ಉಡುಪಿ: ಭಾರತವು ಯುವ ಸಮುದಾಯದ ದೇಶವಾಗಿದ್ದು ಅವರನ್ನೇ ಗುರಿಯಾಗಿಸಿಕೊಂಡು ಹಾಗೂ ಅವರ ಭವಿಷ್ಯ ಹಾಳು ಮಾಡಲು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಡ್ರಗ್ಸ್​ ಮಾಫಿಯಾಗಳು ತೊಡಗಿಕೊಂಡಿವೆ. ಪ್ರಮುಖವಾಗಿ ದೇಶದ ವಿದ್ಯಾರ್ಥಿಗಳನ್ನು ಮಾದಕ ವ್ಯಸನಗಳ ದಾಸರನ್ನಾಗಿಸಿ, ಅದರಿಂದ ಲಭಿಸುವ ಹಣವನ್ನು ಭಯೋತ್ಪಾದನೆಯಂತಹ ಕೃತ್ಯಗಳಿಗೆ ಬಳಸಲಾಗುತ್ತಿದೆ ಎಂದು ಬೆಂಗಳೂರಿನ ಪರಿವರ್ತನಾ ಚಾರಿಟೇಬಲ್​ ಟ್ರಸ್ಟ್​ನ ಪ್ರಮುಖ ಸಂಚಾಲಕ ಸಂದೇಶ್​ ಆತಂಕ ವ್ಯಕ್ತಪಡಿಸಿದರು.

ಉಡುಪಿಯ ಹಿರಿಯಡ್ಕದ ಕರ್ನಾಟಕ ಪಬ್ಲಿಕ್​ ಸ್ಕೂಲ್​ ಕಾಲೇಜಿನಲ್ಲಿ ಶ್ರೀಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃಧ್ಧಿ ಯೋಜನೆ ಬಿ.ಸಿ. ಟ್ರಸ್ಟ್​ (ರಿ.) ಉಡುಪಿ ತಾಲೂಕು, ಪರಿವರ್ತನಾ ಚಾರಿಟೇಬಲ್​ ಟ್ರಸ್ಟ್​ ಬೆಂಗಳೂರು ಆಶ್ರಯದಲ್ಲಿ ಬುಧವಾರ (ಡಿ.31) ಆಯೋಜಿಸಿದ್ದ ಸ್ವಾಸ್ಥ್ಯ ರಕ್ಷಣೆ ಸಂಕಲ್ಪದ 'ಡ್ರಗ್ಸ್​ ಮುಕ್ತ ಕರ್ನಾಟಕ ಅಭಿಯಾನ ಕಾರ್ಯಕ್ರಮ'ದಲ್ಲಿ ಮಾತನಾಡಿದರು.

ಕಾರ್ಯಕ್ರಮ ಉದ್ಘಾಟಿಸಿದ ಕೆಪಿಎಸ್​ ಕಾಲೇಜಿನ ಪ್ರಾಂಶುಪಾಲ ಮಂಜುನಾಥ್​ ಭಟ್​ ಮಾತನಾಡಿ, ಮಕ್ಕಳು ದುಶ್ಚಟಗಳ ದಾಸರಾಗಬಾರದು. ಪಾಲಕರು ಕಣ್ಣೀರು ಹಾಕುವಂತೆ ಮಾಡಬಾರದು. ಸೂಕ್ತ ಅಧ್ಯಯನದ ಕಡೆಗೆ ಗಮನವಹಿಸಿ ಶೈಕ್ಷಣಿಕ ಸಾಧನೆ ಮಾಡಬೇಕು. ಉನ್ನತ ಉದ್ಯೋಗ ಅಲಂಕರಿಸಿ, ಊರಿನ ಹಾಗೂ ಕಲಿತ ಶಾಲೆಯ ಕೀರ್ತಿ ಹೆಚ್ಚಿಸಬೇಕು. ಡ್ರಗ್ಸ್​ಗೆ ಸಂಬಂಧಿಸಿ ಯಾವುದೇ ಮಾಹಿತಿ ತಮಗೆ ಲಭಿಸಿದರೆ ಸ್ಥಳೀಯ ಪೊಲೀಸ್​ ಠಾಣೆಗೆ ಮಾಹಿತಿ ನೀಡಬೇಕು ಎಂದರು.

ಯುವ ಸಮುದಾಯ ಡ್ರಗ್ಸ್​ ಹಾಗೂ ಮದ್ಯಪಾನ ಚಟ ರೂಢಿಸಿಕೊಳ್ಳವ ರೀತಿ, ಅದರಿಂದಾಗುವ ದುಷ್ಪರಿಣಾಮದ ಕುರಿತು ಸ್ತಬ್ಧಚಿತ್ರಗಳ ಮೂಲಕ ವಿದ್ಯಾರ್ಥಿಗಳಿಗೆ ಮಾಹಿತಿ ನೀಡಲಾಯಿತು. ಹಿರಿಯಡ್ಕ ಪೋಲಿಸ್​ ಠಾಣೆಯ ಎಎಸ್​ಐ ಗೋಪಾಲ್​ ಮಾತನಾಡಿ, ದುಶ್ಚಟದಿಂದ ಆಗುವ ಅನಾಹುತ ಹಾಗೂ ಕಾನೂನಿನ ಕ್ರಮಗಳ ಕುರಿತು ಮಾಹಿತಿ ನೀಡಿದರು.

ಶ್ರೀಕ್ಷೇತ್ರ ಧರ್ಮ ಸ್ಥಳ ಗ್ರಾಮಾಭಿವೃಧ್ಧಿ ಯೋಜನೆ ಬಿ.ಸಿ. ಟ್ರಸ್ಟ್​ (ರಿ.) ಉಡುಪಿ ತಾಲೂಕಿನ ಯೋಜನಾಧಿಕಾರಿ ಸುರೇಂದ್ರ ನಾಯ್ಕ್​, ಜಿಲ್ಲಾ ಜನ ಜಾಗೃತಿ ವೇದಿಕೆಯ ಸದಸ್ಯ ಉಮೇಶ್​ ಶೆಟ್ಟಿ, ನಿವೃತ್ತ ಉಪನ್ಯಾಸಕಿ ನಳಿನಾದೇವಿ, ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಭಜನಾ ಪರಿಷತ್​ ಅಧ್ಯಕ್ಷ ಶಾಲಾ ಅಭಿವೃದ್ಧಿ ಸಮಿತಿಯ ಸದಸ್ಯ ವಿಜಯ್​ ಶೆಟ್ಟಿ ಕೊಂಡಾಡಿ, ಶ್ರೀಕ್ಷೇತ್ರ ಧರ್ಮ ಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯ ಹಿರಿಯಡ್ಕ ವಲಯದ ಮೇಲ್ವಿಚಾರಕ ರಾಜ್​, ಬೊಮ್ಮರಬೆಟ್ಟು ಕಾರ್ಯಕೇತ್ರದ ಸೇವಾಪ್ರತಿನಿಧಿ ಪ್ರತಿಮಾ, ವಲಯದ ಒಕ್ಕೂಟಗಳ ಅಧ್ಯಕ್ಷ ಗಣೇಶ್​ ನಾಯ್ಕ್​, ಶೌರ್ಯ ವಿಪತ್ತು ತಂಡದ ಸದಸ್ಯೆ ಸುಷ್ಮಾಕೆ., ಪರಿವರ್ತನಾ ಚಾರಿಟೇಬಲ್​ ಟ್ರಸ್ಟ್​ನ ಸದಸ್ಯ ಉಮೇಶ್​ ಪಕ್ಕಾಲು, ಶಾಲೆಯ ಅಧ್ಯಾಪಕರು ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.

ಬೊಮ್ಮರಬೆಟ್ಟು ಕಾರ್ಯಕೇತ್ರದ ಸೇವಾಪ್ರತಿನಿಧಿ ಯಶೋದಾ ಸ್ವಾಗತಿಸಿದರು. ಶಾಲಾ ಅಧ್ಯಾಪಕ ದೇವದಾಸ್​ ಪ್ರಭು ವಂದಿಸಿದರು.