ಸನ್ಮಾನದ ಹಣ ಅಸಹಾಯಕರಿಗೆ ದಾನ!

ಉಡುಪಿ: ಸದಾ ಸಮಾಜ ಸೇವೆಯ ಮೂಲಕವೇ ಮನೆಮಾತಾಗಿರುವ ಉಡುಪಿಯ ಸಮಾಜ ಸೇವಕ ವಿಶು ಶೆಟ್ಟಿ ಅಂಬಲಪಾಡಿ ಅವರು ತನಗೆ ಬಂದ ಪ್ರಶಸ್ತಿಯ ಹಣವನ್ನು ನೊಂದವರಿಗೆ ದಾನ ಮಾಡುವ ಮೂಲಕ ಮಾನವೀಯತೆ ಮೆರೆದಿದ್ದಾರೆ.

ಮುಂಬಯಿಯ ನಲ್ಲಸೋಪಾರದಲ್ಲಿರುವ ತುಳುಕೂಟ ಫೌಂಡೇಷನ್​ (ರಿ.)ನ ಮಹಿಳಾ ವಿಭಾಗದ ವತಿಯಿಂದ ಮಾ.30ರಂದು ವಿಶ್ವ ಮಹಿಳಾ ದಿನ ಕಾರ್ಯಕ್ರಮ ಆಯೋಜಿಸಿತ್ತು. ನೊಂದ ಹಾಗೂ ಅಸಹಾಯಕ ಮಹಿಳೆಯರಿಗೆ ಆಸರೆಯಾಗುವ ಹಾಗೂ ಸಹಕರಿಸುವ ವಿಶು ಶೆಟ್ಟಿ ಅಂಬಲಪಾಡಿ ಅವರ ಕಾರ್ಯ ಗುರುತಿಸಿ ತುಳುಕೂಟದ ಅಧ್ಯಕ್ಷ ಶಶಿಧರ್​ ಕೆ. ಶೆಟ್ಟಿ ಇನ್ನಂಜೆ ಹಾಗೂ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆ ಯಶೋದಾ ಎಸ್​. ಕೊಟ್ಯಾನ್​ ಅವರು 2026ನೇ ಸಾಲಿನ 'ತುಳುನಾಡ ಐಸಿರಿ' ಪ್ರಶಸ್ತಿ ನೀಡಿದ್ದರು. ಅಲ್ಲದೆ, 25 ಸಾವಿರ ರೂ. ಗೌರವ ಧನ ನೀಡಿ ಸನ್ಮಾನಿಸಿದ್ದರು.

ತನಗೆ ಬಂದ ಸನ್ಮಾನದ ಹಣವನ್ನು ಅಸಹಾಯಕ ಮಹಿಳೆಯರಿಗೆ ನೀಡಿ ಸಹಕರಿಸುವ ವಿಶು ಶೆಟ್ಟಿ, ಈ ಬಾರಿ ಬನ್ನಂಜೆಯ ದಲಿತ ಮಹಿಳೆ ಶಕುಂತಲಾ ಅವರ ಪತಿಯ ಚಿಕಿತ್ಸೆಗೆ 20 ಸಾವಿರ ರೂ. ಹಾಗೂ ಕಾಪುವಿನ ಬಾಲಕಿ ಹಿಮಾನಿ ಶೆಟ್ಟಿ ಚಿಕಿತ್ಸೆಗೆ 5 ಸಾವಿರ ರೂ. ನೀಡಿ ಸಹಕರಿಸಿದರು.

"