ಬೆಂಗಳೂರು: ಟೋಲ್ ಶುಲ್ಕ ಪಾವತಿಗೆ ಫಾಸ್ಟ್ಟ್ಯಾಗ್ ಕಡ್ಡಾಯ ಆದೇಶವನ್ನೇ ದುರುಪಯೋಗಪಡಿಸಿಕೊಂಡಿರುವ ಸೈಬರ್ ಕಳ್ಳರು ಬ್ಯಾಂಕ್ ಅಧಿಕಾರಿ ಸೋಗಿನಲ್ಲಿ ವ್ಯಕ್ತಿ ಬಳಿ 50 ಸಾವಿರ ರೂ. ದೋಚಿದ್ದಾರೆ.
ಬಾಬುಸಾಬ್ಪಾಳ್ಯದ ರಾಹುಲ್ (34) ವಂಚನೆಗೆ ಒಳಗಾದವರು. ಜ.11ರಂದು ರಾಹುಲ್ ಮೊಬೈಲ್ಗೆ ಫಾಸ್ಟ್ಟ್ಯಾಗ್ ರೀಚಾರ್ಜ್ ಸಮಸ್ಯೆ ಪರಿಹರಿಸಿಕೊಳ್ಳಲು ಕರೆ ಮಾಡುವಂತೆ ಸಹಾಯವಾಣಿ ಸಂಖ್ಯೆಸಹಿತ ಸಂದೇಶ ಬಂದಿದೆ.
ಇದಾದ ಮೇಲೆ ಜ.13ರಂದು ರಾಹುಲ್ ಮೊಬೈಲ್ಗೆ ಕರೆ ಮಾಡಿದ ಅಪರಿಚಿತ ವ್ಯಕ್ತಿ, ಆಕ್ಸಿಸ್ ಬ್ಯಾಂಕ್ ಅಧಿಕಾರಿ ಎಂದು ಪರಿಚಯ ಮಾಡಿಕೊಂಡಿದ್ದಾನೆ. ಫಾಸ್ಟಾ್ಯಗ್ ರೀಚಾರ್ಜ್ ಮಾಡಲು ನಿಮ್ಮ ಮೊಬೈಲ್ಗೆ ಸಪೋಟ್ ಆಗುವಂತೆ ಒಂದು ಲಿಂಕ್ ಕಳುಹಿಸುತ್ತೇವೆ. ಅದರ ಮೇಲೆ ಕ್ಲಿಕ್ ಮಾಡಿ ಯುಪಿಎ ಪಿನ್ ನಮೂದಿಸಿ ಕಳುಹಿಸುವಂತೆ ಸೂಚಿಸಿದ್ದಾನೆ.
ಬ್ಯಾಂಕ್ ಅಧಿಕಾರಿ ಇರಬೇಕೆಂದು ನಂಬಿದ ರಾಹುಲ್, ಲಿಂಕ್ ಮೇಲೆ ಕ್ಲಿಕ್ ಮಾಡಿ ಯುಪಿಎ ಪಿನ್ ನಮೂದಿಸಿ ಕಳುಹಿಸಿದಾಗ ಅವರ ಬ್ಯಾಂಕ್ ಖಾತೆಯಿಂದ 5 ಸಾವಿರ ರೂ. ಬ್ಯಾಂಕ್ ಖಾತೆಯಿಂದ ಕಡಿತವಾಗಿದೆ. ತಕ್ಷಣ ಎಚ್ಚೆತ್ತ ರಾಹುಲ್, ಕರೆ ಮಾಡಿ ವಿಚಾರಿಸಿದಾಗ ವಾಪಸ್ ಕೊಡುತ್ತೇವೆ. ಲಿಂಕ್ನಲ್ಲಿ ಇರುವ ಫಾಮ್ರ್ ತುಂಬಿ ಮತ್ತೊಮ್ಮೆ ಕಳುಹಿಸುವಂತೆ ವಂಚಕ ಸೂಚಿಸಿದ್ದಾನೆ.
ಅದನ್ನೂ ನಂಬಿದ ರಾಹುಲ್, ಆತ ಹೇಳಿದಂತೆ ಮಾಡಿದಾಗ ಹಂತಹಂತವಾಗಿ 50 ಸಾವಿರ ರೂ. ಬೇರೊಂದು ಖಾತೆಗೆ ವರ್ಗಾವಣೆಗೊಂಡಿದೆ. ವಂಚನೆಗೆ ಒಳಗಾಗಿರುವುದು ಖಚಿತವಾಗಿ ರಾಹುಲ್ ಠಾಣೆಗೆ ಬಂದು ದೂರು ನೀಡಿದ್ದಾರೆ. ಈ ಮೇರೆಗೆ ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿರುವುದಾಗಿ ಹೆಣ್ಣೂರು ಠಾಣೆ ಪೊಲೀಸರು ತಿಳಿಸಿದ್ದಾರೆ.