ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಸಚಿನ್​ ಪುತ್ರ: ಅರ್ಜುನ್ ತೆಂಡೂಲ್ಕರ್ ಮತ್ತು ಸಾನಿಯಾ ಚಾಂದೋಕ್ ಅದ್ಧೂರಿ ವಿವಾಹ; ಮದುವೆ ವಿಡಿಯೋ ವೈರಲ್! Arjun Tendulkar

ಮುಂಬೈ: ಕ್ರಿಕೆಟ್ ದೇವರೆಂದೆ ಜನ ಮಾಸನದಲ್ಲಿ ಖ್ಯಾತರಾಗಿರುವ ಸಚಿನ್​ ತೆಂಡೂಲ್ಕರ್ ಪುತ್ರ ಅರ್ಜುನ್​ ತೆಂಡೂಲ್ಕರ್ (Arjun Tendulkar) ಮತ್ತು ಉದ್ಯಮಿ ಸಾನಿಯಾ ಚಾಂದೋಕ್ ಅವರ ವಿವಾಹವು ಗುರುವಾರ (ಮಾ.5) ಮುಂಬೈನಲ್ಲಿ ನೆರವೇರಿದ್ದು, ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಈ ಮದುವೆಯ ವಿಡಿಯೋಗಳು ಭಾರಿ ಸದ್ದು ಮಾಡುತ್ತಿವೆ.

ವೈರಲ್​ ವಿಡಿಯೋನಲ್ಲಿ ಅರ್ಜುನ್​ ತೆಂಡೂಲ್ಕರ್, ಸಾನಿಯಾ ಚಾಂದೋಕ್ ಅವರಿಗೆ ವರಮಾಲೆಯನ್ನು ಹಾಕಿ, ಪರಸ್ಪರ ತಬ್ಬಿಕೊಳ್ಳುವುದನ್ನು ನೋಡಬಹುದಾಗಿದ್ದು, ಮಗನ ಹಿಂದೆ ಸಚಿನ್​ ತೆಂಡೂಲ್ಕರ್ ಮತ್ತು ಅಂಜಲಿ ತೆಂಡೂಲ್ಕರ್ ಮತ್ತು ಅಕ್ಕ ಸಾರಾ ತೆಂಡೂಲ್ಕರ್ ಸಂತೋಷದಿಂದ ಇರುವುದನ್ನು ಕಾಣಬಹುದು.

ಕ್ರಿಕೆಟ್​ ದಂತಕತೆ ಸಚಿನ್​ ತೆಂಡೂಲ್ಕರ್ ಅವರ ಮಗನ ಮದುವೆಗೆ ಭಾರತೀಯ ಕ್ರಿಕೆಟ್​ ತಂಡದ ದಂಡೇ ಆಗಮಿಸಿದೆ ಎಂದರೆ ತಪ್ಪಾಗದು. ಸದ್ಯ ಟಿ-ಟ್ವೆಂಟಿ ವರ್ಲ್ಡ್​ಕಪ್​ನಲ್ಲಿ ಬ್ಯುಸಿಯಾಗಿರುವ ಆಟಗಾರರನ್ನು ಹೊರತು ಪಡಿಸಿ ಉಳಿದ ಬಹುತೇಕ ಆಟಗಾರರು ಅರ್ಜುನ್​- ಸಾನಿಯಾ ಮದುವೆಯಲ್ಲಿ ಹಾಜರಿದ್ದರು.

ಕ್ರಿಕೆಟ್​ ಮತ್ತು ಬಾಲಿವುಡ್​ಗೆ ಅವಿನಾಭಾವ ಸಂಬಂಧವಿದ್ದು, ಈಗ ಅರ್ಜುನ್​-ಸಾನಿಯಾ ಮದುವೆಗೆ ಬಾಲಿವುಡ್​ನ ತಾರೆಗಳು ಆಗಮಿಸುತ್ತಿದ್ದಾರೆ.ಬಾಲಿವುಡ್​ನ ಖ್ಯಾತನಟ ಬೀಗ್​ ಬಿ ಅಮಿತಾಬ್​ ಬಚ್ಚನ್​ ಪತ್ನಿ ಜಯಾ ಬಚ್ಚನ್​ ಮತ್ತು ಮಗ ಅಭಿಷೇಕ್​ ಬಚ್ಚನ್​ ಹಾಗೂ ಸೊಸೆ ಐಶ್ಚರ್ಯ ರೈ ಬಚ್ಚನ್​ ಜೊತೆ ಆಗಮಿಸಿದ್ದಾರೆ. ಬಾಲಿವುಡ್​ ನಟ ಮತ್ತು ನಿರ್ದೇಶಕ ಫರಾನ್​ ಅಖ್ತರ್​, ನೀಲ್​ ನಿತಿನ್​ ಮುಖೇಶ್​, ಹಿನ್ನಲೆ ಗಾಯಕಿ ಆಶಾ ಬೋಸ್ಲೆ ಮೊದಲಾದವರು ಈ ಮದುವೆಗೆ ಬಂದು ನವ ಜೋಡಿಗಳಿಗೆ ಶುಭಕೋರಿದ್ದಾರೆ,(ಏಜನ್ಸೀಸ್​).