ಸ್ಯಾನ್ ಫ್ರಾನ್ಸಿಸ್ಕೊ: ಕೆಲವು ದಿನಗಳಿಂದ ಬಹಳೆಡೆ ಕರೊನಾ ಲಸಿಕೆಯದ್ದೇ ಮಾತು. ನಾನಾ ಕಂಪನಿಗಳು ಸಂಶೋಧಿಸಿ ಪ್ರಯೋಗ ನಡೆಸುತ್ತಿರುವ ಲಸಿಕೆಗಳ ಬಗ್ಗೆಯೇ ಹಲವೆಡೆ ಸುದ್ದಿ. ಈಗಾಗಲೇ ಕೆಲ ಕಂಪನಿಗಳು ಪ್ರಾಯೋಗಿಕವಾಗಿ ಲಸಿಕೆ ನೀಡಲಾರಂಭಿಸಿದ್ದು, ಅದರ ಪರಿಣಾಮ-ಫಲಿತಾಂಶಗಳ ಬಗ್ಗೆ ಕುತೂಹಲ ಮೂಡಿದೆ. ಈ ನಡುವೆ ಲಸಿಕೆ ಎಲ್ಲೆಲ್ಲಿ ಸಿಗಲಿದೆ ಎಂಬ ಕುರಿತೂ ಕೌತುಕ ಉಂಟಾಗಿದೆ.
ಲಸಿಕೆ ಎಲ್ಲಿ ಸಿಗುತ್ತೆ ಎಂಬುದಕ್ಕೆ ಉತ್ತರ ಅಂಗೈಯಲ್ಲೇ ಸಿಗಲಿದೆ. ಅರ್ಥಾತ್ ಮೊಬೈಲ್ ಫೋನ್ ಮೂಲಕ ಗೂಗಲ್ನಲ್ಲಿ ಸರ್ಚ್ ಮಾಡಿದರೆ ಅದು ಲಸಿಕೆ ಸಿಗುವ ಸ್ಥಳವನ್ನು ತೋರಿಸುವ ಜತೆಗೆ ಅಲ್ಲಿಗೆ ತೆರಳುವ ದಾರಿಯನ್ನೂ ತೋರಿಸಲಿದೆ. ಇಂಥದ್ದೊಂದು ವ್ಯವಸ್ಥೆಯನ್ನು ಗೂಗಲ್ ಸಂಸ್ಥೆ ಅಳವಡಿಸಿದೆ.
ಗೂಗಲ್ ಸಂಸ್ಥೆ ಲಂಡನ್ನಲ್ಲಿ ಈಗಾಗಲೇ ಈ ವ್ಯವಸ್ಥೆಯನ್ನು ಕಲ್ಪಿಸಿದೆ. ಇತರ ಆರೋಗ್ಯ ಪ್ರಾಧಿಕಾರಗಳು ಲಸಿಕೆಗಳನ್ನು ಅನುಮೋದಿಸುತ್ತಿದ್ದಂತೆ ಬೇರೆ ದೇಶದಗಳಲ್ಲೂ ಈ ವ್ಯಾಕ್ಸಿನ್ ಸರ್ಚ್ ಆಪ್ಷನ್ಗಳನ್ನು ಕಲ್ಪಿಸಲಾಗುವುದು ಎಂದು ಗೂಗಲ್ ಸಂಸ್ಥೆ ಹೇಳಿದೆ.
ಮಾರ್ಚ್ನಲ್ಲಿ ಕೋವಿಡ್-19 ಕುರಿತ ಮಾಹಿತಿಗಾಗಿ ಯೂಟ್ಯೂಬ್ನಲ್ಲಿ ಇನ್ಫಾರ್ಮೇಷನ್ ಪ್ಯಾನೆಲ್ಗಳನ್ನು ಒದಗಿಸಲಾಗಿತ್ತು. ಅದು 400 ಶತಲಕ್ಷ ವೀಕ್ಷಣೆ ಕಂಡಿತ್ತು. ಅದನ್ನೇ ಅಪ್ಡೇಟ್ ಮಾಡಿ ಇದೀಗ ಕರೊನಾ ಲಸಿಕೆ ಲಭ್ಯತೆಯ ಮಾಹಿತಿ ಒದಗಿಸುವ ವ್ಯವಸ್ಥೆ ಮಾಡಲಾಗಿದೆ ಎಂದು ಗೂಗಲ್ ಕಂಪನಿ ತಿಳಿಸಿದೆ. (ಏಜೆನ್ಸೀಸ್)
ರವಿ ಬಸ್ರೂರ್@ವರ್ಕ್ ಫ್ರಮ್ ವಿಲೇಜ್: ಊರಲ್ಲಿ ಸದ್ದಿಲ್ಲದೆ ಏನ್ ಮಾಡಿದ್ದಾರೆ ನೋಡಿ!!!