ಜಗತ್ತಿಗೆ ಎದುರಾಗಿರುವ ಅಗೋಚರ ಶತ್ರು ಕರೊನಾ ವೈರಸ್ ವಿರುದ್ಧ ಹೋರಾಟದಲ್ಲಿ ಮುಂಚೂಣಿಯಲ್ಲಿ ನಿಂತವರು ವೈದ್ಯರು, ನರ್ಸ್ಗಳು ಸೇರಿ ಮತ್ತಿತರ ಆರೋಗ್ಯ ಸಿಬ್ಬಂದಿ.
ತಮ್ಮನ್ನು ತಾವು ಕರೊನಾ ಸೋಂಕಿನ ಅಪಾಯಕ್ಕೆ ಒಡ್ಡಿಕೊಂಡು ವೈರಸ್ ಪೀಡಿತರಿಗೆ ಚಿಕಿತ್ಸೆ ನೀಡುತ್ತಿದ್ದಾರೆ. ಪರರ ರಕ್ಷಣೆಗಾಗಿ ಟೊಂಕಕಟ್ಟಿ ನಿಂತಿದ್ದಾರೆ.
ಜಗತ್ತಿನಾದ್ಯಂತ ಕರೊನಾ ವೈರಸ್ ವಿರುದ್ಧ ಹೋರಾಡುತ್ತಿರುವ ವೈದ್ಯಕೀಯ ಸಿಬ್ಬಂದಿಗೆ ಕೃತಜ್ಞತೆ ಸಲ್ಲಿಸುವ ದೃಷ್ಟಿಯಿಂದ, ಅವರಿಗೊಂದು ಥ್ಯಾಂಕ್ಸ್ ಹೇಳುವ ಸಲುವಾಗಿ ಚಪ್ಪಾಳೆ ಅಭಿಯಾನ ಪ್ರಾರಂಭವಾಗಿದೆ.
ಭಾರತ ಸೇರಿ ಹಲವು ರಾಷ್ಟ್ರಗಳ ಜನರು ತಮ್ಮ ಮನೆಯಲ್ಲೇ ನಿಂತು ಚಪ್ಪಾಳೆ ಹೊಡೆಯುವ ಮೂಲಕ ವೈದ್ಯಕೀಯ ಸಿಬ್ಬಂದಿ, ಪೊಲೀಸರು, ಪೌರಕಾರ್ಮಿಕರಂತಹ ಕರೊನಾ ವಾರಿಯರ್ಸ್ಗೆ ಕೃತಜ್ಞತೆ ಸಲ್ಲಿಸಿದ್ದಾರೆ.
ಭಾರತದಲ್ಲೂ ಕೂಡ ಮಾ.22ರಂದು ಜನತಾ ಕರ್ಫ್ಯೂ ಘೋಷಣೆ ಮಾಡಿದ್ದ ಪ್ರಧಾನಿ ಮೋದಿಯವರು, ಅಂದು ಸಂಜೆ 5ಗಂಟೆಗೆ ಎಲ್ಲರೂ ತಮ್ಮ ಮನೆಯ ಬಾಲ್ಕನಿ, ಟೆರೇಸ್ಗೆ ಬಂದು 5 ನಿಮಿಷ ಚಪ್ಪಾಳೆ ತಟ್ಟುವ ಮೂಲಕ ಕರೊನಾ ವಾರಿಯರ್ಸ್ಗೆ ಕೃತಜ್ಞತೆ ಸಲ್ಲಿಸಿ ಎಂದು ಮನವಿ ಮಾಡಿದ್ದರು. ಅದಕ್ಕೆ ಅಭೂತಪೂರ್ವ ಸ್ಪಂದನೆಯೂ ಸಿಕ್ಕಿತ್ತು.
ಈಗ ಈ ಚಪ್ಪಾಳೆ ವಿಚಾರವಾಗಿ ಗೂಗಲ್ ಒಂದು ಆಸಕ್ತಿದಾಯಕ ವಿಚಾರವನ್ನು ತಿಳಿಸಿದೆ.
Clapping (ಚಪ್ಪಾಳೆ) ಎಂಬ ಶಬ್ದ ಈ ಬಾರಿ ಗೂಗಲ್ನಲ್ಲಿ ಅತಿ ಹೆಚ್ಚು ಸರ್ಚ್ ಆಗಿದೆಯಂತೆ. ಈ ವರ್ಷ ಇಲ್ಲಿಯವರೆಗೆ ಜಗತ್ತಿನಾದ್ಯಂತ ಚಪ್ಪಾಳೆ ಎಂಬ ಶಬ್ದದ ಹುಡುಕಾಟ ಗರಿಷ್ಠ ಮಟ್ಟದ ದಾಖಲೆ ಬರೆದಿದೆ ಎಂಬ ವಿಚಾರವನ್ನು ಗೂಗಲ್ ತನ್ನ ಇನ್ಸ್ಟಾಗ್ರಾಂ ಸ್ಟೋರಿಯಲ್ಲಿ ಹೇಳಿಕೊಂಡಿದೆ. ಅಷ್ಟೇ ಅಲ್ಲ, ಈ ಶಬ್ದ ಅತಿ ಹೆಚ್ಚು ಹುಡುಕಲ್ಪಟ್ಟಿದ್ದು ಯುಕೆಯಲ್ಲಿ. ಭಾರತ ಮೂರನೇ ಸ್ಥಾನದಲ್ಲಿದ್ದು, ಸಿಂಗಪುರ ಎರಡನೇ ಸ್ಥಾನದಲ್ಲಿದೆ. ಐರ್ಲೆಂಡ್ ಮೂರನೇ ಹಾಗೂ ಯುಎಇಗಳು ನಾಲ್ಕನೇ ಸ್ಥಾನದಲ್ಲಿವೆ.
Clapping ಎಂಬ ಶಬ್ದವನ್ನಿಟ್ಟುಕೊಂಡು ವಿವಿಧ ದೇಶಗಳು ಗೂಗಲ್ ಬಳಿ ಹಲವು ಪ್ರಶ್ನೆಗಳನ್ನು ಕೇಳಿವೆ. 5 PM Clapping ಎಂದು ಭಾರತದಲ್ಲಿ ಅತಿ ಹೆಚ್ಚು ಬಾರಿ ಸರ್ಚ್ ಆದರೆ, ಕೆನಡಾದಲ್ಲಿ 7pm Clapping ಎಂದು ಹುಡುಕಿದ್ದಾರೆ. ಹೀಗೆ ಯಾವಾಗ ಚಪ್ಪಾಳೆ ತಟ್ಟಬೇಕು ( When To Clap) ಎಂದು ಕೂಡ ಅನೇಕ ಜನರು ಗೂಗಲ್ ಬಳಿ ಪ್ರಶ್ನೆ ಮಾಡಿದ್ದಾರೆ. ಇವೆಲ್ಲವುಗಳಲ್ಲಿ Why are People Clapping( ಜನರು ಯಾಕೆ ಚಪ್ಪಾಳೆ ತಟ್ಟಬೇಕು?) ಎಂಬ ಪ್ರಶ್ನೆ ಟಾಪ್ ಟ್ರೆಂಡಿಂಗ್ನಲ್ಲಿದೆ.
ಗೂಗಲ್ ಕೂಡ ಆರೋಗ್ಯ ಸಿಬ್ಬಂದಿಗೆ ಡೂಡಲ್ ಮೂಲಕ ವಿವಿಧ ರೀತಿಯಲ್ಲಿ ಧನ್ಯವಾದ ತಿಳಿಸುತ್ತಿದೆ. ಹಾಗೇ ಇನ್ಸ್ಟಾಗ್ರಾಂ ಸ್ಟೋರಿಗಳಲ್ಲೂ ಕೆಲವು ಭಾವನಾತ್ಮಕ ಫೋಟೋಗಳನ್ನು ಹಾಕಿ ಜನರಲ್ಲೂ ಅರಿವು ಮೂಡಿಸುತ್ತಿದೆ. (ಏಜೆನ್ಸೀಸ್)