ನವದೆಹಲಿ: ಚೀನಾಕ್ಕೆ ಅಂಟಿಕೊಂಡಿರುವ ವಾಸ್ತವ ಗಡಿ ರೇಖೆಗೆ ತಕ್ಷಣವೇ ಸಂಪರ್ಕ ಒದಗಿಸುವಂತೆ ಭಾರತ ರಸ್ತೆಗಳನ್ನು ನಿರ್ಮಿಸುತ್ತಿರುವುದು ಚೀನಾದ ಪಾಲಿಗೆ ನುಂಗಲಾರದ ತುತ್ತಾಗಿದೆ. ಒಂದೆಡೆ ಕರೊನಾ ಜತೆ ಹೋರಾಡುತ್ತಿರುವ ಭಾರತಕ್ಕೆ ಅದು ಈಗ ಭಾರಿ ಪ್ರತೀಕಾರದ ಬೆದರಿಕೆ ಒಡ್ಡಲಾರಂಭಿಸಿದೆ.
ಲಡಾಖ್ ಪ್ರದೇಶದ ಬೈಜಿಂಗ್ ಮತ್ತು ಲ್ಯೂಜಿನ್ ಪ್ರದೇಶಕ್ಕೆ ಸಂಪರ್ಕ ಒದಗಿಸುವ ರೀತಿಯಲ್ಲಿ ಭಾರತ ರಸ್ತೆಯನ್ನು ನಿರ್ಮಿಸಿದೆ. ತನ್ಮೂಲಕ ಗಡಿಯ ರೂಪುರೇಷೆಯನ್ನು ಬದಲಿಸುವಲ್ಲಿ ಭಾರತ ಏಕಪಕ್ಷೀಯ ಕ್ರಮ ಕೈಗೊಂಡಿದೆ. ಜತೆಗೆ ಚೀನಾದ ಗಡಿಯನ್ನು ಅತಿಕ್ರಮಿಸಿದ್ದು, ಇದಕ್ಕೆ ಭಾರಿ ದಂಡ ತರಬೇಕಾಗುತ್ತದೆ ಎಂದು ಬೆದರಿಸಿದೆ.
ಈ ವಿಷಯವಾಗಿನ ಭಾರತೀಯ ಸೇನೆ ಮತ್ತು ವಿದೇಶಾಂಗ ಸಚಿವಾಲಯ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಆದರು ಕೆಲ ಅಧಿಕಾರಿಗಳು ದೇಶ ಕೋವಿಡ್ 19ನಂಥ ಮಾರಕ ಪಿಡುಗಿನ ವಿರುದ್ಧ ಹೋರಾಡುತ್ತಿರುವ ಸಂದರ್ಭದಲ್ಲಿ ಗಡಿಯಲ್ಲಿ ಪರಿಸ್ಥಿತಿ ತುಂಬಾ ಸೂಕ್ಷ್ಮ ಮತ್ತು ಉದ್ವಿಗ್ನಗೊಂಡಂತಾಗಿದೆ ಎಂದು ಹೇಳಿದ್ದಾರೆ.
ಗಲ್ವಾನ್ ನದಿ ಪ್ರದೇಶದಲ್ಲಿ ಭಾರತ ತನ್ನ ಗಡಿಯೊಳಗೆ ಸೀಮಿತಗೊಳಿಸಿಕೊಂಡು ರಸ್ತೆಯನ್ನು ನಿರ್ಮಿಸಿದೆ. ಪ್ಯಾಂಗಾಂಗ್ ತ್ಸೋ ಸರೋವರದಿಂದ 200 ಕಿ.ಮೀ. ದೂರದಲ್ಲಿ ಶಯಾಕ್ ಮತ್ತು ಗಲ್ವಾನ್ ನದಿಗಳು ಸಂಗಮಿಸುವ ಪ್ರದೇಶದಲ್ಲಿ ಈ ರಸ್ತೆ ನಿರ್ಮಾಣಗೊಂಡಿದೆ. ಈ ಹೊಸ ರಸ್ತೆಯು ನದಿಯ ತಟವನ್ನು ಹಾದು ಹೋಗುವ ಡಾರ್ಬಕ್-ಶಯಾಕ್-ದೌಲತ್ ಬೇಗ್ ಓಲ್ಡೀ (ಡಿಎಸ್ಡಿಬಿಒ) ರಸ್ತೆಯಿಂದ ವಾಸ್ತವ ಗಡಿ ರೇಖೆಯತ್ತ ಸಂಪರ್ಕ ಒದಗಿಸುತ್ತದೆ. ಇದು ಚೀನಾದ ಆತಂಕಕ್ಕೆ ಕಾರಣವಾಗಿದೆ.
ಇದನ್ನೂ ಓದಿ: ಆನ್ಲೈನ್ ಮದ್ಯಪ್ರಿಯರಿಗೆ ಬಿತ್ತಲ್ಲಪ್ಪೋ ಗಾಳ! ಎಣ್ಣೆ ಕುಡಿಯುವ ಮೊದಲೇ ಏರಿಬಿಟ್ಟಿತು ನಶೆ…
ಗಲ್ವಾನ್ ಪ್ರದೇಶದ ವಿಷಯವಾಗಿ ಭಾರತ ಮತ್ತು ಚೀನಾ ನಡುವೆ ಯಾವುದೇ ವಿವಾದವಿಲ್ಲ. ಆದರೆ ಪ್ಯಾಂಗಾಂಗ್ ತ್ಸೋ ವಿಚಾರದಲ್ಲಿ ವಿವಾದವಿದೆ. ಆದರೆ ಕಳೆದ ಎರಡು ವರ್ಷಗಳಿಂದ ಈ ಪ್ರದೇಶದಲ್ಲಿ ಚೀನಾ ಯೋಧರು ಯಾವುದೇ ಅತಿಕ್ರಮಣ ಮಾಡಿರಲಿಲ್ಲ. ಆದರೆ, ಈಗ ನಮ್ಮ ಗಡಿ ಭಾಗದೊಳಗೆ ರಸ್ತೆ ನಿರ್ಮಿಸಿಕೊಂಡಿರುವುದಕ್ಕೆ ಆಕ್ಷೇಪಿಸುತ್ತಿರುವುದನ್ನು ಅರಗಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂದು ಅಧಿಕಾರಿಯೊಬ್ಬರು ಬೇಸರ ವ್ಯಕ್ತಪಡಿಸಿದ್ದಾರೆ.
ಕರಕೋರಾಮ್ ಪಾಸ್ನ ಬುಡದಲ್ಲಿರುವ ದೌಲತ್ ಬೇಗ್ ಓಲ್ಡೀಗೆ ಸಂಪರ್ಕಿಸುವ 255 ಕಿ.ಮೀ. ಉದ್ದದ ಡಿಎಸ್ಡಿಬಿಒ ರಸ್ತೆ ಗಡಿ ಭಾಗಕ್ಕೆ ಸುಲಭ ಸಂಪರ್ಕ ಒದಗಿಸುತ್ತದೆ. ಶಯಾಕ್ ಮತ್ತು ಟ್ಯಾಂಗಟ್ಸೆ ನದಿಗಳ ಪಕ್ಕದಲ್ಲೇ ಹಾದು ಹೋಗುವ ಈ ರಸ್ತೆಯ ನಿರ್ಮಾಣಕ್ಕೆ ತುಂಬಾ ಹಿಂದೆ ಯೋಜನೆ ರೂಪಿಸಲಾಗಿತ್ತು. ಇದರ ನಿರ್ಮಾಣ ಕಾರ್ಯ ಒಂದು ವರ್ಷದ ಹಿಂದೆಯೇ ಮುಗಿದಿದೆ ಎನ್ನಲಾಗಿದೆ.
ಇದೀಗ ಈ ರಸ್ತೆಯ ನಿರ್ಮಾಣದಿಂದ ಸಿಟ್ಟಾಗಿರುವ ಚೀನಾ ಪ್ಯಾಂಗಾಂಗ್ ತ್ಸೋ ಸರೋವರದಲ್ಲಿನ ತನ್ನ ಪಹರೆಯನ್ನು ಹೆಚ್ಚಿಸಿದ್ದು, ಹೆಚ್ಚುವರಿಯಾಗಿ ನಾಲ್ಕೈದು ಬೋಟ್ಗಳನ್ನು ನಿಯೋಜಿಸಿದೆ. ಅಷ್ಟೇ ಅಲ್ಲ, ಸರೋವರದ ಉತ್ತರ ಭಾಗದಲ್ಲಿನ ಫಿಂಗರ್ 2 (ಬೆಟ್ಟ ಮತ್ತು ಬೆಟ್ಟದ ತುದಿಗಳನ್ನು ಭಾರತೀಯ ಸೇನಾಪಡೆ ಫಿಂಗರ್ ಎಂದು ಕರೆಯುತ್ತದೆ) ಪ್ರದೇಶದಲ್ಲಿ ಭಾರತೀಯ ಯೋಧರ ಪಹರೆಗೂ ಅಡ್ಡಿಪಡಿಸಲಾರಂಭಿಸಿದೆ.
ಭಾರತೀಯ ಸೇನಾಪಡೆ ಫಿಂಗರ್ 4ವರೆಗೂ ಪಹರೆ ಕಾಯುತ್ತಿದೆ. ಭಾರತದ ಪ್ರಕಾರ ವಾಸ್ತವ ಗಡಿರೇಖೆ ಫಿಂಗರ್ 8ವರೆಗೆ ಹಬ್ಬಿದೆ. ಆದರೆ, ಚೀನಿ ಯೋಧರು ವಾಸ್ತವ ಗಡಿ ರೇಖೆ ಫಿಂಗರ್ 2 ಅನ್ನು ಹಾದು ಹೋಗುವುದಾಗಿ ಪ್ರತಿಪಾದಿಸುತ್ತಾ, ತಗಾದೆ ತೆಗೆಯುತ್ತಿರುತ್ತಾರೆ. ಹಾಗೂ ಈ ಪ್ರದೇಶದಲ್ಲಿ ಪ್ರಾಬಲ್ಯ ಸಾಧಿಸಲು ಉಭಯ ರಾಷ್ಟ್ರಗಳ ಯೋಧರು ಜಟಾಪಟಿಗೆ ಇಳಿಯುವುದು ಸಾಮಾನ್ಯವಾಗಿದೆ.
ಪೆಟ್ರೋಲ್, ಡೀಸೆಲ್ ಮಾರಾಟ ಮೊದಲಿನಂತಾಗಲು ಇನ್ನಾರು ತಿಂಗಳು ಬೇಕು…!