ಅಂಬಾನಿ ಮನೆ ಗಣೇಶೋತ್ಸವಕ್ಕೆ ಕೆಂಪು ಲೆಹಂಗಾದಲ್ಲಿ ದಿಶಾ ಪಟಾನಿ; ಡೀಪ್‌ಕಟ್ ಬ್ಲೌಸ್‌ಗೆ ನೆಟ್ಟಿಗರು ಗರಂ! Disha Patani

ಮುಂಬೈ:  ಹಬ್ಬ ಹರಿದಿನ ಬಂದರೆ ಸಾಕು, ಸೆಲೆಬ್ರಿಟಿಗಳು ಧರಿಸುವ ಬಟ್ಟೆಗಳು ಸೋಷಿಯಲ್ ಮೀಡಿಯಾದಲ್ಲಿ ಚರ್ಚೆಯಾಗೋದು ಮಾಮೂಲಿ. ಅದರಲ್ಲೂ ಮುಂಬೈನ ಅಂಬಾನಿ ಮನೆಯಲ್ಲಿ ನಡೆದ ಗಣೇಶ ಚತುರ್ಥಿ ಆಚರಣೆಯಂತೂ ಇಡೀ ದೇಶದ ಕಣ್ಣು ಕುಕ್ಕುವಂತದ್ದು. 

ದೇಶದ ದೊಡ್ಡ ದೊಡ್ಡ ದಿಗ್ಗಜರು, ಬಾಲಿವುಡ್ ಸ್ಟಾರ್‌ಗಳು ಇಲ್ಲಿಗೆ ಸಾಂಪ್ರದಾಯಿಕ ಉಡುಪಿನಲ್ಲಿ ಬಂದು ಹಬ್ಬದ ಕಳೆ ಹೆಚ್ಚಿಸ್ತಾರೆ. ಆದ್ರೆ ಈ ರಂಗಿನ ಸಮಾರಂಭದಲ್ಲಿ ಬಾಲಿವುಡ್ ಹಾಟ್ ಬ್ಯೂಟಿ ದಿಶಾ ಪಟಾನಿ (Disha Patani) ಧರಿಸಿದ್ದ ಕೆಂಪು ಬಣ್ಣದ ಲೆಹಂಗಾ ಈಗ ದೊಡ್ಡ ಮಟ್ಟದ ಟ್ರೋಲ್‌ಗೆ ಕಾರಣವಾಗಿದೆ. ಹಬ್ಬದ ವಾತಾವರಣಕ್ಕೆ ತಕ್ಕಂತೆ ಬಟ್ಟೆ ಹಾಕಿಲ್ಲ ಅಂತ ನೆಟ್ಟಿಗರು ನಟಿಯ ವಿರುದ್ಧ ರೊಚ್ಚಿಗೆದ್ದಿದ್ದಾರೆ. 

ಅಂಬಾನಿ ಮನೆ ಗಣೇಶ ದರ್ಶನಕ್ಕೆ ದಿಶಾ ಪಟಾನಿ ಅಂದವಾದ, ಕಸೂತಿ ಕೆಲಸವಿರುವ ಕೆಂಪು ಘಾಗ್ರಾ (ಲೆಹಂಗಾ) ಧರಿಸಿ ಬಂದಿದ್ದರು. ಜೊತೆಗೆ ಒಂದು ಭುಜದ ಮೇಲೆ ಕೆಂಪು ದುಪಟ್ಟಾ ಹಾಕಿಕೊಂಡು, ಕ್ಯಾಮೆರಾಗಳಿಗೆ ಪೋಸ್ ಕೊಟ್ಟಿದ್ದಾರೆ. 

ನಟಿಯ ಫೋಟೋಗಳು ಹೊರಬೀಳುತ್ತಿದ್ದಂತೆಯೇ ಇನ್‌ಸ್ಟಾಗ್ರಾಮ್ ಮತ್ತು ಎಕ್ಸ್ (ಟ್ವಿಟರ್) ವೇದಿಕೆಗಳಲ್ಲಿ ಟ್ರೋಲಿಗರು ತಮ್ಮ  ಕೆಲಸವನ್ನು ಶುರು ಮಾಡಿದ್ದಾರೆ.

ಒಬ್ಬರು ಕಮೆಂಟ್ ಮಾಡಿ, ಎಲ್ಲರೂ ಸಭ್ಯವಾದ ಸಾಂಪ್ರದಾಯಿಕ ಉಡುಪುಗಳನ್ನು ಧರಿಸಿದ್ದಾರೆ, ಆದರೆ ಇವರು ಮಾತ್ರ ಎಂದಿಗೂ ದೇಹವನ್ನು ಪೂರ್ಣವಾಗಿ ಮುಚ್ಚುವ ಬಟ್ಟೆ ಹಾಕಿಕೊಳ್ಳೋದೇ ಇಲ್ಲ ಎಂದಿದ್ದಾರೆ. ಯಾವುದೇ ಹಬ್ಬವಿರಲಿ, ಇವರಿಗೆ ಮಾತ್ರ ಒಂದೇ ರೀತಿಯ ಬ್ಲೌಸ್ ಡಿಸೈನ್ ಸಾಕು ಎಂದು ಮತ್ತೊಬ್ಬರು ವ್ಯಂಗ್ಯವಾಡಿದ್ದಾರೆ.

ಇದೇ ಸಂದರ್ಭದಲ್ಲಿ ನೆಟ್ಟಿಗರು ಇತ್ತೀಚೆಗಷ್ಟೇ ನಟಿ ಕೃತಿ ಸನೋನ್ (Kriti Sanon) ಎದುರಿಸಿದ ವಿವಾದವನ್ನೂ ಕೂಡ  ನೆನಪಿಸಿಕೊಂಡಿದ್ದಾರೆ. ಕಳೆದ ಆಗಸ್ಟ್ 2026 ರಲ್ಲಿ ಪ್ರಸಿದ್ಧ ಜ್ಯುವೆಲ್ಲರಿ ಬ್ರ್ಯಾಂಡ್ 'GIVA' ಗಾಗಿ ಕೃತಿ ಸನೋನ್ ರಕ್ಷಾಬಂಧನ ಜಾಹೀರಾತಿನಲ್ಲಿ ನಟಿಸಿದ್ದರು. ಆ ಜಾಹೀರಾತಿನಲ್ಲಿ ಕೃತಿ ಧರಿಸಿದ್ದ ಬಟ್ಟೆ ವಿವಾದಕ್ಕೆ ಕಾರಣವಾಗಿತ್ತು. 

ಹಬ್ಬದ ವಾತಾವರಣದಲ್ಲಿ ಇಂಥಾ ಬಟ್ಟೆ ಧರಿಸುವುದು ಸರಿಯಲ್ಲ ಎಂದು ಕಂಗನಾ ರಣಾವತ್​ ಸೇರಿದಂತೆ ಹಲವರು ತೀವ್ರ ವಿರೋಧ ವ್ಯಕ್ತಪಡಿಸಿದ್ದರು. ಆ ಸಮಯದಲ್ಲಿ ಕೃತಿ ಸನೋನ್, ಸಂಸ್ಕೃತಿ ಎನ್ನುವುದು ಬಟ್ಟೆಯ ಕತ್ತಿನ ವಿನ್ಯಾಸದಲ್ಲಲ್ಲ, ನಮ್ಮ  ಭಾವನೆಗಳಲ್ಲಿದೆ ಎಂದು ತಮ್ಮನ್ನು ಸಮರ್ಥಿಸಿಕೊಂಡಿದ್ದರು.