ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯ ವಿಧಾನಸಭಾ ಚುನಾವಣಾ ಕಣ ರಂಗೇರಿದ್ದು, ಬಿಜೆಪಿ ಮತ್ತು ಆಮ್ ಆದ್ಮಿ ಪಕ್ಷದ ನಡುವಿನ ಜಿದ್ದಾಜಿದ್ದಿಯ ಅಖಾಡವಾಗಿ ಮಾರ್ಪಾಡಾಗಿದೆ. ಮತದಾನಕ್ಕೆ ಇನ್ನು ಮೂರು ದಿನಗಳು ಬಾಕಿ ಇದ್ದು, ಚುನಾವಣಾ ಪ್ರಚಾರ ಭರಾಟೆ ಜೋರಾಗಿದೆ. ಆಪ್ನಿಂದ ನವದೆಹಲಿ ಕ್ಷೇತ್ರದ ಅಭ್ಯರ್ಥಿಯಾಗಿ ಕಣಕ್ಕಿಳಿದಿರುವ ಸಿಎಂ ಅರವಿಂದ್ ಕೇಜ್ರಿವಾಲ್ ತಮ್ಮ ಆಸ್ತಿ ಮೌಲ್ಯವನ್ನು ಘೋಷಿಸಿಕೊಂಡಿದ್ದಾರೆ.
ಚುನಾವಣಾ ಆಯೋಗಕ್ಕೆ ಸಲ್ಲಿಸಿರುವ ಅಫಿಡೆವಿಟ್ ಪ್ರಕಾರ ಕೇಜ್ರಿವಾಲ್ ಒಟ್ಟು 3.4 ಕೋಟಿ ರೂ. ಸ್ಥಿರಾಸ್ತಿ ಮತ್ತು ಚರಾಸ್ಥಿಯ ಆಸ್ತಿಯ ಒಡೆಯರಾಗಿರಾಗಿದ್ದು, ಕಳೆದ ಬಾರಿಗೆ ಹೋಲಿಸಿದರೆ 1.3 ಕೋಟಿ ರೂ. ಏರಿಕೆಯಾಗಿದೆ. 2015ರಲ್ಲಿ 2.1 ಕೋಟಿ ರೂ. ಆಸ್ತಿಯ ಮೌಲ್ಯವನ್ನು ಕೇಜ್ರಿವಾಲ್ ಘೋಷಿಸಿಕೊಂಡಿದ್ದರು.
ನಗದು ಮತ್ತು ಬಂಡವಾಳದಂತಹ ಚರಾಸ್ತಿಯ ಮೌಲ್ಯ 9.95 ಲಕ್ಷ ರೂ. ಆಗಿದ್ದು, ಪತ್ನಿ ಸುನಿತಾ ಅವರ ಚರಾಸ್ತಿ 12 ಲಕ್ಷ ರೂ. ಮೌಲ್ಯದ 320 ಗ್ರಾಂ ಚಿನ್ನ ಹಾಗೂ 40 ಸಾವಿರ ಮೌಲ್ಯದ 1 ಬೆಳ್ಳಿ ಒಳಗೊಂಡಂತೆ ಒಟ್ಟು 57.07 ಲಕ್ಷ ರೂ. ಇದೆ. 2015ರಲ್ಲಿ ಕೇಜ್ರಿವಾಲ್ ಅವರ ಚರಾಸ್ತಿ 2.26 ಲಕ್ಷ ರೂ. ಹಾಗೂ ಪತ್ನಿ ಸುನಿತಾ ಅವರ ಚರಾಸ್ತಿ 15.28 ಲಕ್ಷ ರೂ. ಇತ್ತು.
ವಿಶೇವೆಂದರೆ 2014-15ರಲ್ಲಿ 7.42 ಲಕ್ಷ ಇದ್ದ ಕೇಜ್ರಿವಾಲ್ ಅವರ ಆದಾಯವು 2018-19ರಲ್ಲಿ 2.81 ಲಕ್ಷಕ್ಕೆ ಕುಸಿದಿದೆ. ಅವರ ಪತ್ನಿ ಸುನಿತಾ ಅವರ ಆದಾಯದಲ್ಲೂ ಕುಸಿತ ಕಂಡಿದ್ದು, 2014-15ರಲ್ಲಿ 12.08 ಲಕ್ಷ ರೂ. ಇದ್ದ ಆದಾಯ 2018-19ರಲ್ಲಿ 9.94 ಲಕ್ಷ ರೂ.ಗೆ ಕುಸಿದಿದೆ. ವಿಶೇಷವೆಂದರೆ ಕೇಜ್ರಿವಾಲ್ ಅವರು ಈವರೆಗೂ ಸ್ವಂತ ಕಾರನ್ನೇ ಹೊಂದಿಲ್ಲ.
ಕಳೆದ ಬಾರಿ 92 ಲಕ್ಷ ರೂ. ಇದ್ದ ಕೇಜ್ರಿವಾಲ್ ಅವರ ಸ್ಥಿರಾಸ್ತಿಯು ಈ ಬಾರಿ 1.77ಕ್ಕೆ ಏರಿಕೆಯಾಗಿದೆ. ಆದರೆ, ಪತ್ನಿ ಸುನಿತಾ ಅವರ ಸ್ಥಿರಾಸ್ತಿಯಲ್ಲಿ ಯಾವುದೇ ಬದಲಾವಣೆ ಆಗದೇ 1 ಕೋಟಿ ರೂ.ನಲ್ಲಿ ನಿಂತಿದೆ. (ಏಜೆನ್ಸೀಸ್)