ಬೈಕ್ ಹೆಲ್ಮೆಟ್ ವಿಚಾರ ಮಾತ್ರವಲ್ಲದೆ, ಇತರೆ ಸಂಚಾರ ನಿಯಮಗಳ ಉಲ್ಲಂಘನೆಗೂ ಸಾರಿಗೆ ಇಲಾಖೆ ಭಾರೀ ದಂಡದ ಅಸ್ತ್ರ ಪ್ರಯೋಗಿಸಿದೆ. ವಾಹನ ಚಾಲನೆ ಮಾಡುವಾಗ ಮೊಬೈಲ್ ಫೋನ್ ಬಳಸಿದರೆ 1,500 ರಿಂದ 5,000 ರೂ.ವರೆಗೆ, ಕಾರುಗಳಲ್ಲಿ ಸೀಟ್ ಬೆಲ್ಟ್ ಧರಿಸದೆ ನಿರ್ಲಕ್ಷ್ಯ ತೋರಿದರೆ 500 ರಿಂದ 1,000 ರೂ.ವರೆಗೆ ದಂಡ ಕಟ್ಟಬೇಕಾಗುತ್ತದೆ. ಇನ್ನು ಸಿಗ್ನಲ್ ಜಂಪ್ ಮಾಡುವವರಿಗೆ ಹಾಗೂ ತ್ರಿಪಲ್ ರೈಡಿಂಗ್ ಮಾಡುವವರಿಗೂ ಕೂಡ ಕನಿಷ್ಠ 500 ರೂ.ಗಳಿಂದ ಆರಂಭವಾಗಿ ಸಾವಿರಾರು ರೂಪಾಯಿಗಳ ದಂಡದ ವಸೂಲಾತಿಗೆ ಪೊಲೀಸರು ಟೊಂಕಕಟ್ಟಿ ನಿಂತಿದ್ದಾರೆ.
ರಸ್ತೆಗಳಲ್ಲಿ ಅತಿವೇಗವಾಗಿ ವಾಹನ ಚಲಾಯಿಸುವವರು ಹಾಗೂ ಮಾನ್ಯತೆಯುಳ್ಳ ವಿಮೆ (Insurance) ಇಲ್ಲದೆ ಸಂಚರಿಸುವವರ ವಿರುದ್ಧವೂ ಕಠಿಣ ಕ್ರಮ ಕೈಗೊಳ್ಳಲಾಗುತ್ತಿದ್ದು, ಇವರಿಗೆ 1,000 ರೂ.ಗಳಿಂದ 2,000 ರೂ.ವರೆಗೆ ದಂಡ ವಿಧಿಸಲಾಗುತ್ತದೆ. ಇನ್ನು ಕುಡಿದು ವಾಹನ ಚಾಲನೆ ಮಾಡುವ 'ಡ್ರಿಂಕ್ ಅಂಡ್ ಡ್ರೈವ್' ಮಹಾಪರಾಧಕ್ಕೆ ಮೊದಲ ಬಾರಿಗೆ ಬಿದ್ದರೆ ಬರೋಬ್ಬರಿ 10,000 ರೂ. ದಂಡ ಅಥವಾ ಆರು ತಿಂಗಳ ತನಕ ಜೈಲು ವಾಸದ ಗಂಭೀರ ಶಿಕ್ಷೆಯನ್ನು ಎದುರಿಸಬೇಕಾಗುತ್ತದೆ.
