ಫೇಲ್ಯೂರ್ ಇಲ್ಲವೇ ಸಾವು ಕೂಡ ಸಂಭವಿಸಬಹುದು.
ಈ ಲೆಹೆಂಗಾಗಳಿಂದ ಒಟ್ಟು 3,900 ಗ್ರಾಂ ಎಂಡಿಎಂಎ ಡ್ರಗ್ಸ್ ವಶಪಡಿಸಿಕೊಳ್ಳಲಾಗಿದೆ. ಈ ಡ್ರಗ್ಸ್ನ ಮಾರಾಟ ಬೆಲೆಯು 1.7 ಕೋಟಿ ರೂಪಾಯಿಗಳೆಂದು ಅಂದಾಜಿಸಲಾಗಿದೆ. ಮತ್ತೊಂದು ಪತ್ತೆ ಕಾರ್ಯದಲ್ಲಿ, ದೆಹಲಿ ಕಸ್ಟಮ್ಸ್ ಅಧಿಕಾರಿಗಳು 60 ಲಕ್ಷ ಇಂಪೋರ್ಟೆಡ್ ಸಿಗರೇಟು ಸ್ಟಿಕ್ಗಳನ್ನು ವಶಪಡಿಸಿಕೊಂಡಿದ್ದಾರೆ. ಅವುಗಳ ಮೌಲ್ಯ 6 ಕೋಟಿ ರೂಪಾಯಿ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.(ಏಜೆನ್ಸೀಸ್)
ಸಾವಿಗೂ ಮುನ್ನ ಕೈ ಬೆಸೆದ ವೃದ್ಧ ದಂಪತಿ: ಮನಕಲಕುವ ಫೋಟೋ ನೋಡಿ ನೆಟ್ಟಿಗರಿಂದ ಕರೊನಾಗೆ ಹಿಡಿ ಶಾಪ!
ಚಾಲನಾ ಪರವಾನಗಿ ಆನ್ಲೈನ್ ನವೀಕರಣಕ್ಕೆ ಆಧಾರ್