ನವದೆಹಲಿ: ಗಣರಾಜ್ಯೋತ್ಸವ ದಿನಾಚರಣೆ ನಡೆದ ಬೆನ್ನಲ್ಲೇ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿಯವರ ಫೋಟೋವೊಂದು ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟೆ ವೈರಲ್ ಆಗಿತ್ತು.
ರಾಷ್ಟ್ರಧ್ವಜಕ್ಕೆ ರಾಹುಲ್ ಗಾಂಧಿಯವರು ತಮ್ಮ ಎಡಗೈನಲ್ಲಿ ಸೆಲ್ಯೂಟ್ ಮಾಡಿದ ಫೋಟೋ ಇದು. ಫೋಟೋ ನೋಡುತ್ತಲೇ ಅನೇಕರು ಟೀಕಿಸಿದ್ದರು.
ಝೀ ನ್ಯೂಸ್ ಗ್ಲೋಬಲ್ ಫ್ಯಾನ್ಸ್ ಎಂಬ ಫೇಸ್ಬುಕ್ ಪೇಜ್ನಲ್ಲಿ ರಾಹುಲ್ ಗಾಂಧಿಯವರು ಎಡಗೈನಲ್ಲಿ ಸೆಲ್ಯೂಟ್ ಮಾಡುತ್ತಿರುವ ಫೋಟೋವನ್ನು ಪೋಸ್ಟ್ ಮಾಡಿ, ಇಲ್ಲಿ ನೋಡಿ, ಇವರೊಬ್ಬ ಗ್ರೇಟ್ ಲೀಡರ್. ಯಾವ ಕೈಯಲ್ಲಿ ಸೆಲ್ಯೂಟ್ ಮಾಡಬೇಕು ಗೊತ್ತಿಲ್ಲ. ಇವರಿಗೆ ಪ್ರಧಾನ ಮಂತ್ರಿ ಆಗುವ ಆಸೆ ಬೇರೆ ಇದೆಯಂತೆ ಎಂದು ಕ್ಯಾಪ್ಷನ್ ಬರೆಯಲಾಗಿತ್ತು.
ಆದರೆ ಈ ಫೋಟೋದ ಸತ್ಯಾಸತ್ಯತೆ ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಂ ನಡೆಸಿದ ಫ್ಯಾಕ್ಟ್ಚೆಕ್ನಿಂದ ಬಯಲಾಗಿದೆ. ರಾಹುಲ್ ಗಾಂಧಿಯವರು ಎಡಗೈನಿಂದ ಸೆಲ್ಯೂಟ್ ಮಾಡಿಲ್ಲ. ಅದರ ಒರಿಜಿನಲ್ ಪೋಟೋ ಸುಮಾರು 9 ವರ್ಷ ಹಳೆಯದು ಎಂಬುದು ಬೆಳಕಿಗೆ ಬಂದಿದೆ.
ಈ ಫೋಟೋವನ್ನು ಫೇಸ್ಬುಕ್ನಲ್ಲಿ ಹಾಕುತ್ತಿದ್ದಂತೆ ಸುಮಾರು 600 ಬಾರಿ ಶೇರ್ ಆಗಿದೆ. ಆದರೆ ಅದೇ ಫೋಟೋವನ್ನು ರಿವರ್ಸ್ ಇಮೇಜ್ ಸರ್ಚ್ಗೆ ಹಾಕಿದಾಗ ಅದು 2011ರಲ್ಲಿಯೇ ಹಲವು ನ್ಯೂಸ್ ವೆಬ್ ಸೈಟ್ಗಳಲ್ಲಿ ಪ್ರಕಟವಾಗಿತ್ತು ಎಂಬುದು ಗೊತ್ತಾಗಿದೆ. ಇದೇ ಫೋಟೋ 2011ರ ಆಗಸ್ಟ್ 15ರಂದು ಎನ್ಡಿ ಟಿವಿ ಮತ್ತು ಝೀ ನ್ಯೂಸ್ ವೆಬ್ಸೈಟ್ಗಳಲ್ಲಿ ಪಬ್ಲಿಶ್ ಆಗಿದೆ. ಹಾಗೇ ಗೆಟ್ಟಿ ಇಮೇಜಸ್ನ ವೆಬ್ಸೈಟ್ನಲ್ಲೂ ಇದೇ ಫೋಟೋ ಇದೆ.
ಅಂದು ರಾಹುಲ್ ಗಾಂಧಿ ಎಐಸಿಸಿ ಅಧ್ಯಕ್ಷರಾಗಿದ್ದರು. ಫೋಟೋ ಕ್ಯಾಪ್ಷನ್ನಲ್ಲಿ ಕೂಡ ಅದನ್ನೇ ಉಲ್ಲೇಖಿಸಲಾಗಿದೆ. ಎಐಸಿಸಿ ಅಧ್ಯಕ್ಷ 65ನೇ ಸ್ವಾತಂತ್ರ್ಯ ದಿನಾಚರಣೆಯಲ್ಲಿ ಪಾಲ್ಗೊಂಡಿದ್ದರು ಎಂಬುದು ಸುದ್ದಿಯ ಸಾರಾಂಶ.
ಇನ್ನೊಂದು ಮುಖ್ಯವಿಷಯ ಏನೆಂದರೆ ರಾಹುಲ್ ಗಾಂಧಿ ಅಂದು ತಮ್ಮ ಬಲಗೈನಿಂದಲೇ ಧ್ವಜಕ್ಕೆ ಸೆಲ್ಯೂಟ್ ಮಾಡಿದ್ದರು. ಆದರೆ ಅದನ್ನು ಫೋಟೋಶಾಪ್ ಮೂಲಕ ಇನ್ವರ್ಟ್ ಮಾಡಿ ಎಡಿಟ್ ಮಾಡಲಾಗಿದೆ ಎಂದು ಫ್ಯಾಕ್ಟ್ ಚೆಕ್ನಿಂದ ಗೊತ್ತಾಗಿದೆ.(ಏಜೆನ್ಸೀಸ್)