ಜ್ಞಾನವಿಲ್ಲದ ವ್ಯಕ್ತಿ ಅಪ್ರಯೋಜಕ: ಶೀರೂರು ಶ್ರೀ

ಉಡುಪಿ : ನೀರಿಲ್ಲದ ನದಿ ಹಾಗೂ ಜ್ಞಾನವಿಲ್ಲದ ವ್ಯಕ್ತಿ ಅಪ್ರಯೋಜಕ. ಹೀಗಾಗಿ ವಿದ್ಯೆ ಎಲ್ಲಕ್ಕಿಂತ ಶ್ರೇಷ್ಠವಾಗಿದ್ದು, ವಿದ್ಯಾದಾನಕ್ಕೆ ನೆರವು ನೀಡುವುದು ಅನ್ನದಾನಕ್ಕಿಂತಲೂ ಶ್ರೇಷ್ಠವಾಗಿದೆ. ಅನ್ನ ನೀಡಿದ ಸ್ವಂತ ಹೊಟ್ಟೆ ತುಂಬುತ್ತದೆ. ಆದರೆ ವಿದ್ಯೆ ನೀಡಿದರೆ ಇಡೀ ಕುಟುಂಬವನ್ನೇ ಸಲಹಲು ಸಾಧ್ಯ ಎಂದು ಪರ್ಯಾಯ ಶೀರೂರು ಮಠದ ಶ್ರೀ ವೇದವರ್ಧನ ತೀರ್ಥ ಸ್ವಾಮೀಜಿ ಹೇಳಿದರು.

ಶ್ರೀಕೃಷ್ಣಮಠದ ರಾಜಾಂಗಣದಲ್ಲಿ ಯಕ್ಷಗಾನ ಕಲಾರಂಗದ ಅಂಗಸಂಸ್ಥೆ ವಿದ್ಯಾಪೋಷಕ್​ 22ನೇ ವರ್ಷದ ವಿನಮ್ರ ಸಹಾಯಧನ ವಿತರಣಾ ಸಮಾರಂಭದಲ್ಲಿ ಅವರು ಅಶೀರ್ವಚನ ನೀಡಿದರು.

ಮನುಷ್ಯ ಪಡೆದ ಜ್ಞಾನ ಸಮಾಜಕ್ಕೆ ಉಪಕಾರಿಯಾಗಬೇಕು. ವಿದ್ಯೆ ಜೊತೆಗೆ ಗುಣವೂ ಮುಖ್ಯ. ಸಮಾಜ ಸೇವೆ ಪರಮಾತ್ಮನಿಗೆ ಸಲ್ಲಿಸುವ ತೆರಿಗೆಯಾಗಿದ್ದು, ಸಂಸ್ಕಾರಯುತ ಯುವಪೀಳಿಗೆಯಿಂದ ದೇಶವನ್ನು ಕಟ್ಟಲು ಸಾಧ್ಯ. ದೇವರ ಮೇಲೆ ಭಕ್ತಿ, ಧರ್ಮಾಚರಣೆ, ದೇಶ ಸೇವೆ ಮಾಡಬೇಕು ಎಂದು ಹೇಳಿದರು.

ಮಂಗಳೂರು ಕರ್ಣಾಟಕ ಬ್ಯಾಂಕಿನ ಜಿ.ಎಂ. ಗೋಪಾಲಕೃಷ್ಣ ಸಾಮಗ, ಗೀತಾನಂದ ಫೌಂಡೇಶನ್​ನ ಅಧ್ಯಕ್ಷ ಆನಂದ ಸಿ. ಕುಂದರ್​, ಗಾಂಧಿ ಆಸ್ಪತ್ರೆಯ ಆಡಳಿತ ನಿರ್ದೇಶಕ ಡಾ. ಹರಿಶ್ಚಂದ್ರ, ಉದ್ಯಮಿ ಪಿ.ಪುರುಷೋತ್ತಮ ಶೆಟ್ಟಿ, ವಿಶ್ವನಾಥ ಶೆಣೈ, ಅರುಣ್​ ಕುಮಾರ್​ ಶೆಟ್ಟಿ, ಪುರುಷೋತ್ತಮ ಪಟೇಲ್​, ಪಣಂಬೂರು ವಾಸುದೇವ ಐತಾಳ್​, ಪಾರಂಪಳ್ಳಿ ನಟರಾಜ ಉಪಾಧ್ಯ, ಸಿಎ ಗಣೇಶ್​ ಕಾಂಚನ್​, ಆನಂದ ಪಿ. ಸುವರ್ಣ, ಉದಯ್​ ಹೆಗ್ಡೆ, ರವಿರಾಜ್​ ಬೆಳ್ಮ, ಕಲಾರಂಗ ಉಪಾಧ್ಯಕ್ಷ ವಿ.ಜಿ. ಶೆಟ್ಟಿ ಉಪಸ್ಥಿತರಿದ್ದರು.

ಯಕ್ಷಗಾನ ಕಲಾರಂಗ ಅಧ್ಯಕ್ಷ ಎಂ. ಗಂಗಾಧರ ರಾವ್​ ಸ್ವಾಗತಿಸಿದರು. ಕಾರ್ಯದರ್ಶಿ ಮುರಳಿ ಕಡೆಕಾರ್​ ಕಾರ್ಯಕ್ರಮ ನಿರೂಪಿಸಿದರು. ಸಹಕಾರ್ಯದರ್ಶಿ ನಾರಾಯಣ ಹೆಗಡೆ ವಂದಿಸಿದರು.

ಈ ಸಂದರ್ಭದಲ್ಲಿ ವಿದ್ಯಾಪೋಷಕ್​ ಹಾಗೂ ಯಕ್ಷಗಾನ ಕಲಾವಿದರ ಮಕ್ಕಳು ಸೇರಿ ಒಟ್ಟು 1,273 ವಿದ್ಯಾರ್ಥಿಗಳಿಗೆ 1,75,81,500 ರೂ. ಸಹಾಯಧನ ಹಾಗೂ 15 ಮಂದಿ ವಿದ್ಯಾರ್ಥಿಗಳಿಗೆ ಲ್ಯಾಪ್​ಟಾಪ್​ ವಿತರಣೆ ಮಾಡಲಾಯಿತು.