ನವದೆಹಲಿ: ಕೃಷಿ ಸಂಬಂಧಿತ ಮೂರು ಹೊಸ ಕಾಯ್ದೆಗಳ ಕುರಿತು ಉಂಟಾಗಿರುವ ಬಿಕ್ಕಟ್ಟನ್ನು ಬಗೆಹರಿಸಲು ಮಾತುಕತೆಗೆ ಬರುವಂತೆ ಕೇಂದ್ರ ಸರ್ಕಾರ ನೀಡಿದ್ದ ಆಹ್ವಾನವನ್ನು ಪ್ರತಿಭಟನಾನಿರತ ರೈತ ಸಂಘಟನೆಗಳು ಶನಿವಾರ ಒಪ್ಪಿಕೊಂಡಿವೆ. ಈ ಕುರಿತು ಸುಮಾರು 40 ರೈತ ಸಂಘಟನೆಗಳು ಜಂಟಿಯಾಗಿ ಸರ್ಕಾರಕ್ಕೆ ಪತ್ರ ರವಾನಿಸಿದ್ದು, ಡಿಸೆಂಬರ್ 29ರಂದು (ಮಂಗಳವಾರ) ಬೆಳಗ್ಗೆ 11ಕ್ಕೆ ಸಭೆಗೆ ಬರುವುದಾಗಿ ತಿಳಿಸಿವೆ. ಸರ್ಕಾರ ಹಾಗೂ ರೈತ ಸಂಘಟನೆಗಳ ನಡುವೆ ಒಮ್ಮತ ಮೂಡದ ಕಾರಣ ಡಿ. 9ರಂದು 6ನೇ ಸುತ್ತಿನ ಸಭೆ ರದ್ದಾದ ಬಳಿಕ ಈ ಸಭೆ ನಿಗದಿಯಾಗಿದೆ. ಸಭೆಗೆ ಬರಲು ಕೆಲ ಷರತ್ತುಗಳನ್ನೂ ವಿಧಿಸಿರುವ ರೈತರು, ಹೊಸ ಕೃಷಿ ಕಾಯ್ದೆಗಳನ್ನು ರದ್ದುಪಡಿಸುವ ಅಂಶ ಸಭೆಯ ಅಜೆಂಡಾದ ಪಟ್ಟಿಯಲ್ಲಿ ಮೊದಲಿರಬೇಕು ಎಂದು ಹೇಳಿದ್ದಾರೆ.
