ಉಡುಪಿ: ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷಿ ಗ್ಯಾರಂಟಿ ಯೋಜನೆಗಳಲ್ಲಿ ಒಂದಾದ ಗೃಹಲಕ್ಷೀ ಯೋಜನೆಯಡಿ ಮೃತಪಟ್ಟ ಫಲಾನುಭವಿಗಳ ಖಾತೆಗೂ ಸತತವಾಗಿ ಧನಸಹಾಯ ಜಮೆಯಾಗುತ್ತಿದ್ದು, 2460 ಮಂದಿ ಮೃತ ಫಲಾನುಭವಿಗಳ ಖಾತೆಗೆ 2.20 ಕೋಟಿ ರೂ. ಹಣ ಪಾವತಿಯಾಗಿದೆ. ಈ ಪೈಕಿ 77.76 ಲಕ್ಷ ರೂ. ಅಧಿಕ ಹಣವನ್ನು ಮೃತರ ಕುಟುಂಬಸ್ಥರು ಎಟಿಎಂ ಮೂಲಕ ವಿತ್ ಡ್ರಾ ಮಾಡಿಕೊಂಡಿರುವುದು ಬೆಳಕಿಗೆ ಬಂದಿದೆ.
ಸರ್ಕಾರದ ಮಟ್ಟದಲ್ಲಿ ಸಕಾಲಕ್ಕೆ ಮಾಹಿತಿ ನವೀಕರಣಗೊಳ್ಳದ ಕಾರಣ ಮೃತಪಟ್ಟವರ ಖಾತೆಗೂ ಕೋಟ್ಯಂತರ ರೂಪಾಯಿ ಜಮೆಯಾಗುತ್ತಿದ್ದು, ಸರ್ಕಾರದ ಖಜಾನೆಗೆ ಕನ್ನ ಬಿದ್ದಂತಾಗಿದೆ.
ಜಿಲ್ಲೆಯಲ್ಲಿ ಗೃಹಲಕ್ಷೀ ಯೋಜನೆ ಒಟ್ಟು 7,727 ಫಲಾನುಭವಿಗಳು ಮರಣ ಹೊಂದಿದ್ದಾರೆ ಎಂದು ಗುರುತಿಸಲಾಗಿದೆ. ಈ ಪೈಕಿ 2,460 ಮೃತ ಫಲಾನುಭವಿಗಳ ಖಾತೆಗೆ ಅವರು ಮೃತಪಟ್ಟ ನಂತರವೂ ಸರ್ಕಾರದ ಧನಸಹಾಯದ ಕಂತುಗಳು ನಿಯಮಿತವಾಗಿ ಜಮೆಯಾಗಿವೆ.ಖಾತೆಗೆ ಹಣ ಜಮೆಯಾಗುತ್ತಿದ್ದಂತೆ ಮೃತ ಫಲಾನುಭವಿಗಳ ಕುಟುಂಬಸ್ಥರು ಎಟಿಎಂ ಕಾರ್ಡ್ ಬಳಸಿ ಹಣ ಡ್ರಾ ಮಾಡಿಕೊಂಡಿದ್ದಾರೆ. 81,35,673 ರೂ. ಸರ್ಕಾರದ ಖಾತೆಗೆ ವಾಪಾಸು ಪಡೆಯಲಾಗಿದ್ದು, 61,10,277 ರೂ. ಬ್ಯಾಂಕ್ಗಳಲ್ಲಿ ತಡೆಹಿಡಿಯಲಾಗಿದೆ. ಜೊತೆಗೆ ಮೃತರ ಖಾತೆಗೆ ಪಾವತಿಯಾದ ಹಣವನ್ನು ಸರ್ಕಾರಕ್ಕೆ ಮರಳಿ ಪಡೆಯಲು ಬ್ಯಾಂಕ್ ಹಾಗೂ ಅಂಚೆ ಕಚೇರಿಗಳಿಗೆ ಭೇಟಿ ನೀಡಿ ಮಾಹಿತಿ ಸಂಗ್ರಹಿಸುವ ಕಾರ್ಯ ನಡೆಯುತ್ತಿದೆ.
ನೋಂದಾಯಿತ ಫಲಾನುಭವಿಗಳು
ಉಡುಪಿ ಜಿಲ್ಲೆಯಲ್ಲಿ ಪ್ರಸ್ತುತ 2,38,080 ಗೃಹಲಕ್ಷಿ$್ಮ ಫಲಾನುಭವಿಗಳಿದ್ದಾರೆ. ಬೈಂದೂರು ತಾಲೂಕಿನಲ್ಲಿ 29,194, ಬ್ರಹ್ಮಾವರದಲ್ಲಿ 36,831, ಹೆಬ್ರಿಯಲ್ಲಿ 10,507, ಕಾಪುವಿನಲ್ಲಿ 27,278, ಕಾರ್ಕಳದಲ್ಲಿ 37,742, ಕುಂದಾಪುರದಲ್ಲಿ 53,029, ಉಡುಪಿಯಲ್ಲಿ 43,499 ನೋಂದಾಯಿತ ಲಾನುಭವಿಗಳಿದ್ದಾರೆ. ಆ.2023ರಿಂದ ಈ ವರ್ಷ ಜೂನ್ವರೆಗೆ ಒಟ್ಟು 1408 ಕೋಟಿ ರೂ. ಬ್ಯಾಂಕ್ ಖಾತೆಗೆ ಜಮೆಯಾಗಿದೆ.
ತಾಂತ್ರಿಕ ತೊಡಕು
ಗೃಹಲಕ್ಷ್ಮೀ ಅರ್ಜಿ ಸಲ್ಲಿಸಿದವರಲ್ಲಿ 1,778 ಬ್ಯಾಂಕ್ ಖಾತೆಗೆ ಎನ್ಪಿಸಿಐ ಜೋಡಣೆಯಾಗಿರಲಿಲ್ಲ. ಜೂನ್ ಅಂತ್ಯಕ್ಕೆ 45 ಪ್ರಕರಣಗಳು ಇತ್ಯರ್ಥಗೊಂಡು, 1,733 ಪ್ರಕರಣಗಳು ಬಾಕಿ ಉಳಿದಿವೆ. 82 ಲಾನುಭವಿಗಳಲ್ಲಿ ಇಕೆವೈಸಿ ಸಮಸ್ಯೆ ಕಂಡುಬಂದಿದ್ದು, 4946 ಮಂದಿ ಐಟಿ ಪಾವತಿದಾರರು ಎಂಬ ಕಾರಣಕ್ಕೆ ಅರ್ಜಿ ತಿರಸತಗೊಂಡಿದೆ.
