| ಯಂಕಣ್ಣ ಸಾಗರ್ ಬೆಂಗಳೂರು
ಬಹುಮಾನದ ಆಸೆ, ಬ್ಯಾಂಕ್ ಅಧಿಕಾರಿ ಸೋಗು, ನವೀಕರಣ ಹೆಸರಿನಲ್ಲಿ ಕರೆ ಮಾಡಿ ಓಟಿಪಿ ಪಡೆದು ಅಥವಾ ಮೊಬೈಲ್ಗೆ ಲಿಂಕ್ ಕಳುಹಿಸಿ ಬ್ಯಾಂಕ್ ಖಾತೆಗಳಿಗೆ ಕನ್ನ ಹಾಕುತ್ತಿದ್ದ ಸೈಬರ್ ಖದೀಮರೀಗ, ಹಣ ಲೂಟಿಗೆ ಇನ್ನೊಂದು ತಂತ್ರಗಾರಿಕೆ ಕಂಡುಕೊಂಡಿದ್ದಾರೆ. ಅದೆಂದರೆ, ಏಲಿಯನ್ ಮಾಲ್ವೇರ್ ಮೂಲಕ ಆಂಡ್ರಾಯ್್ಡ ಮೊಬೈಲ್ ಹ್ಯಾಕ್ ಮಾಡಿ ಖಾತೆಗೆ ಕನ್ನ!
ಆಂಡ್ರಾಯ್ಡ್ ಮೊಬೈಲ್ ಬಳಕೆದಾರರ ಅಂದಾಜು 226 ಬ್ಯಾಂಕಿಂಗ್ ಆಪ್ಗಳನ್ನು ಗುರಿಯಾಗಿಸಿಕೊಂಡಿರುವ ಸೈಬರ್ ವಂಚಕರು, ಏಲಿಯನ್ ಮಾಲ್ವೇರ್ ಇನ್ಸ್ಟಾಲ್ ಮಾಡಿಸಿ ವಂಚಿಸುತ್ತಿದ್ದಾರೆ. ಏಲಿಯನ್ ಒಮ್ಮೆ ಮೊಬೈಲ್ನಲ್ಲಿ ಇನ್ಸ್ಟಾಲ್ ಆಗಿಬಿಟ್ಟರೆ ಮೊಬೈಲ್ಗೆ ಬರುವ ಒಟಿಪಿ (ಒನ್ ಟೈಮ್ ಪಾಸ್ವರ್ಡ್), ಸಂದೇಶಗಳು ಸೇರಿ ಇನ್ನಿತರ ಗೌಪ್ಯ ಮಾಹಿತಿ ಕ್ಷಣಾರ್ಧದಲ್ಲಿ ಸೈಬರ್ ವಂಚಕರ ಕೈ ಸೇರಲಿವೆ. ಈ ಬಗ್ಗೆ ಎಚ್ಚರ ವಹಿಸುವಂತೆ ಸಿಐಡಿ ಸೈಬರ್ ಕ್ರೈಂ ತನಿಖಾ ತರಬೇತಿ ಮತ್ತು ಸಂಶೋಧನಾ ಕೇಂದ್ರ ಸೂಚಿಸಿದೆ.
ಇಂಟರ್ನೆಟ್ ಬಳಕೆಯಲ್ಲಿ ಮಗ್ನರಾಗಿರುವ ಜನರ ಆಸಕ್ತಿ ಏನೆಂಬ ಮಾಹಿತಿಯನ್ನು ಸೈಬರ್ ಖದೀಮರು ಸಂಗ್ರಹಿಸುತ್ತಿದ್ದಾರೆ. ನಮ್ಮ ಆಸಕ್ತಿದಾಯಕ ವಿಷಯಕ್ಕೆ ಸಂಬಂಧಿಸಿದ ಜಾಹೀರಾತುಗಳನ್ನು ಇಂಟರ್ನೆಟ್ ಬ್ರೌಸರ್ಗಳಲ್ಲಿ ಪ್ರಕಟಿಸುತ್ತಾರೆ. ಸಂದೇಶ, ಇ-ಮೇಲ್ ಮೂಲಕವೂ ವಿವಿಧ ಆಮಿಷಗಳನ್ನೊಡ್ಡಿ ಲಿಂಕ್ ರೂಪದಲ್ಲಿ ಏಲಿಯನ್ ಮಾಲ್ವೇರ್ ರವಾನಿಸುತ್ತಿದ್ದಾರೆ. ಅನಾಮಿಕ ಸಂದೇಶಗಳಲ್ಲಿ ಏನಿದೆ ಎಂದು ತಿಳಿದುಕೊಳ್ಳುವ ಕುತೂಹಲಕ್ಕೆ ಲಿಂಕ್ ಒತ್ತಿದರೆ, ಏಲಿಯನ್ ಮಾಲ್ವೇರ್ ಇನ್ಸ್ಟಾಲ್ ಆಗಲಿದೆ. ಇದು ಮೊಬೈಲ್ ಬಳಕೆದಾರರ ಅರಿವಿಗೂ ಬರುವುದಿಲ್ಲ.
ನೇರವಾಗಿ ಮೊಬೈಲ್ ನಿರ್ವಹಣೆ: ಕ್ಯೂಆರ್ ಕೋಡ್, ಆನ್ಲೈನ್ ಲಿಂಕ್ ಹಾಗೂ ವಿವಿಧ ಹೆಸರಿನ ನಕಲಿ ಆಪ್ಗಳನ್ನು ಡೌನ್ಲೋಡ್ ಮಾಡಿಸಿ, ಅದರಲ್ಲಿ ಬ್ಯಾಂಕ್ ವಿವರ ನಮೂದಿಸಿಕೊಂಡು ಖಾತೆಗೆ ಕನ್ನ ಹಾಕುತ್ತಿದ್ದರು. ಆದರೀಗ, ಏಲಿಯನ್ ಮಾಲ್ವೇರ್ ಇನ್ಸ್ಟಾಲ್ ಮಾಡಿಸಿ ನೇರವಾಗಿ ನಿರ್ವಹಣೆ ಮಾಡುತ್ತಾರೆ. ಪ್ರಮುಖವಾಗಿ ಆಂಡ್ರಾಯ್್ಡ ಮೊಬೈಲ್ ಬಳಕೆದಾರರ ಬ್ಯಾಂಕಿಂಗ್ ಆಪ್ಗಳನ್ನೇ ಟಾರ್ಗೆಟ್ ಮಾಡುವುದರಿಂದ, ಬಳಕೆದಾರರಿಗೆ ಬರುವ ಒಟಿಪಿ ಸೇರಿ ಎಲ್ಲ ಸಂದೇಶಗಳು ಸೈಬರ್ ವಂಚಕರಿಗೂ ಹೋಗಲಿವೆ. ಹೀಗಾಗಿ, ಬ್ಯಾಂಕ್ ಖಾತೆಯಿಂದ ಸುಲಭವಾಗಿ ಹಣ ಎಗರಿಸುತ್ತಾರೆ. ಸುಮಾರು 226 ಆಪ್ಗಳಿಂದ ಮಾಹಿತಿ ಕದಿಯಬಲ್ಲರು ಎಂಬುದಾಗಿ ಅಂತಾರಾಷ್ಟ್ರೀಯ ಸೈಬರ್ ತಜ್ಞರು ವಿಶ್ಲೇಷಿಸಿದ್ದಾರೆ.
ಮಾಲ್ವೇರ್ನಿಂದ ಏನಾಗುತ್ತೆ?
- ಹೊರಹೋಗುವ ಮತ್ತು ಒಳ ಬರುವ ಸಂದೇಶಗಳಲ್ಲಿನ ಮಾಹಿತಿ ಸೋರಿಕೆ
- ಮೊಬೈಲ್ನಲ್ಲಿನ ಕೀಬೋರ್ಡ್ ಇನ್ಪುಟ್ ಅನಾಮಿಕ ವ್ಯಕ್ತಿ ಬಳಸುತ್ತಾನೆ
- ಡಿವೈಸ್ನಲ್ಲಿರುವ ಆಪ್ಗಳ ಪಟ್ಟಿ, ವಿವರ, ಲೊಕೇಷನ್ ಡೇಟಾ ಕಳವು
- ಮತ್ತೊಂದು ಡಿವೈಸ್ನಲ್ಲಿ ಇ-ಮೇಲ್ ಬಳಸಿದರೆ ಹಾಗೂ ಪಾಸ್ವರ್ಡ್ ಬದಲಾಯಿಸಿದರೆ ಸಿಗುವ ದೃಢಿಕೃತ ಸಂಖ್ಯೆ (ಅಂಥಂಟಿಕೇಷನ್ ನಂಬರ್) ಸೋರಿಕೆ
- ಮೊಬೈಲ್ ಬಳಕೆಗೆ ಬಾರದಂತೆ ಲಾಕ್ ಆಗುವ ಸಾಧ್ಯತೆ
ಸೈಬರ್ ಪೊಲೀಸರ ಸಲಹೆ
- ಅನಾಮಿಕ ಸಂದೇಶಗಳಲ್ಲಿನ ಲಿಂಕ್ ಕ್ಲಿಕ್ ಮಾಡುವುದು, ಬೇರೆವರಿಗೆ ಕಳುಹಿಸುವುದು ಬೇಡ
- ಆಂಡ್ರಾಯ್ಡ್ ಸಾಫ್ಟ್ವೇರ್ ಅಪ್ಡೇಟ್ ರೀತಿಯಲ್ಲಿ ಬರುವ ಲಿಂಕ್ ಒತ್ತಬೇಡಿ
- ಮೊಬೈಲ್ನಲ್ಲಿ ಸೆಟ್ಟಿಂಗ್ ಆಪ್ಗೆ ಹೋಗಿ ಸಾಫ್ಟ್ವೇರ್ ಅಪ್ಡೇಟ್ ಕೊಡುವುದು ಸೂಕ್ತ
- ಅನಧಿಕೃತ ವೆಬ್ಸೈಟ್ನಿಂದ ಆಪ್ಗಳನ್ನು ಡೌನ್ಲೋಡ್ ಮಾಡುವುದು ಬೇಡ
- ಆಂಡ್ರಾಯ್ಡ್ ಮೊಬೈಲ್ ಬಳಕೆದಾರರು ಗೂಗಲ್ ಪ್ಲೇಸ್ಟೋರ್ನಿಂದ ಆಪ್ ಡೌನ್ಲೋಡ್ ಬಳಸಿ
- ಕರೊನಾ ವೈರಸ್ ಬಗ್ಗೆ ಮಾಹಿತಿ ನೀಡುವ ಆಪ್ಗಳ ಬಳಕೆ ಬಗ್ಗೆ ಎಚ್ಚರ