ನವದೆಹಲಿ: ನರೇಂದ್ರ ಮೋದಿ 2.0 ಸರ್ಕಾರದ ಮೊದಲನೇ ಬಜೆಟ್ ಮಂಡನೆಯು ಫೆ.1ರಂದು ನಡೆದಿದ್ದು, ಎರಡನೇ ದಾಖಲೆ ಬರೆಯುವಲ್ಲಿ ಈ ಬಜೆಟ್ ಯಶಸ್ವಿಯಾಗಿದೆ. ಸ್ವಾತಂತ್ರ್ಯ ಬಂದಾಗಿನಿಂದ ಮಂಡನೆಗೆ ಅತಿ ಹೆಚ್ಚು ಸಮಯ ತೆಗೆದುಕೊಂಡ ಬಜೆಟ್ ಎನ್ನುವುದು ಮೊದಲನೇ ದಾಖಲೆಯಾದರೆ ಬರೋಬ್ಬರಿ 11 ಲಕ್ಷ ಟ್ವೀಟ್ ಬಜೆಟ್ ಕುರಿತಾಗಿಯೇ ಆಗಿರುವುದು ಎರಡನೇ ದಾಖಲೆ.
ಫೆ.1ರಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ 2020-21ನೇ ಸಾಲಿನ ಬಜೆಟ್ ಮಂಡನೆ ಮಾಡಿದ್ದಾರೆ. 2 ಗಂಟೆ, 41 ನಿಮಿಷಗಳ ಕಾಲ ಬಜೆಟ್ ಮಂಡನೆಯಾಗಿದ್ದು ಇದೇ ಮೊದಲನೇ ಬಾರಿಗೆ ಇಷ್ಟೊಂದು ದೊಡ್ಡ ಬಜೆಟ್ನ್ನು ಸಂಸತ್ನಲ್ಲಿ ಮಂಡಿಸಲಾಗಿದೆ. ಬಜೆಟ್ ಮಂಡನೆಗೆ ಹಲವು ದಿನಗಳಿರುವಾಗಲೇ ಅದರ ಬಗ್ಗೆ ಸಾಕಷ್ಟು ಚರ್ಚೆಗಳು ಆರಂಭವಾಗಿದ್ದವು. ಬಜೆಟ್ ಮಂಡನೆ ಮುಗಿಯುತ್ತಿದ್ದಂತೆಯೇ ಅದರ ಪರ ವಿರೋಧವಾಗಿ ಲಕ್ಷಾಂತರ ಟ್ವೀಟ್ಗಳನ್ನು ಮಾಡಲಾಗಿದೆ. #UnionBudget2020 ಎಂಬ ಹ್ಯಾಷ್ಟ್ಯಾಗ್ನೊಂದಿಗೆ ಆರ್ಥಿಕ ತಜ್ಞರು, ರಾಜಕೀಯ ನಾಯಕರು ಸೇರಿದಂತೆ ಜನಸಾಮಾನ್ಯರು ಬಜೆಟ್ನ ಬಗ್ಗೆ ತಮ್ಮ ಅಭಿಪ್ರಾಯವನ್ನು ಟ್ವಿಟ್ಟರ್ನಲ್ಲಿ ಹಂಚಿಕೊಂಡಿದ್ದಾರೆ. ಜನವರಿ 30ರಿಂದ ಇಂದಿನವರೆಗೆ ಸುಮಾರು 11 ಲಕ್ಷಕ್ಕೂ ಹೆಚ್ಚು ಟ್ವೀಟ್ಗಳಲ್ಲಿ #UnionBudget2020 ಹ್ಯಾಷ್ಟ್ಯಾಗ್ ಬಳಕೆಯಾಗಿದೆ ಎಂದು ಟ್ವಿಟ್ಟರ್ ತಿಳಿಸಿದೆ.
ನಮ್ಮ ಸುದ್ದಿ ಪಾಲುದಾರರ ಸಹಾಯದೊಂದಿಗೆ, ಕೇಂದ್ರ ಬಜೆಟ್ 2020ರ ಮಂಡನೆಯನ್ನು ಮತ್ತು ವಿಶ್ಲೇಷಣೆಯನ್ನು ದೇಶಾದ್ಯಂತ ಟ್ವಿಟ್ಟರ್ ಮೂಲಕ ತಲುಪಿಸಿದ್ದೇವೆ. ಆಯಾ ಸಮಯ ಸಂದರ್ಭಕ್ಕೆ ತಕ್ಕಂತೆ ಕಾಮೆಂಟ್ಗಳನ್ನು ಮಾಡಿ ಜನಸಾಮಾನ್ಯರು ಈ ದಾಖಲೆಯನ್ನು ಬರೆದುಕೊಟ್ಟಿದ್ದಾರೆ ಎಂದು ಟ್ವಿಟ್ಟರ್ ಇಂಡಿಯಾದ ಸುದ್ದಿ ಪಾಲುದಾರಿಕೆಯ ಮುಖ್ಯಸ್ಥರಾದ ಅಮೃತ ತ್ರಿಪಾಠಿ ಹೇಳಿದ್ದಾರೆ. (ಏಜೆನ್ಸೀಸ್)