ಭಾರ ಹೊತ್ತು ಗಾಂಭೀರ್ಯದಿಂದ ಹೆಜ್ಜೆ ಹಾಕಿದ ಪ್ರಶಾಂತ

ಇದೇ ಮೊದಲ ಬಾರಿಗೆ ಪ್ರಶಾಂತ ಆನೆ 350 ಕೆ.ಜಿ. ತೂಕದ ಮರಳಿನ ಮೂಟೆ ಸೇರಿದಂತೆ ಒಟ್ಟಾರೆ 600ರಿಂದ 700 ಕೆ.ಜಿ. ಭಾರವನ್ನು ಹೊತ್ತು ಅರಮನೆ ಆವರಣದಿಂದ ಬನ್ನಿಮಂಟಪದವರೆಗೆ ಗಾಂಭೀರ್ಯದಿಂದ ಹೆಜ್ಜೆ ಹಾಕಿತು. ಸಂಜೆ 4.50ಕ್ಕೆ ಅರಮನೆ ಆವರಣದಿಂದ ಹೊರಟ ಪ್ರಶಾಂತ, ಯಾವುದೇ ಆತಂಕ ಅಥವಾ ಆಯಾಸವಿಲ್ಲದೆ ಸಂಜೆ 7 ಗಂಟೆ ವೇಳೆ ಬನ್ನಿಮಂಟಪ ತಲುಪಿತು. ಭಾರ ಹೊರುವ ತಾಲೀಮಿನ ಹಿಂದಿನ ಅನುಭವ ಹೊಂದಿರುವ ಪ್ರಶಾಂತ, ಮಾರ್ಗಮಧ್ಯೆ ಎಲ್ಲಿಯೂ ಭಯಪಡದೆ ಹಾಗೂ ದಣಿವಿನ ಲಕ್ಷಣ ತೋರದೆ ತಾಲೀಮು ಪೂರ್ಣಗೊಳಿಸುವ ಮೂಲಕ ಈ ಬಾರಿಯ ಜಂಬೂಸವಾರಿಯಲ್ಲಿ ಅಂಬಾರಿ ಹೊರುವ ಆನೆಯಾಗಲು ತಾನು ಸಮರ್ಥ ಎಂಬ ಆತ್ಮವಿಶ್ವಾಸ ಮೂಡಿಸಿತು.

ಪ್ರಶಾಂತ ಭಾರ ಹೊತ್ತು ಗಾಂಭೀರ್ಯದಿಂದ ಮುಂದೆ ಸಾಗುತ್ತಿದ್ದರೆ, ಅದರ ಹಿಂದೆ ಕಾವೇರಿ, ಲಕ್ಷ್ಮೀ, ರೂಪ, ಚೈತ್ರ, ಧನಂಜಯ, ಸುಗ್ರೀವ, ಶ್ರೀಕಂಠ, ಮಹೇಂದ್ರ, ಗೋಪಿ, ಏಕಲವ್ಯ ಹಾಗೂ ಶ್ರೀರಾಮ ಆನೆಗಳು ಹೆಜ್ಜೆ ಹಾಕಿ ಸಾಥ್ ನೀಡಿದವು. ಬನ್ನಿಮಂಟಪ ತಲುಪಿದ ಬಳಿಕ ಕೆಲಕಾಲ ವಿಶ್ರಾಂತಿ ಪಡೆದ ಗಜಪಡೆ, ಬಳಿಕ ಅರಮನೆ ಆವರಣಕ್ಕೆ ಮರಳಿತು.

ಪ್ರಶಾಂತನ ಭಾರ ಹೊರುವ ತಾಲೀಮನ್ನು ವೀಕ್ಷಿಸಲು ಸಾರ್ವಜನಿಕರು ಹಾಗೂ ಪ್ರವಾಸಿಗರು ಉತ್ಸಾಹದಿಂದ ಜಮಾಯಿಸಿದ್ದು, ಗಜಪಡೆಯ ತಾಲೀಮು ಗಮನ ಸೆಳೆಯಿತು.