ಬೆಂಗಳೂರು: ಇದುವರೆಗೂ ಹಲವು ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದ ‘ರಾಮ ರಾಮಾ ರೇ’ ಖ್ಯಾತಿಯ ಧರ್ಮಣ್ಣ ಈಗ ನಾಯಕನಾಗಿ ಬಡ್ತಿ ಪಡೆದಿದ್ದಾರೆ. ‘ರಾಜಯೋಗ’ ಎಂಬ ಚಿತ್ರಕ್ಕೆ ಸದ್ದಿಲ್ಲದೆ ಹೀರೋ ಆಗಿದ್ದಾರೆ. ಈಗಾಗಲೇ 10 ದಿನಗಳ ಚಿತ್ರೀಕರಣ ಮುಗಿದಿದ್ದು, ಇತ್ತೀಚೆಗೆ ಚಿತ್ರದ ಮೊದಲ ಪೋಸ್ಟರ್ ಬಿಡುಗಡೆಯಾಗಿದೆ.
ಇದನ್ನೂ ಓದಿ: ‘ಲಾಫಿಂಗ್ ಬುದ್ಧ’ನಾದ ಪ್ರಮೋದ್ ಶೆಟ್ಟಿ; ಚಿತ್ರೀಕರಣ ಶುರು
ಈ ಹಿಂದೆ ಕೆಲವು ಧಾರಾವಾಹಿಗಳಿಗೆ ಕೆಲಸ ಮಾಡಿ ಅನುಭವವಿರುವ ಲಿಂಗರಾಜ ಉಚ್ಚಂಗಿದುರ್ಗ ಈ ಚಿತ್ರಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ.
ಚಿತ್ರದ ಕುರಿತು ಮಾತನಾಡುವ ಅವರು, ‘ಪ್ರಾಮಾಣಿಕವಾಗಿ ಕೆಲಸ ಮಾಡಿದರೆ ಎಲ್ಲರಿಗೂ ಒಂದಲ್ಲ ಒಂದು ದಿನ ರಾಜಯೋಗ ಬಂದೇ ಬರುತ್ತದೆ ಎನ್ನುವುದೇ ಈ ಚಿತ್ರದ ಕಾನ್ಸೆಪ್ಟ್. ಗ್ರಾಮೀಣ ಭಾಗದಲ್ಲಿ ನಡೆಯುವ ಕಥೆ. ಧರ್ಮಣ್ಣ ಅವರನ್ನು ‘ರಾಮ ರಾಮ ರೇ’ ಚಿತ್ರದಲ್ಲಿ ನೋಡಿದ್ದೆ, ಅವರ ಪಾತ್ರ ಅಭಿನಯ ಇಷ್ಟವಾಗಿತ್ತು. ಈ ಚಿತ್ರದ ಮೂಲಕ ಅವರು ಹೀರೋ ಆಗುತ್ತಿದ್ದಾರೆ. ಇದು ತಂದೆ-ಮಗನ ಸುತ್ತ ನಡೆಯುವ ಕಥೆ. ಮೂಲ ನಕ್ಷತ್ರದಲ್ಲಿ ಹುಟ್ಟಿದ ಮಗನಿಂದ ದುರಾದೃಷ್ಟ ಬರುತ್ತದೆ ಎಂದು ತಂದೆ ನಂಬಿರುತ್ತಾನೆ. ಆ ಮಗನಿಂದ ಅವನಿಗೆ ಹೇಗೆ ರಾಜಯೋಗ ಬರುತ್ತದೆ ಎನ್ನುವುದು ಚಿತ್ರದ ಕಥೆ. ಜೋತಿಷ್ಯ ಸುಳ್ಳಲ್ಲ, ಅದನ್ನು ಕೆಲವರು ಹೇಗೆ ದುರುಪಯೋಗ ಮಾಡಿಕೊಳ್ಳುತ್ತಿದ್ದಾರೆ ಎಂಬುದನ್ನು ಈ ಚಿತ್ರದ ಮೂಲಕ ಹೇಳುವುದಕ್ಕೆ ಹೊರಟಿದ್ದೇವೆ. ಒಂದು ಗಂಭೀರ ವಿಷಯವನ್ನು ಹಾಸ್ಯದ ಮೂಲಕ ಹೇಳಲು ಪ್ರಯತ್ನ ಮಾಡಿದ್ದೆವೆ’ ಎನ್ನುತ್ತಾರೆ.
ಈ ಚಿತ್ರದಲ್ಲಿ ಕಾಮಿಡಿ, ಎಮೋಷನ್ ಎಲ್ಲವೂ ಇದ್ದು, ಈ ತರಹದ ಪಾತ್ರ ಮಾಡಿಲ್ಲ ಎನ್ನುತ್ತಾರೆ ಧರ್ಮಣ್ಣ. ‘ಗ್ರಾಮೀಣ ಭಾಗದಲ್ಲಿ ನಡೆಯೋ ಕಥೆಯನ್ನು ಲಿಂಗರಾಜು ಅವರು ಮಾಡಿಕೊಂಡಿದ್ದಾರೆ. ಇಲ್ಲಿ ಎಲ್ಲ ಪಾತ್ರಗಳಿಗೂ ಸಮಾನ ಅವಕಾಶವಿದೆ. ನನ್ನನ್ನು ನಂಬಿ ಇಂಥ ದೊಡ್ಡ ಪಾತ್ರವನ್ನು ಕೊಟ್ಟಿದ್ದಾರೆ’ ಎಂದು ಹೇಳಿದರು,
ಇದನ್ನೂ ಓದಿ: ಜಗದ ಪ್ರೇಕ್ಷಕರಿಗೆ ನಾಟಿತು ‘ನಾಟು ನಾಟು’; ಆಸ್ಕರ್ನಲ್ಲಿ ಎಲ್ರೂ ಎದ್ದು ನಿಂತು ಚಪ್ಪಾಳೆ ಹೊಡೆದ್ರು!
‘ರಾಜಯೋಗ’ದಲ್ಲಿ ಧರ್ಮಣ್ಣಗೆ ನಾಯಕಿಯಾಗಿ ನಿರೀಕ್ಷಾ ರಾವ್ ಎಂಬ ರಂಗಭೂಮಿಯ ನಟಿ ಇದ್ದಾರೆ. ಮಿಕ್ಕಂತೆ ನಾಗೇಂದ್ರ ಶಾನ್, ಕೃಷ್ಣಮೂರ್ತಿ ಕವತ್ತಾರ್, ಶ್ರೀನಿವಾಸಗೌಡ್ರು, ಉಷಾ ರವಿಶಂಕರ್, ಮಹಾಂತೇಶ ಹಿರೇಮಠ್ ಮುಂತಾದವರು ನಟಿಸುತ್ತಿದ್ದಾರೆ. ಈ ಹಿಂದೆ ‘ಕನ್ನಡ ಗೊತ್ತಿಲ್ಲ’ ಚಿತ್ರ ನಿರ್ಮಿಸಿದ್ದ ಕುಮಾರ ಕಂಠೀರವ ಚಿತ್ರ ನಿರ್ಮಿಸುತ್ತಿದ್ದು, ಅವರಿಗೆ ಐವರು ಸಾಥ್ ನೀಡಿದ್ದಾರೆ. ಅಕ್ಷಯ್ ರಿಷಭ್ ಸಂಗೀತ, ವಿಷ್ಣುಪ್ರಸಾದ್ ಛಾಯಾಗ್ರಹಣ ಮತ್ತು ಬಿ.ಎಸ್. ಕೆಂಪರಾಜು ಅವರ ಸಂಕಲನ ಈ ಚಿತ್ರಕ್ಕಿದೆ.