ಗೋವಾ: ಸುಶಿಕ್ಷಿತರು ಯಾರೂ ಮಾಂಗಲ್ಯ ಸೂತ್ರವನ್ನು ಅವಹೇಳನ ಮಾಡುವುದಿಲ್ಲ. ಅದರಲ್ಲೂ ಮಹಿಳೆಯರಂತೂ ಅದನ್ನು ಅಗೌರವಿಸುವುದಿಲ್ಲ. ಆದರೆ ಸುಶಿಕ್ಷಿತ ಮಹಿಳೆಯೊಬ್ಬರು ಮಾಂಗಲ್ಯ ಸೂತ್ರ ಧರಿಸಿದವರನ್ನು ಚೈನ್ ಹಾಕಿದ ನಾಯಿಗೆ ಹೋಲಿಸಿ ಈಗ ಸಂಕಷ್ಟ ತಂದಿಟ್ಟುಕೊಂಡಿದ್ದಾರೆ. ಏಕೆಂದರೆ ಆಕೆಯ ವಿರುದ್ಧ ಇದೀಗ ಎಫ್ಐಆರ್ ದಾಖಲಾಗಿದೆ.
ಹೀಗೆ ಉಡಾಫೆ ಮಾತಾಡಿ ಎಫ್ಐಆರ್ಗೆ ಗುರಿಯಾಗಿರುವವರು ವಿ.ಎಂ. ಸಲ್ಗಾವೋಕರ್ ಕಾನೂನು ಕಾಲೇಜಿನ ಸಹಾಯಕ ಪ್ರಾಧ್ಯಾಪಕಿ ಶಿಲ್ಪಾ ಸಿಂಗ್. ಮಾಂಗಲ್ಯ ಸೂತ್ರ ಧರಿಸಿರುವ ಮಹಿಳೆಯರನ್ನು ಸರಪಳಿ ಹಾಕಿದ ನಾಯಿಗೆ ಹೋಲಿಸಿ ಈಕೆ ಫೇಸ್ಬುಕ್ನಲ್ಲಿ ಸ್ಟೇಟಸ್ ಹಾಕಿದ್ದರು. ಈ ಬಗ್ಗೆ ರಾಷ್ಟ್ರೀಯ ಹಿಂದು ಯುವವಾಹಿನಿ ಗೋವಾ ಘಟಕದ ರಾಜೀವ್ ಝಾ ಪೊಲೀಸರಿಗೆ ದೂರು ನೀಡಿದ್ದು, ಆ ಮೇರೆಗೆ ಶಿಲ್ಪಾ ಮೇಲೆ ಎಫ್ಐಆರ್ ದಾಖಲಾಗಿದೆ.
ಶಿಲ್ಪಾ ಸಿಂಗ್ ಏಪ್ರಿಲ್ 21ರಂದು ಫೇಸ್ಬುಕ್ನಲ್ಲಿ ಹೀಗೆ ಮಾಂಗಲ್ಯ ಸೂತ್ರವನ್ನು ಅವಮಾನಿಸಿ ಪೋಸ್ಟ್ ಮಾಡಿದ್ದರು. ಎಫ್ಐಆರ್ ದಾಖಲಾಗುವ ಕೆಲಗಂಟೆಗಳ ಮುನ್ನ ಆ ಬಗ್ಗೆ ಆಕೆ ಕ್ಷಮೆ ಯಾಚಿಸಿದ್ದರು. ಪುರುಷಪ್ರಧಾನ ಸಮಾಜವನ್ನು ತಿಳಿಸುವ ಭರದಲ್ಲಿ ಹಾಗೆ ಹೇಳಿದ್ದೆ ಎಂಬ ಸ್ಪಷ್ಟನೆಯನ್ನೂ ನೀಡಿದ್ದರು.
ಇನ್ನು ಶಿಲ್ಪಾ ಅವರನ್ನು ತರಾಟೆಗೆ ತೆಗೆದುಕೊಂಡು ಝಾ ಅಕ್ಟೋಬರ್ 30ರಂದು ಫೇಸ್ಬುಕ್ನಲ್ಲಿ ಪೋಸ್ಟ್ ಮಾಡಿದ್ದು, ಅದಕ್ಕೆ ಸಂಬಂಧಿಸಿದಂತೆ ಶಿಲ್ಪಾ ಕೂಡ ದೂರು ದಾಖಲಿಸಿದ್ದಾರೆ. ಇಬ್ಬರ ಮೇಲೂ ಎಫ್ಐಆರ್ ದಾಖಲಾಗಿದ್ದು, ಆ ಮೇರೆಗೆ ತನಿಖೆ ನಡೆಯಲಿದೆ ಎಂದು ಉತ್ತರ ಗೋವಾದ ಎಸ್ಪಿ ಉತ್ಕೃಷ್ಠ್ ಪ್ರಸೂನ್ ತಿಳಿಸಿದ್ದಾರೆ. (ಏಜೆನ್ಸೀಸ್)