ತೀವ್ರ ಗಾಯಗೊಂಡ, ಕಣ್ಣಿನ ಕೆಳಗೆ ಹೊಲಿಗೆ ಹಾಕಿಸಿಕೊಂಡ ಈ ಫೊಟೋ ನೋಡಿದೊಡನೆ ಮನ ಕಲುಕುತ್ತದೆ. ಇದು ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
“ಸ್ವೀಡಿಷ್ನ 12 ವರ್ಷದ ಈ ಹುಡುಗ ಮುಸ್ಲಿಂ ವಲಸಿಗರಿಂದ ಥಳಿತಕ್ಕೊಳಗಾಗಿದ್ದಾನೆ. ಅದಕ್ಕೆ ಬಾಲಕನಿಗೆ ನೀಲಿ ಕಣ್ಣು ಇದ್ದದ್ದೇ ಕಾರಣ’ ಎಂದು ಹೇಳಲಾಗಿದೆ. ಆದರೆ ಇಂಡಿಯಾ ಟುಡೇ ನಡೆಸಿದ ಫ್ಯಾಕ್ಟ್ಚೆಕ್ನಿಂದ ಇದರ ಬಣ್ಣ ಬಯಲಾಗಿದೆ.
ವೆಬ್ಸೈಟ್ವೊಂದರಲ್ಲಿ ಈ ಫೊಟೋ ಜತೆಗೆ ಸ್ವೀಡಿಷ್ ಬಾಲಕ ನೀಲಿ ಕಣ್ಣು ಹೊಂದಿದ್ದಕ್ಕಾಗಿ ಮುಸ್ಲಿಂ ವಲಸಿಗರಿಂದ ಥಳಿಸಲ್ಪಟ್ಟ ಎಂಬ ಶೀರ್ಷಿಕೆಯೊಂದಿಗೆ ಸುದ್ದಿ ಪ್ರಕಟವಾಗಿತ್ತು.
ಸ್ವೀಡಿಷ್ ನಗರದ ಹೆಲ್ಸಿಂಗ್ಬರ್ಗ್ ಎಂಬಲ್ಲಿ ನಡೆದಿತ್ತು ಎಂದು ಸುದ್ದಿಯಲ್ಲಿ ಪ್ರಕಟವಾಗಿತ್ತು. ಆದರೆ, ಕಾನೂನಿನ ಭಯದಿಂದ ಇದು ಅಪರಾಧ ಅಥವಾ ದ್ವೇಷದ ಸುದ್ದಿ ಎಂದು ಬಿಂಬಿತವಾಗಿರಲಿಲ್ಲ.
ಡೇವಿಡ್ ವಾನ್ಸ್ ಎಂಬ ಟ್ವೀಟರ್ ಬಳಕೆದಾರ, ನೀಲಿ ಕಣ್ಣಿರುವುದೇ ತಪ್ಪೇನು? ಎಂಬ ಸಾಲಿನಡಿ ಈ ಫೊಟೋ ಹಾಕಿದ್ದರು. ಇದು 8,400 ಲೈಕ್ ಪಡೆದು 7 ಸಾವಿರ ಬಾರಿ ರಿಟ್ವೀಟ್ ಆಗಿತ್ತು. ಇನ್ನು ಕೆಲವರು ಈ ಪೋಸ್ಟ್ನ್ನು ಫೇಸ್ಬುಕ್ನಲ್ಲಿ ಹಂಚಿಕೊಂಡಿದ್ದರು.
ಟ್ವೀಟ್ ಬಳಕೆದಾರನೊಬ್ಬ ಈ ಪೋಸ್ಟ್ ಬಗ್ಗೆ ಕಮೆಂಟ್ ಮಾಡಿ ಇದು ಸುಳ್ಳು ಸುದ್ದಿ ಎಂದಿದ್ದ. ಇದಕ್ಕೆ ವಾನ್ಸ್, ಬಾಲಕನ ಬಗ್ಗೆ ಕಾಳಜಿಯಿಂದ ಈ ಪೊಸ್ಟ್ ಹಾಕಿದ್ದೇನೆ ಆದರೆ, ಈ ಫೊಟೋ ಸುದ್ದಿಗೆ ಸಂಬಂಧಿಸಿದ್ದಲ್ಲ ಎಂದು ತಿಳಿಸಿದ್ದ.
ಸತ್ಯ ಸಂಗತಿ ಏನು?
ಈ ವೈರಲ್ ಆದ ಫೊಟೋನ ಬಗ್ಗೆ ಮಾಹಿತಿ ಸಂಗ್ರಹಿಸಿದಾಗ, ಬಿಬಿಸಿ ಪ್ರಕಾರ ಈ ಫೊಟೋದಲ್ಲಿರುವ ಬಾಲಕಿಯ ಹೆಸರು ಸೋಫಿ ವಿಲ್ಲೀಸ್. ಕಾರ್ಡಿಫ್ನ ನಿವಾಸಿ ಈಕೆಗೆ ನಾಲ್ಕು ವರ್ಷ. 2008ರ ಏಪ್ರಿಲ್ನಲ್ಲಿ ಈಕೆಯ ಮೇಲೆ ಕೈಜರ್ ಎಂಬ ನಾಯಿ ದಾಳಿ ಮಾಡಿತ್ತು.
ಈ ಸುದ್ದಿ ಆಗ ಡೈಲಿ ಮೇಲ್ನಲ್ಲಿ ಕೂಡ ವರದಿಯಾಗಿತ್ತು. ಗಾಯಗೊಂಡ ಬಾಲಕಿಯ ಫೊಟೋಕ್ಕೂ ಹಾಗೂ ವಲಸಿಗ ಮುಸ್ಲಿಂರ ಥಳಿತ ಎಂಬ ಸುದ್ದಿಗೂ ಸಂಬಂಧವಿಲ್ಲ ಎನ್ನುವುದು ಸ್ಪಷ್ಟವಾಗಿದೆ. (ಏಜೆನ್ಸೀಸ್)