ನವದೆಹಲಿ: ಭಾರತದ ಸೈಬರ್ ಭದ್ರತಾ ವ್ಯವಸ್ಥೆಯ ಪಾಲಿಗೆ ಚೀನಾ, ಪಾಕಿಸ್ತಾನ ಸೇರಿ ಹಲವು ದೇಶಗಳು ಕಂಟಕವಾಗಿವೆ.
ಕಳೆದ ಐದು ವರ್ಷಗಳಲ್ಲಿ 1 ಲಕ್ಷಕ್ಕೂ ಅಧಿಕ ವೆಬ್ಸೈಟ್ಗಳು ಹ್ಯಾಕ್ ಆಗಿದ್ದು, ಬಹುತೇಕ ಪ್ರಕರಣಗಳ ಹಿಂದೆ ಚೀನಾ ಮತ್ತು ಪಾಕಿಸ್ತಾನಗಳು ಇರುವುದು ಪತ್ತೆಯಾಗಿದೆ. ಈ ಎರಡು ದೇಶಗಳನ್ನು ಹೊರತು ಪಡಿಸಿದರೆ ಫ್ರಾನ್ಸ್, ನೆದರ್ಲ್ಯಾಂಡ್, ರಷ್ಯಾ, ತೈವಾನ್, ಸೆರ್ಬಿಯಾ ಹಾಗೂ ಟುನೇಶಿಯಾ ದೇಶಗಳು ಸಹ ಭಾರತದ ವಿರುದ್ಧ ಸೈಬರ್ ದಾಳಿ ಮಾಡುತ್ತಿವೆ ಎಂದು ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ತಂತ್ರಜ್ಞಾನದ ಸಚಿವಾಲಯ ರಾಜ್ಯಸಭೆಯಲ್ಲಿ ಮಾಹಿತಿ ನೀಡಿದೆ.
2015ರಿಂದ ಇಲ್ಲಿಯವರೆಗೆ ಸುಮಾರು 1,29,747 ಭಾರತೀಯ ಪ್ರಮುಖ ವೆಬ್ಸೈಟ್ಗಳು ಹ್ಯಾಕ್ ಆಗಿವೆ. ಹೀಗೆ ಹ್ಯಾಕ್ ಆಗುವಲ್ಲಿ ಮುಖ್ಯವಾಗಿ ಪಾಕಿಸ್ತಾನ ಮತ್ತು ಚೀನಾ ಸೇರಿ ವಿದೇಶಿ ಹ್ಯಾಕರ್ಗಳ ಕೈವಾಡವಿದೆ ಎಂಬುದನ್ನು ಭಾರತೀಯ ಕಂಪ್ಯೂಟರ್ ತುರ್ತು ಪ್ರತಿಕ್ರಿಯಾ ತಂಡ (ಸಿಇಆರ್ಟಿ-ಇನ್) ಪತ್ತೆ ಹಚ್ಚಿದೆ.
2015ರಲ್ಲಿ 27,205 ಪ್ರಮುಖ ಭಾರತೀಯ ವೆಬ್ಸೈಟ್ಗಳು ಹ್ಯಾಕ್ ಆಗಿದ್ದವು. ಆ ಸಂಖ್ಯೆ 2016ರಲ್ಲಿ 33,000ಕ್ಕೆ ಏರಿತ್ತು. 2017ರಲ್ಲಿ ಸ್ವಲ್ಪ ಮಟ್ಟಿಗೆ ಕಡಿಮೆಯಾಗಿ 30,067 ಇಂಡಿಯನ್ ವೆಬ್ಸೈಟ್ಗಳು ಹ್ಯಾಕ್ ಆಗಿದ್ದವು. ಹಾಗೇ 2018ರಲ್ಲಿ 17,560, 2019ರಲ್ಲಿ 21, 767 ವೆಬ್ಸೈಟ್ಗಳು ಹ್ಯಾಕ್ ಆಗಿ, ಅವುಗಳ ಸೈಬರ್ ಭದ್ರತೆಗೆ ಧಕ್ಕೆಯಾಗಿದೆ.
ಭಾರತದ ಸೈಬರ್ ಭದ್ರತಾ ವ್ಯವಸ್ಥೆಯನ್ನು ಬಲಪಡಿಸಲು ಹೆಚ್ಚಿನ ಕ್ರಮ ಕೈಗೊಳ್ಳಲಾಗಿದೆ. ಸೈಬರ್ ಹ್ಯಾಕಿಂಗ್ ಎಂಬುದು ಒಂದು ತರಹದ ಬೆದರಿಕೆಯೇ ಆಗಿದೆ. ಈ ಬಗ್ಗೆ ಸವಿವರವಾಗಿ ಪಟ್ಟಿ ಮಾಡಿ ಮುಖ್ಯ ಮಾಹಿತಿ ಭದ್ರತಾ ಅಧಿಕಾರಿಗೆ ನೀಡಲಾಗಿದೆ ಎಂದು ಸಚಿವಾಲಯ ಮಾಹಿತಿ ನೀಡಿದೆ.
ಹಲವು ಸಚಿವಾಲಯಗಳ ಕಚೇರಿಗಳಲ್ಲಿ ಸೈಬರ್ ಭದ್ರತೆಗೆ ಸಂಬಂಧಪಟ್ಟಂತೆ ಅಣುಕು ಪ್ರದರ್ಶನಗಳ ಮೂಲಕ ಅರಿವು ಮೂಡಿಸಲಾಗಿದೆ ಎಂದು ತಿಳಿಸಿದೆ. (ಏಜೆನ್ಸೀಸ್)