ನವದೆಹಲಿ: ವಿಶ್ವಮಾರಿಯಾಗಿ ಅಬ್ಬರಿಸುತ್ತಿರುವ ಕರೊನಾ ಪಿಡುಗು ಸದ್ಯಕ್ಕೆ ಅಂತ್ಯಗೊಳ್ಳುವ ಯಾವುದೇ ಲಕ್ಷಣಗಳಿಲ್ಲ. ಇದನ್ನು ತಕ್ಷಣವೇ ನಿಯಂತ್ರಣ ತರಬೇಕೆಂದಾದರೆ, ವಿಶ್ವದ ಮೂರನೇ ಎರಡು ಭಾಗದಷ್ಟು ಜನರು ಸಂಪೂರ್ಣವಾಗಿ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿಕೊಳ್ಳಬೇಕಾಗುತ್ತದೆ ಎಂದು ಅಧ್ಯಯನ ವರದಿಯೊಂದು ತಿಳಿಸಿದೆ.
ಅಮೆರಿಕದ ಮಿನ್ನೆಸೊಟಾ ವಿಶ್ವವಿದ್ಯಾಲಯದ ಸೆಂಟರ್ ಫಾರ್ ಇನ್ಫೆಕ್ಸೀಯಸ್ ಡಿಸೀಸ್ ರಿಸರ್ಚ್ ಆ್ಯಂಡ್ ಪಾಲಿಸಿ ವಿಭಾಗದ ತಜ್ಞರು ಈ ಅಧ್ಯಯನ ಕೈಗೊಂಡಿದ್ದಾರೆ. ಸೋಂಕು ತಗುಲಿದ್ದರೂ ಅದರ ಲಕ್ಷಣಗಳು ಗೋಚರಿಸದವರಿಂದ ಈ ಸೋಂಕು ಹರಡುತ್ತದೆ. ಹಾಗಾಗಿ ಇನ್ಫ್ಲುಯೆನ್ಜಾ ರೀತಿಯಲ್ಲಿ ಇದನ್ನು ನಿಯಂತ್ರಿಸುವುದು ತುಂಬಾ ಕಷ್ಟವಾಗುತ್ತದೆ ಎಂದು ಹೇಳಿದ್ದಾರೆ.
ಈ ಸೋಂಕು ಹರಡದಂತೆ ತಡೆಯಲು ವಿಶ್ವದಾದ್ಯಂತ ದೇಶಕ್ಕೆ ದೇಶವನ್ನೇ ಲಾಕ್ಡೌನ್ ಮಾಡಲಾಗಿದೆ. ಈ ಸೋಂಕು ಸದ್ಯಕ್ಕೆ ನಿಯಂತ್ರಣಕ್ಕೆ ಬರುತ್ತಿರುವಂತೆ ತೋರುತ್ತಿದೆ. ಹಾಗಾಗಿ ಕೆಲವು ರಾಷ್ಟ್ರಗಳಲ್ಲಿ ಲಾಕ್ಡೌನ್ ಅನ್ನು ಸಡಿಲಿಸಿ, ಕೆಲವೊಂದು ಆರ್ಥಿಕ ಚಟುವಟಿಕೆ ಕೈಗೊಳ್ಳಲು ಅವಕಾಶ ಮಾಡಿಕೊಡಲಾಗುತ್ತಿದೆ.
ಆದರೂ ವಿಶ್ವದ ಮೂರನೇ ಎರಡು ಭಾಗದಷ್ಟು ಜನರು ಸಂಪೂರ್ಣ ರೋಗನಿರೋಧಕ ಶಕ್ತಿ ಹೆಚ್ಚಿಸಿಕೊಳ್ಳಬೇಕು. ಆಗಮಾತ್ರ ಇದನ್ನು ನಿಯಂತ್ರಿಸಲು ಸಾಧ್ಯ. ಇಲ್ಲವಾದರೆ ಈ ಪಿಡುಗು 2022ರ ನಂತರವೂ ಮುಂದುವರಿದು, ಜನರನ್ನು ಬಿಟ್ಟುಬಿಡದಂತೆ ಕಾಡುವುದು ನಿಶ್ಚಿತ ಎಂದು ಎಚ್ಚರಿಕೆ ನೀಡಿದ್ದಾರೆ.
ಮದುವೆಗೆ ಪೊಲೀಸರು ಕೊಡಲಿಲ್ಲ ಪರ್ಮಿಷನ್, ಮದುಮಗ ಬಿಟ್ಟಾನೆಯೇ? ಸೈಕಲ್ ಏರಿಯೇ ಬಿಟ್ಟ… ಮುಂದೇನಾಯ್ತು?