ಬಾಲಿವುಡ್​ನಲ್ಲಿ ಹಿಂದೂಫೋಬಿಯಾ ಇದೆ... ಭಾರಿ ಸಂಚಲನ ಸೃಷ್ಟಿಸಿದ ನಿರ್ಮಾಪಕಿ ಏಕ್ತಾ ಕಪೂರ್ ಹೇಳಿಕೆ! Hinduphobia

ಮುಂಬೈ: ಹಿಂದಿ ಚಿತ್ರರಂಗದಲ್ಲಿರುವ ಹಿಂದೂ ಸಂಸ್ಕೃತಿ ಮತ್ತು ನಂಬಿಕೆಗಳ ಮೇಲಿನ ತಾರತಮ್ಯ ಹಾಗೂ 'ಹಿಂದೂಫೋಬಿಯಾ' ( Hinduphobia ) ಕುರಿತು ಖ್ಯಾತ ಬಾಲಿವುಡ್​ ನಿರ್ಮಾಪಕಿ ಏಕ್ತಾ ಕಪೂರ್ ನೀಡಿರುವ ಸ್ಫೋಟಕ ಹೇಳಿಕೆಗಳು ಈಗ ಚಿತ್ರರಂಗದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿವೆ.

ಬಾಲಿವುಡ್ ಚಿತ್ರರಂಗದಲ್ಲಿ ಭಾರತೀಯ ಸಂಸ್ಕೃತಿ, ಆಚಾರ-ವಿಚಾರಗಳು ಹಾಗೂ ಹಿಂದೂ ಧರ್ಮದ ಆಚರಣೆಗಳನ್ನು ಕಡೆಗಣಿಸುವ ಮತ್ತು ವಿರೋಧಿಸುವ ಧೋರಣೆ ಇದೆ ಎಂದು ಖ್ಯಾತ ನಿರ್ಮಾಪಕಿ ಏಕ್ತಾ ಕಪೂರ್ ಬಹಿರಂಗವಾಗಿ ಅಸಮಾಧಾನ ಹೊರಹಾಕಿದ್ದಾರೆ.

ಇತ್ತೀಚೆಗೆ ರಣವೀರ್ ಅಲ್ಲಾಬಾಡಿಯಾ ಅವರ ಪಾಡ್‌ಕಾಸ್ಟ್‌ನಲ್ಲಿ ಭಾಗವಹಿಸಿದ್ದ ಏಕ್ತಾ ಕಪೂರ್, ತಮ್ಮ ಬಾಲ್ಯ ಮತ್ತು ವೃತ್ತಿಜೀವನದಲ್ಲಿ ತಾವು ಧಾರ್ಮಿಕ ನಂಬಿಕೆಗಳನ್ನು ಬಹಿರಂಗವಾಗಿ ಪಾಲಿಸಿದ್ದಕ್ಕಾಗಿ ಎದುರಿಸಿದ ಅವಮಾನ ಹಾಗೂ ತಾರತಮ್ಯದ ಕಹಿ ಅನುಭವಗಳನ್ನು ಹಂಚಿಕೊಂಡಿದ್ದಾರೆ. ಪಾಶ್ಚಿಮಾತ್ಯ ಸಂಸ್ಕೃತಿಯನ್ನು ಮುಕ್ತವಾಗಿ ಸ್ವಾಗತಿಸುವ ಬಾಲಿವುಡ್, ಸ್ವದೇಶಿ ಸಂಪ್ರದಾಯಗಳನ್ನು ಅನುಸರಿಸುವವರನ್ನು ವಿಭಿನ್ನವಾಗಿ ನೋಡುವುದು ದುಃಖಕರ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ತಮ್ಮ ಬಾಲ್ಯದ ದಿನಗಳನ್ನು ಸ್ಮರಿಸಿಕೊಂಡ ಏಕ್ತಾ ಕಪೂರ್, ಹಣೆಯ ಮೇಲೆ ತಿಲಕವಿಟ್ಟುಕೊಂಡು ಮತ್ತು ಕೈಯಲ್ಲಿ ರಕ್ಷಾಬಂಧನ ಧರಿಸಿ ಹೊರಗೆ ಹೋದಾಗ ಜನರು ತಮ್ಮನ್ನು ವಿಚಿತ್ರ ಪ್ರಾಣಿಯಂತೆ ನೋಡುತ್ತಿದ್ದರು ಎಂದು ಗಂಭೀರ ಆರೋಪ ಮಾಡಿದ್ದಾರೆ. ನಮ್ಮ ಸಂಸ್ಕೃತಿಯ ಪ್ರಕಾರ ತಿಲಕ ಇಟ್ಟುಕೊಳ್ಳುವುದು ಹೇಗೆ ವಿಚಿತ್ರವಾಗುತ್ತದೆ? ಎಂದು ತಾವು ಆಗ ಪ್ರಶ್ನಿಸುತ್ತಿದ್ದೆವು ಎಂದು ತಿಳಿಸಿದ್ದಾರೆ. ಅಲ್ಲದೆ, ದೇವಸ್ಥಾನಕ್ಕೆ ಹೋಗಿ ನೇರವಾಗಿ ಕ್ಲಬ್‌ಗೆ ಹೋದಾಗ ಅಲ್ಲಿನ ಜನರು ತಾವು ದೇವಸ್ಥಾನಕ್ಕೆ ಹೋಗಿ ಬಂದಿರುವುದನ್ನು ಕಂಡು ಅಚ್ಚರಿ ವ್ಯಕ್ತಪಡಿಸುತ್ತಿದ್ದರು ಎಂಬುದನ್ನು ನೆನಪಿಸಿಕೊಂಡು, ಅಂತಹ ಮನಸ್ಥಿತಿಗಳ ಬಗ್ಗೆ ಆಘಾತ ವ್ಯಕ್ತಪಡಿಸಿದ್ದಾರೆ.

ಪಾಶ್ಚಿಮಾತ್ಯ ಅನಿಮೇಷನ್, ಫ್ಯಾಂಟಸಿ ಮತ್ತು ವಿದೇಶಿ ಸಂಸ್ಕೃತಿಗಳನ್ನು ಬಾಲಿವುಡ್‌ನಲ್ಲಿ ಯಾವುದೇ ಹಿಂಜರಿಕೆಯಿಲ್ಲದೆ ಮುಕ್ತವಾಗಿ ಸ್ವೀಕರಿಸಲಾಗುತ್ತದೆ ಮತ್ತು ಅಪ್ಪಿಕೊಳ್ಳಲಾಗುತ್ತದೆ. ಆದರೆ, ಭಾರತೀಯ ಜಾನಪದ ಕಥೆಗಳು, ಪುರಾಣಗಳು ಅಥವಾ ಸಾಂಪ್ರದಾಯಿಕ ವಿಷಯಗಳನ್ನು ಪ್ರಸ್ತಾಪಿಸಿದಾಗ ಮಾತ್ರ ಚಿತ್ರರಂಗದ ಕೆಲವರ ಧೋರಣೆ ಮತ್ತು ವರ್ತನೆ ಸಂಪೂರ್ಣವಾಗಿ ಬದಲಾಗುತ್ತದೆ ಎಂದು ಏಕ್ತಾ ಕಪೂರ್ ಅಳಲು ತೋಡಿಕೊಂಡಿದ್ದಾರೆ. ಇದು ನಮ್ಮದೇ ನೆಲದ ಸಂಸ್ಕೃತಿಗೆ ಎಸಗುತ್ತಿರುವ ದೊಡ್ಡ ಅನ್ಯಾಯ ಎಂಬ ಭಾವನೆ ಮೂಡಿಸುತ್ತದೆ.

ಏಕ್ತಾ ಕಪೂರ್ ಅವರ ಈ ಬಹಿರಂಗ ಮಾತುಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತು ಚಲನಚಿತ್ರ ವಲಯದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿವೆ. ಬಾಲಿವುಡ್‌ನಲ್ಲಿ ದಶಕಗಳಿಂದ ಬೇರೂರಿರುವ ದ್ವಂದ್ವ ನೀತಿ ಮತ್ತು ಸಾಂಸ್ಕೃತಿಕ ಅಸಹಿಷ್ಣುತೆಯ ಬಗ್ಗೆ ಅನೇಕರು ಧ್ವನಿ ಎತ್ತುತ್ತಿದ್ದು, ಈ ಕುರಿತು ಪರ-ವಿರೋಧ ಚರ್ಚೆಗಳು ಜೋರಾಗಿ ನಡೆಯುತ್ತಿವೆ.

ಭಾರತೀಯ ಸಂಪ್ರದಾಯಗಳನ್ನು ಗೌರವಿಸುವವರ ಮೇಲೆ ಹೇರಲಾಗುವ ಈ ಮಾನಸಿಕ ಅಘಾತಗಳು ಮತ್ತು ತಾರತಮ್ಯದ ಧೋರಣೆಗಳು ಬದಲಾಗಬೇಕಾದ ಅಗತ್ಯವಿದೆ ಎಂಬುದನ್ನು ಈ ಘಟನೆ ಮತ್ತೊಮ್ಮೆ ಮುನ್ನೆಲೆಗೆ ತಂದಿದೆ, (ಏಜೆನ್ಸೀಸ್​).