ನವದೆಹಲಿ: ಜಾಗತಿಕ ಆರ್ಥಿಕತೆ ಮೇಲೆ ಕರಿನೆರಳು ಬೀರಿರುವ ಮಾರಕ ಕೊರೊನಾ ವೈರಸ್, ಇತ್ತೀಚಿನ ದಿನಗಳಲ್ಲಿ ಜಾಗತಿಕ ಷೇರುಮಾರುಕಟ್ಟೆಯ ಮೇಲೆ ಭಾರಿ ಪ್ರಭಾವ ಬೀರಿರುವುದರಿಂದ ವಿಶ್ವದ ಶ್ರೀಮಂತ ವ್ಯಕ್ತಿಗಳ ಆದಾಯವನ್ನು ಹೀರಿ ಕೊಂಡಿದೆ.
ಒಟ್ಟಾರೆ ವಿಶ್ವದ 500 ಶ್ರೀಮಂತ ವ್ಯಕ್ತಿಗಳ ನಿವ್ವಳ ಮೌಲ್ಯ 44,400 ಕೋಟಿ ಡಾಲರ್ (32,04,570 ಕೋಟಿ ರೂಪಾಯಿ) ನಷ್ಟು ಕುಸಿದಿದೆ. ಅದರಲ್ಲೂ ಜಾಗತಿಕ ಮಟ್ಟದ ಮೂವರು ಅತ್ಯಂತ ಶ್ರೀಮಂತ ವ್ಯಕ್ತಿಗಳಾದ ಅಮೆಜಾನ್ ಸಿಇಒ ಜೆಫ್ ಬೆಜೋಸ್, ಮೈಕ್ರೋಸಾಫ್ಟ್ ಸಹ ಸಂಸ್ಥಾಪಕ ಬಿಲ್ಗೇಟ್ಸ್ ಮತ್ತು ಫ್ರಂಚ್ ಬಿಲಿಯನೇರ್ ಬರ್ನಾರ್ಡ್ ಅರ್ನಾಲ್ಟ್ ಉಳಿದವರಿಗಿಂತ ಹೆಚ್ಚಿನ ಆದಾಯವನ್ನು ಕಳೆದುಕೊಂಡಿದ್ದಾರೆ. ಮೂವರು ಒಟ್ಟು ನಿವ್ವಳ ಮೌಲ್ಯ 30 ಬಿಲಿಯನ್ ಡಾಲರ್ ಕುಸಿದಿದೆ.
ಕೊರೊನಾ ವೈರಸ್ ಬಗ್ಗೆ ಶುಕ್ರವಾರವಷ್ಟೇ ನ್ಯೂ ಇಂಗ್ಲೆಂಡ್ ಜರ್ನಲ್ ಆಫ್ ಮೆಡಿಸಿನ್ಗೆ ಬಿಲ್ ಗೇಟ್ಸ್ ಪತ್ರವೊಂದನ್ನು ಬರೆದು ಎಚ್ಚರಿಸಿದ್ದರು. ಈ ಮಾರಕ ಸೋಂಕು 1957ರಲ್ಲಿ ಸಾಕಷ್ಟು ಮಂದಿಯನ್ನು ಬಲಿ ತೆಗೆದುಕೊಂಡಿದ್ದ ಸಾಂಕ್ರಮಿಕ ರೋಗವನ್ನು ಮೀರಿಸುವ ಸಂಭವವಿದೆ ಎಂದಿದ್ದಾರೆ. 1957ರಲ್ಲಿ ಸುಮಾರು 20 ಲಕ್ಷ ಮಂದಿ ಜಗತ್ತಿನಾದ್ಯಂತ ಸಾಂಕ್ರಮಿಕ ರೋಗದಿಂದ ಸಾವಿಗೀಡಾಗಿದ್ದರು. ಅದಕ್ಕೆ ವಿಶ್ವ ಆರೋಗ್ಯ ಸಂಸ್ಥೆ ಏಷಿಯನ್ ಫ್ಲ್ಯೂ ಎಂದು ಹೆಸರಿಟ್ಟಿತ್ತು.
25ನೇ ಶ್ರೀಮಂತ ವ್ಯಕ್ತಿಯಾಗಿರುವ ಎಲಾನ್ ಮಸ್ಕ್ ಅವರು ನಾಲ್ಕನೇ ಅತ್ಯಧಿಕ ನಷ್ಟವನ್ನು ಹೊಂದಿದ್ದು, 9 ಬಿಲಿಯನ್ ಡಾಲರ್ ನಿವ್ವಳ ಮೌಲ್ಯ ಕುಸಿದಿದೆ. ಅಂದಹಾಗೆ ಮಸ್ಕ್ಎಲೆಕ್ಟ್ರಿಕ್ ಕಾರು ಕಂಪನಿಯ “ತೆಸ್ಲಾ”ದ ಸಿಇಒ.
ಕಳೆದ ಐದು ದಿನಗಳಲ್ಲೇ 30 ಬೃಹತ್ ಕಂಪನಿಗಳ ಷೇರು, ಡಾವ್ ಜಾನ್ಸ್ ಇಂಡಸ್ಟ್ರಿಯಲ್ ಅವರೇಜ್ ಸೂಚ್ಯಂಕ ಪಟ್ಟಿಯ ಪ್ರಕಾರ ಶೇ 12ಕ್ಕಿಂತ ಹೆಚ್ಚು ಕುಸಿದಿದೆ. ಇದು 2008ರ ಆರ್ಥಿಕ ಬಿಕ್ಕಟ್ಟಿನ ಬಳಿಕ ಕಂಡುಬಂದ ಅತ್ಯಂತ ಹೆಚ್ಚು ಕುಸಿತ ಎನ್ನಲಾಗಿದೆ. ವರ್ಷದ ಆರಂಭದಿಂದ ವಿಶ್ವದ 500 ಶ್ರೀಮಂತರು ಸುಮಾರು 78 ಬಿಲಿಯನ್ ಡಾಲರ್ ಆದಾಯವನ್ನು ತಮ್ಮ ಖಜಾನೆಗೆ ಸೇರಿಸಿಕೊಂಡಿದ್ದರು. ಅಷ್ಟೂ ಆದಾಯ ಕೇವಲ ಐದೇ ದಿನದಲ್ಲಿ ಅಳಿಸಿ ಹೋಗಿದೆ.
ಬೆರ್ಕ್ಶೈರ್ ಹ್ಯಾಥ್ವೇ ಸಿಇಒ ವ್ಯಾರೆನ್ ಬಫೆಟ್ ನಿವ್ವಳ ಮೌಲ್ಯ 8 ಬಿಲಿಯನ್ ಡಾಲರ್ ಕುಸಿದರೆ,. ಸ್ಪ್ಯಾನೀಶ್ ಬಿಲಿಯನೇರ್ ಅಮ್ಯಾನ್ಶಿಯೋ ಒರ್ಟೇಗಾ ನಿವ್ವಳ ಮೌಲ್ಯ 6.8 ಬಿಲಿಯನ್ ಡಾಲರ್ ಕುಗ್ಗಿದೆ. ಫೇಸ್ಬುಕ್ ಸಿಇಒ ಮಾರ್ಕ್ ಜುಕರ್ಬರ್ಗ್ ಹಾಗೂ ಸಹ ಪಾಲುದಾರ ಸರ್ಗೆ ಬ್ರಿನ್ ನಿವ್ವಳ ಮೌಲ್ಯ ಕ್ರಮವಾಗಿ 6.4 ಮತ್ತು 6.2 ಬಿಲಿಯನ್ ಡಾಲರ್ ಕುಸಿದಿದೆ. (ಏಜೆನ್ಸೀಸ್)