ವಿಜಯವಾಣಿ ವಿಶೇಷ ಬೆಂಗಳೂರು: ಕೆಲವೇ ನಿಮಿಷಗಳಲ್ಲಿ ಸಾಲ ಕೊಡುವ ಡಿಜಿಟಲ್ ಆಪ್ಗಳು ಜನರ ಜೀವಕ್ಕೆ ಆಪತ್ತಾಗಿ ಪರಿಣಮಿಸಿವೆ! ಅಂದಾಜು 600 ಅನಧಿಕೃತ ಲೋನ್ ಆಪ್ಗಳನ್ನು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಗುರುತಿಸಿದೆ. ನಿಯಮ ಉಲ್ಲಂಘನೆ ಆರೋಪದಲ್ಲಿ ಗೂಗಲ್ ಪ್ಲೇಸ್ಟೋರ್ನಿಂದ 200ಕ್ಕೂ ಅಧಿಕ ಆಪ್ಗಳನ್ನು ತೆಗೆದು ಹಾಕಿದರೂ ಫೇಸ್ಬುಕ್, ಇನ್ಸ್ಟಾಗ್ರಾಂನಂತಹ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೆ ಸಕ್ರಿಯವಾಗಿದ್ದು, ಸಾಲದ ಆಪತ್ತಿನ ಬಗ್ಗೆ ಸೈಬರ್ ಪೊಲೀಸರು ಎಚ್ಚರಿಸಿದ್ದಾರೆ.
ಗೂಗಲ್ ಪ್ಲೇಸ್ಟೋರ್ನಲ್ಲಿ ನೂರಾರು ಸಾಲದ ಅಫ್ಲಿಕೇಷನ್ಗಳು ಬಳಕೆಯಲ್ಲಿವೆ. ಇದರಲ್ಲಿ ಬೆರಳೆಣಿಕೆಯಷ್ಟೇ ಆರ್ಬಿಐ ಅನುಮೋದಿತ ಆಪ್ಗಳಾಗಿದ್ದು, ಉಳಿದೆಲ್ಲವೂ ಅನಧಿಕೃತ. ಇಂತಹ ಆಪ್ಗಳ ಮೂಲಕ ಸಾಲ ಪಡೆಯುವುದು ಅಪಾಯಕಾರಿ. ಇಂತಹ ಬೇನಾಮಿ ಆಪ್ಗಳ ನಿರ್ವಾಹಕರು ಸಾಲಕ್ಕೆ ಹೆಚ್ಚಿನ ಬಡ್ಡಿದರ ವಿಧಿಸುವುದು, ಇಎಂಐ ಪಾವತಿಸದವರಿಗೆ ಕಿರುಕುಳ ನೀಡುವುದಷ್ಟೇ ಅಲ್ಲದೆ, ಬ್ಲಾ್ಯಕ್ವೆುೕಲ್ ಮಾಡುವ ನೂರಾರು ಪ್ರಕರಣಗಳು ನಿತ್ಯ ಬೆಳಕಿಗೆ ಬರುತ್ತಿವೆ. ಆಪ್ಗಳ ಸಾಲದ ಟಾರ್ಚರ್ ತಾಳಲಾರದೆ ಈಗಾಗಲೆ ಆತ್ಮಹತ್ಯೆ ಮಾಡಿಕೊಂಡಿರುವ ಹಲವಾರು ಪ್ರಕರಣಗಳು ವರದಿಯಾಗಿವೆ.
ಅಂದಾಜು 600 ಅನಧಿಕೃತ ಲೋನ್ ಆಪ್ಗಳಿರುವ ಬಗ್ಗೆ ಆರ್ಬಿಐ ಮಾಹಿತಿ ನೀಡಿದೆ. 2020 ಜ.1ರಿಂದ 2021ರ ಮಾ.31ರವರೆಗೆ ಕರ್ನಾಟಕ ಸೇರಿ 10 ರಾಜ್ಯಗಳಲ್ಲಿ 2,562 ದೂರುಗಳು ದಾಖಲಾಗಿವೆ. ಮಹಾರಾಷ್ಟ್ರ, ಕರ್ನಾಟಕ, ದೆಹಲಿ ಮತ್ತು ಹರಿಯಾಣ ರಾಜ್ಯಗಳಲ್ಲಿ ಲೋನ್ ಆಪ್ಗಳ ಟಾರ್ಚರ್ ಬಗ್ಗೆ ಹೆಚ್ಚು ದೂರುಗಳು ದಾಖಲಾಗಿದ್ದು, ಕರ್ನಾಟಕ ಸೇರಿ ಕೆಲವೆಡೆ ಸೈಬರ್ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ.
ಹತ್ತೇ ನಿಮಿಷದಲ್ಲಿ 1 ಲಕ್ಷ ರೂ. ಸಾಲ!: ಸ್ಮಾರ್ಟ್ಫೋನ್ ಹೊಂದಿದ್ದರೆ ಈ ಅನಧಿಕೃತ ಲೋನ್ ಆಪ್ಗಳ ಮೂಲಕ ಬರೀ 10 ನಿಮಿಷದಲ್ಲಿ 10 ಸಾವಿರ ರೂ.ನಿಂದ 1 ಲಕ್ಷ ರೂ.ವರೆಗೆ ಸಾಲ ಪಡೆಯಬಹುದು. ನಿಮ್ಮ ವೈಯಕ್ತಿಕ ವಿವರಗಳನ್ನು ನಮೂದಿಸುವುದು, ಪಾನ್ಕಾರ್ಡ್ ಸೇರಿ ಅವರು ಕೇಳುವ ದಾಖಲೆಗಳನ್ನು ಅಪ್ಲೋಡ್ ಮಾಡಿದರೆ ಸಾಕು, ಪರಿಶೀಲನೆ ಪೂರ್ಣಗೊಳಿಸಿ ನಿಮ್ಮ ಖಾತೆಗೆ ಸಾಲದ ಹಣ ವರ್ಗಾವಣೆ ಮಾಡುತ್ತಾರೆ.
6.17 ಕೋಟಿ ರೂ. ಜಪ್ತಿ ಮಾಡಿದ್ದ ಇಡಿ: ಸಾಲ ಮತ್ತು ಹೂಡಿಕೆಯ ಚೀನಾ ಆಪ್ ಕಂಪನಿಗಳ ಮತ್ತು ವಂಚಕರ ಬ್ಯಾಂಕ್ ಖಾತೆ ಮತ್ತು ವ್ಯಾಲೆಟ್ನಲ್ಲಿದ್ದ 6.17 ಕೋಟಿ ರೂ.ಗಳನ್ನು ಜಾರಿ ನಿರ್ದೇಶನಾಲಯ ಇತ್ತೀಚೆಗೆ ಜಪ್ತಿ ಮಾಡಿದೆ. ಸಾಲ ಕೊಟ್ಟು ದುಬಾರಿ ಬಡ್ಡಿ ವಸೂಲಿ ಹಾಗೂ ಹೂಡಿಕೆ ಆಪ್ಗಳ ವಿರುದ್ಧ ಬೆಂಗಳೂರಿನ ಮಹಾಲಕ್ಷ್ಮಿ ಲೇಔಟ್ ಮತ್ತು ಮಾರತ್ಹಳ್ಳಿ ಠಾಣೆಯಲ್ಲಿ ಎಫ್ಐಆರ್ ದಾಖಲಾಗಿವೆ. ಪೊಲೀಸರ ತನಿಖೆ ವೇಳೆ ಕೋಟ್ಯಂತರ ರೂ. ಅಕ್ರಮ ವಹಿವಾಟು ನಡೆದಿರುವುದು ಬೆಳಕಿಗೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಇ.ಡಿ ಪ್ರತ್ಯೇಕ ತನಿಖೆ ಕೈಗೊಂಡು ಹಣ ಜಪ್ತಿ ಮಾಡಿದ್ದು, ತನಿಖೆ ಮುಂದುವರಿದಿದೆ.
ನಕಲಿ ಆ್ಯಪ್ ಪತ್ತೆ ಹೇಗೆ?
- ಸಾಲ ಕೊಡುವ ಸಂಸ್ಥೆ ಆರ್ಬಿಐನಡಿ ನೋಂದಣಿ ಆಗಿದೆಯೇ ಎಂದು ಪರಿಶೀಲಿಸಿಕೊಳ್ಳಬೇಕು
- ಆಪ್ನ ರೇಟಿಂಗ್/ರಿವ್ಯೂ ನೋಡಿ. ಇತರರು ಹಂಚಿಕೊಂಡ ಅಭಿಪ್ರಾಯಗಳನ್ನು ಪರಿಶೀಲಿಸಿ
- ಮೊಬೈಲ್ನ ಗ್ಯಾಲರಿ ಹಾಗೂ ಕಾಂಟ್ಯಾಕ್ಟ್ ಲೀಸ್ಟ್ ಸಂಪರ್ಕಕ್ಕೆ ಅನುಮತಿ ಕೇಳಿದರೆ ಕೊಡಬೇಡಿ
- ಸಾಲ ಕೊಡುವ ಆಪ್ನ ವಿವರ ತಿಳಿದುಕೊಳ್ಳಿ. ವಿಳಾಸವನ್ನು ಪರಿಶೀಲಿಸಿಕೊಳ್ಳಿ
- ಜಿಎಸ್ಟಿ, ಪ್ರೊಸೆಸಿಂಗ್ ಶುಲ್ಕದ ಹೆಸರಲ್ಲಿ ಮುಂಚಿತವಾಗಿಯೇ ಶುಲ್ಕ ಪಡೆದರೆ ಎಚ್ಚರ ವಹಿಸಿ
ಟಾರ್ಚರ್ ಹೇಗೆ?
- ಕೇಳುವ ದಾಖಲೆ ಹಾಗೂ ವೈಯಕ್ತಿಕ ವಿವರ ಕೊಟ್ಟರೆ ಕೆಲವೇ ನಿಮಿಷದಲ್ಲಿ ಸಾಲ ಮಂಜೂರು.
- ಸಾಲ ಪಡೆದರೆ ಫೋನ್ಗಳಲ್ಲಿರುವ ಎಲ್ಲ ಕಾಂಟ್ಯಾಕ್ಟ್ಗಳು ಆಪ್ ಆಪರೇಟರ್ಗೆ ಸಿಗುತ್ತವೆ
- ಸಾಲಗಾರನು ಇಎಂಐ ಪಾವತಿಸಲು ಒಂದು ದಿನ ವಿಳಂಬವಾದರೂ ಕಿರುಕುಳ ಶುರುವಾಗುತ್ತೆ
- ಫೋನ್ ಕಾಂಟ್ಯಾಕ್ಟ್ ಲಿಸ್ಟ್ನ ಗ್ರೂಪ್ ಸೃಷ್ಟಿಸಿ ಸಾಲ ತೀರಿಸದ ವಂಚಕ ಎಂದು ಸಂದೇಶ ರವಾನೆ
- ಕಾಂಟ್ಯಾಕ್ಟ್ ಲೀಸ್ಟ್ನಿಂದ ನಂಬರ್ ಪಡೆದು, ಸಾಲ ಪಡೆದವರ ಫೋಟೋ ಅಂಟಿಸಿ ರವಾನೆ
- ಸಾಲ ಪಡೆದು ಮರುಪಾವತಿಸದ ಚೋರ್, ಫ್ರಾಡ್ ಎಂದು ಹೆಸರು ಕೊಟ್ಟು ಮಾನಹಾನಿ
- ಕಾಂಟ್ಯಾಕ್ಟ್ ಲೀಸ್ಟ್ನಲ್ಲಿದ್ದವರಿಗೆ ಕರೆ ಮಾಡಿ ನೀವು ಶ್ಯೂರಿಟಿಗೆ ಸಹಿ ಹಾಕಿದ್ದೀರೆಂದು ಕಿರುಕುಳ