'ವಂದೇ ಭಾರತ್'​ ಮಂಗಳೂರು ಸೆಂಟ್ರಲ್​ ಬೇಡಿಕೆ ತರವಲ್ಲ

ವಂದೇ ಭಾರತ್ ರೈಲು.
ವಂದೇ ಭಾರತ್ ರೈಲು.
Published on: 

* ಉಡುಪಿ ರೈಲ್ವೆ ಯಾತ್ರಿ ಸಂಘದ ಅಧ್ಯಕ್ಷ ಧೀರಜ ಆಕ್ಷೇಪ

ಉಡುಪಿ: ಮಂಗಳೂರಿನಲ್ಲಿ ಹಲವಾರು ಮುಖ್ಯ ನಿಲ್ದಾಣಗಳಿದ್ದೂ ಸಹ ಪ್ರತಿಷ್ಠಿತ 'ವಂದೇ ಭಾರತ್​' ರೈಲೂ ಸಹ ಮಂಗಳೂರು ಸೆಂಟ್ರಲ್​ ಒಳಗೆ ಬರಬೇಕು ಎಂದು ಒತ್ತಾಯಿಸುವುದು ವಿರೋಧಿ ನಡೆಯಾಗಿದೆ. ಇದರಿಂದ ಮಂಗಳೂರು, ಉಡುಪಿ, ಕಾರವಾರದ ಎಲ್ಲ ಪ್ರಯಾಣಿಕರ ಸಮಯ ಅನಗತ್ಯವಾಗಿ ವ್ಯರ್ಥವಾಗುತ್ತದೆ ಎಂದು ಉಡುಪಿ ರೈಲ್ವೆ ಯಾತ್ರಿ ಸಂಘದ ಅಧ್ಯಕ್ಷ ಧೀರಜ ಎನ್​. ಶಾಂತಿ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಕರಾವಳಿ ಕರ್ನಾಟಕದ ಮೂರು ಜಿಲ್ಲೆಗಳ ಮೂನ್ನೂರು ಕಿಮೀ ದೂರದ ಪ್ರಯಾಣಿಕರ ಹಿತ ಪರಿಗಣಿಸಬೇಕಿದೆ. ಸಾವಿರಾರು ರೂ. ಹೆಚ್ಚುವರಿ ಟಿಕೆಟ್​ ದರ ಕೊಟ್ಟೂ ವಂದೇ ಭಾರತ್​ ರೈಲು ಉಡುಪಿಗೆ ಬರಲು ಸುಮಾರು 9 ಗಂಟೆ ಸಮಯ ತೆಗೆದುಕೊಳ್ಳುತ್ತಿದೆ. ಈ ರೈಲು ಇನ್ನೂ 2 ತಾಸು ಬೇಗನೆ ಉಡುಪಿ ನಿಲ್ದಾಣಕ್ಕೆ ಬರುವಂತೆ ನಾವು ಆಗ್ರಹಿಸುತ್ತಿದ್ದೇವೆ. ಹೀಗಿರುವಾಗ ಮಂಗಳೂರು ಸೆಂಟ್ರಲ್​ ಒಳಗೆ ಈ ರೈಲು ತೆರಳಿದರೆ ಇನ್ನಷ್ಟು ತಾಸು ವಿಳಂಬವಾಗಲಿದೆ.

ಬಂಟ್ವಾಳ, ಅಭಿವೃದ್ಧಿ ಪಡಿಸಬಹುದಾದ ಜೋಕಟ್ಟೆ, ಪಡೀಲ್​, ಸುರತ್ಕಲ್​ ನಿಲ್ದಾಣಗಳ ಮೂಲಕ ರೈಲು ಬಂದಿದ್ದರೆ ಬಹಳಷ್ಟು ಸಮಯ ಉಳಿತಾಯವಾಗುತ್ತಿತ್ತು. ಆದರೆ, ಸಂಸದರ ಮನವಿಯಂತೆ ವಂದೇ ಭಾರತ್​ ಎರಡೂ ಕಡೆ ಇಂಜಿನ್​ ಹೊಂದಿರುವುದರಿಂದ ಸಮಯ ಹಾಳಾಗಲಾರದು ಎಂದು ಮಂಗಳೂರು ಜಂಕ್ಷನ್​ ಮೂಲಕ ಬಂದರೂ ವಿರೋಧಿಸದೆ ಸ್ವಾಗತಿಸಿದ್ದೇವೆ. ಇದೀಗ ಮತ್ತೆ ಮಂಗಳೂರು ಸೆಂಟ್ರಲ್​ ರೀತಿಯ ಒಳ ಭಾಗದ ನಿಲ್ದಾಣಕ್ಕೆ ಬರುವಂತೆ ಕೇಳುತ್ತಿರುವುದನ್ನು ಉಡುಪಿ ಯಾತ್ರಿ ಸಂಘ ವಿರೋಧಿಸುತ್ತದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.