ಪುಣೆ: ‘ಕರೊನಾ ಲಸಿಕೆ ಯಾವಾಗ ಸಿಗುತ್ತದೆ?’, ಪ್ರಸ್ತುತ ಜಗತ್ತಿನ ಬಹುತೇಕ ಎಲ್ಲರ ಪ್ರಶ್ನೆಯೂ ಇದೇ. ಕಳೆದ ಕೆಲವು ತಿಂಗಳುಗಳಿಂದ ಬಹಳಷ್ಟು ಮಂದಿ ಕರೊನಾ ಲಸಿಕೆಯ ಶುಭಸುದ್ದಿಯ ನಿರೀಕ್ಷೆಯಲ್ಲೇ ಇದ್ದಾರೆ. ಈ ನಡುವೆಯೇ ಆ ಕುರಿತ ಭರವಸೆಯೊಂದು ಹೊರಬಿದ್ದಿದೆ.
ಪುಣೆಯಲ್ಲಿರುವ ಸೀರಂ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾ (ಎಸ್ಐಐ) ಕರೊನಾ ಲಸಿಕೆಯನ್ನು ಉತ್ಪಾದಿಸುವ ಪ್ರಕ್ರಿಯೆಯಲ್ಲಿದೆ ಎಂಬ ಮಾಹಿತಿ ಬಹಿರಂಗಗೊಂಡಿದೆ. ಎನ್ಸಿಪಿ ಅಧ್ಯಕ್ಷ ಶರದ್ ಪವಾರ್ ರೋಗನಿರೋಧಕ ಶಕ್ತಿ ಹೆಚ್ಚಿಸಿಕೊಳ್ಳಲು ಬಿಸಿಜಿ ಲಸಿಕೆ ಪಡೆಯಲು ಎಸ್ಐಐಗೆ ಭೇಟಿ ಕೊಟ್ಟ ಬಳಿಕ, 2021ರ ಜನವರಿಯಲ್ಲಿ ಕರೊನಾ ಲಸಿಕೆ ಲಭ್ಯವಾಗಲಿದೆ ಎಂಬ ವಿಷಯ ಹೊರಗೆಡಹಿದ್ದಾರೆ.
ಆಗಸ್ಟ್ ಬಳಿಕ ಪವಾರ್ ಇಲ್ಲಿಗೆ ಎರಡನೇ ಸಲ ಭೇಟಿ ಕೊಟ್ಟಿದ್ದು, ಕರೊನಾ ಲಸಿಕೆ ತಯಾರಿ ಕುರಿತು ಕುತೂಹಲ ಮೂಡಿದೆ. ಎಸ್ಐಐ ಚೇರ್ಮನ್ ಡಾ. ಸಿರಸ್ ಎಸ್. ಪೂನಾವಾಲಾ ಮತ್ತು ಅವರ ಪುತ್ರ, ಸಂಸ್ಥೆಯ ಸಿಇಒ ಅಡರ್ ಪೂನಾವಾಲಾ ಅವರು ಪವಾರ್ ಜತೆ ಉತ್ತಮ ಸಂಬಂಧ ಹೊಂದಿರುವುದರಿಂದ ಪವಾರ್ ಅವರ ಹೇಳಿಕೆ ಭರವಸೆ ಮೂಡಿಸಿದೆ. (ಏಜೆನ್ಸೀಸ್)