ಪುಲ್ವಾಮಾ: ಕಳೆದ ವರ್ಷ ಫೆಬ್ರವರಿ 14ರಂದು ಪುಲ್ವಾಮಾದಲ್ಲಿ ಆತ್ಮಾಹುತಿ ಬಾಂಬರ್ಗಳಿಂದಾಗಿ 40 ಜನ ಸಿಆರ್ಪಿಎಫ್ ಯೋಧರು ಮೃತಪಟ್ಟಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್ಐಎ) ಜೈಷ್ ಎ ಮೊಹಮ್ಮದ್ (JeM) ಸಂಘಟನೆಯ ಉಗ್ರನೊಬ್ಬನನ್ನು ಬಂಧಿಸಿದೆ.
ಪುಲ್ವಾಮಾ ಬಳಿಯ ಹಜಿಬಲ್ ಪ್ರದೇಶದವನಾದ ಶಕೀರ್ ಬಶೀರ್ ಮ್ಯಾಗ್ರೆ ಎಂಬಾತನೇ ಪ್ರಕರಣದ ಮೊದಲ ಬಂಧಿತ. ಈತ ಆತ್ಮಹತ್ಯಾ ದಳದ ಅದಿಲ್ ಅಮಹ್ಮದ್ ದಾರ್ನಿಗೆ ವಸತಿ ಮತ್ತು ಇನ್ನಿತರ ಸೌಲಭ್ಯ ಒದಗಿಸಿದ್ದ.
ಪಾಕಿಸ್ತಾನದ ಉಗ್ರ ಮಹಮ್ಮದ್ ಉಮರ್ ಫಾರೂಕ್ ಎಂಬಾತನಿಂದ ಅದಿಲ್ ಮ್ಯಾಗ್ರೆಗೆ ಪರಿಚಿತನಾಗಿದ್ದ. ನಂತರ ತಾನೂ ಜೆಇಎಮ್ನ ಕಾರ್ಯಕರ್ತನಾಗಿದ್ದ.
ಬಹಳಷ್ಟು ಸಲ ತಾನು ಬಂದೂಕು, ಮದ್ದು ಗುಂಡು, ಹಣ ಮತ್ತಿತರ ಸ್ಫೋಟಕ ವಸ್ತುಗಳನ್ನು ಸರಬರಾಜು ಮಾಡಿದ್ದೆ. ಅವುಗಳನ್ನು ಪುಲ್ವಾಮಾ ದಾಳಿಗೆ ಬಳಸಲಾಗಿತ್ತು ಎಂದು ಮ್ಯಾಗ್ರೆ ಆರಂಭಿಕ ವಿಚಾರಣೆಯಲ್ಲಿ ಬಾಯಿ ಬಿಟ್ಟಿದ್ದಾನೆ.
ಉಗ್ರರಾದ ಅದಿಲ್ ದಾರ್ ಮತ್ತು ಉಮರ್ ಫಾರುಕ್ಗೆ 2018ರಿಂದ 2019ರ ಫೆಬ್ರವರಿ ದಾಳಿ ಆಗುವವರೆಗೆ ಮ್ಯಾಗ್ರೆ ತನ್ನ ಮನೆಯಲ್ಲಿ ನೆಲೆ ನೀಡಿದ್ದ. ಜತೆಗೆ ಸ್ಫೋಟಕ ವಸ್ತುಗಳ ತಯಾರಿಕೆಗೆ ಸಹಾಯ ಮಾಡಿದ್ದ. ಫರ್ನಿಚರ್ಸ್ ಅಂಗಡಿ ಇಟ್ಟುಕೊಂಡಿದ್ದ ಮ್ಯಾಗ್ರೆ, ಉಗ್ರ ಮೊಹಮ್ಮದ್ ಉಮರ್ ಸಲಹೆಯಂತೆ, ಜಮ್ಮು-ಶ್ರೀನಗರ ಹೆದ್ದಾರಿಯಲ್ಲಿ ಸಿಆರ್ಪಿಎಫ್ ಬೆಂಗಾವಲುಗಳ ಚಲನೆ ನಿಗಾ ಇಟ್ಟಿದ್ದ.
ಅಲ್ಲದೆ ಸಿಆರ್ಪಿಎಫ್ ದಳದ ಚಲನೆಗಳ ಬಗ್ಗೆ ಉಗ್ರರಿಬ್ಬರಿಗೆ ಮಾಹಿತಿ ನೀಡುತ್ತಿದ್ದ. ಜತೆಗೆ ಕಾರಿಗೆ ಬಾಂಬ್ ಅಳವಡಿಸಲು ಮಾರುತಿ ಇಕೋ ಕಾರ್ನ್ನು ಬದಲಾಯಿಸಿದ್ದ. ಇದನ್ನು ಎನ್ಐಎ ತಂಡ ಪತ್ತೆ ಹಚ್ಚಿದೆ.
ಪುಲ್ವಾಮಾ ದಾಳಿಯಲ್ಲಿ ಮುದ್ದಾಸಿರ್ ಅಹಮದ್ ಖಾನ್, ಪಾಕಿಸ್ತಾನದ ಉಗ್ರ ಮೊಹಮ್ಮದ್ ಉಮರ್ ಫಾರೂಕ್ ಅಲ್ಲದೆ ಸ್ಫೋಟಕಗಳ ವಸ್ತುಗಳ ತಯಾರಕ ಕಮ್ರಾನ್ ಕೂಡ ಭಾಗಿಯಾಗಿದ್ದರು. ಇವರನ್ನು 2019ರ ಮಾರ್ಚ್ನಲ್ಲಿ ಕೊಲ್ಲಲಾಗಿತ್ತು. ಕಾರಿನ ಮಾಲೀಕ ಸಜ್ಜಾದ್ ಅಹ್ಮದ್ ಮತ್ತು ಖಾರಿ ಯಾಸ್ಸಿರ್ ಎಂಬುವವರು ಕೂಡ ದಾಳಿಯಲ್ಲಿ ಭಾಗವಹಿಸಿದ್ದಾರೆ.
ಮ್ಯಾಗ್ರೆನನ್ನು ಜಮ್ಮುವಿನಲ್ಲಿರುವ ಎನ್ಐಎದ ವಿಶೇಷ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿತ್ತು. ಅವನನ್ನು ಹೆಚ್ಚಿನ ವಿಚಾರಣೆಗಾಗಿ 15 ದಿನಗಳ ಕಾಲ ಎನ್ಐಎ ವಶಕ್ಕೆ ನೀಡಲಾಗಿದೆ. (ಏಜೆನ್ಸೀಸ್)