ನವದೆಹಲಿ: ಚೀನಾದ್ಯಂತ ಕೊರೊನಾ ವೈರಸ್ ಮರಣ ಮೃದಂಗ ಬಾರಿಸುತ್ತಿರುವ ಹಿನ್ನೆಲೆಯಲ್ಲಿ ವಿಶೇಷವಾಗಿ ಸಿದ್ಧಪಡಿಸಲಾದ ಏರ್ ಇಂಡಿಯಾ ಬೋಯಿಂಗ್ 747 ವಿಮಾನವು ಚೀನಾದಲ್ಲಿದ್ದ ಭಾರತೀಯರನ್ನು ಸ್ವದೇಶಕ್ಕೆ ಸುರಕ್ಷತಾ ದೃಷ್ಠಿಯಿಂದ ಕರೆತಂದಿದೆ.
ಮಾರಾಣಾಂತಿಕ ಕೊರೊನಾ ವೈರಸ್ ಈಗಾಗಲೇ 200ಕ್ಕೂ ಹೆಚ್ಚು ಮಂದಿಯನ್ನು ಬಲಿ ಪಡೆದುಕೊಂಡಿದ್ದು, ಮುನ್ನೆಚ್ಚರಿಕಾ ಕ್ರಮವಾಗಿ ಚೀನಾದಿಂದ 324 ಭಾರತೀಯರನ್ನು ಶನಿವಾರ ಬೆಳಗ್ಗೆ ಸ್ವದೇಶಕ್ಕೆ ಕರೆತರಲಾಗಿದೆ. ಗುರುವಾರ ವಿಮಾನವು ದೆಹಲಿಯ ರಾಮ್ ಮನೋಹರ್ ಲೋಹಿಯಾ ಆಸ್ಪತ್ರೆಯ ಐವರು ವೈದ್ಯರೊಂದಿಗೆ ಚೀನಾಗೆ ತೆರಳಿತ್ತು.
ಸೋಂಕಿತ ಪ್ರಯಾಣಿಕರಿಂದ ವಿಮಾನ ಸಿಬ್ಬಂದಿ, ಪೈಲಟ್ಗಳು ಮತ್ತು ಸಹ ಪ್ರಯಾಣಿಕರಿಗೆ ತೊಂದರೆಯಾಗಬಾರದು ಎಂಬ ಕಾರಣದಿಂದ ತೀವ್ರ ತಪಾಸಣೆ ನಡೆಸಿ ಕರೆತರಲಾಗಿದೆ. ಅಲ್ಲದೆ, ಇಂದು ಮತ್ತೊಂದು ವಿಮಾನ ಚೀನಾಗೆ ಹಾರಲಿದೆ.
ಚೀನಾದ ವುಹಾನ್ನಲ್ಲಿದ್ದ ಭಾರತೀಯರನ್ನು ಸುರಕ್ಷಿತವಾಗಿ ವಿಶೇಷ ವಿಮಾನದಲ್ಲಿ ಸ್ಥಳಾಂತರಿಸಲು ಅನುಕೂಲ ಮಾಡಿಕೊಟ್ಟ ಚೀನಾ ಸರ್ಕಾರಕ್ಕೆ ಭಾರತ ಸರ್ಕಾರ ಟ್ವೀಟ್ ಮೂಲಕ ಧನ್ಯವಾದಗಳನ್ನು ತಿಳಿಸಿದೆ.
ಕೊರೊನಾ ವೈರಸ್ ಹೆಚ್ಚಾಗಿ ದಾಳಿ ಮಾಡಿರುವ ಹುಬೇ ಪ್ರಾಂತ್ಯದಲ್ಲಿದ್ದ 324 ಭಾರತೀಯರನ್ನು ಹೊತ್ತ ಭಾರತದ ವಿಮಾನ ಇಂದು ಮುಂಜಾನೆಯೇ ವುಹಾನ್ನಿಂದ ಹೊರಟು ಭಾರತವನ್ನು ತಲುಪಿದೆ. ಪ್ರಯಾಣಿಕರಲ್ಲಿ ಅತಿಹೆಚ್ಚು ವಿದ್ಯಾರ್ಥಿಗಳೇ ಆಗಿದ್ದಾರೆ. (ಏಜೆನ್ಸೀಸ್)