ದೀದಿ ಸೋಲಿಗೆ ಬೆದರಿದ್ರಾ ಅಖಿಲೇಶ್..? ಐ-ಪ್ಯಾಕ್ ಜೊತೆಗಿನ ಒಪ್ಪಂದ ರದ್ದುಗೊಳಿಸಿದ ಸಮಾಜವಾದಿ ಪಕ್ಷ! | IPAC

ವರ್ಷದ ಆರಂಭದಲ್ಲಿ ಈ ಒಪ್ಪಂದವನ್ನು ಅಂತಿಮಗೊಳಿಸಲಾಗಿದ್ದು, ಎಸ್‌ಪಿಯ ಚುನಾವಣಾ ನಿರ್ವಹಣೆ ಮತ್ತು ಸಾಮಾಜಿಕ ಜಾಲತಾಣದ ಕಾರ್ಯಾಚರಣೆಗಳನ್ನು ಒಳಗೊಂಡಿತ್ತು. ಮತ್ತೊಂದು ಸಲಹಾ ಸಂಸ್ಥೆಯಾದ ಶೋ ಟೈಮ್, ಪಕ್ಷದ ಪ್ರಚಾರಕ್ಕೆ ಸಂಬಂಧಿಸಿದ ಕೆಲಸವನ್ನು ನಿರ್ವಹಿಸುವುದನ್ನು ಮುಂದುವರಿಸಿದರೆ, ಐ-ಪ್ಯಾಕ್ ಇನ್ನು ಮುಂದೆ ಎಸ್‌ಪಿಯ ಚುನಾವಣಾ ಕಾರ್ಯತಂತ್ರದೊಂದಿಗೆ ಸಂಬಂಧ ಹೊಂದಿರುವುದಿಲ್ಲ ಎಂದು ಮೂಲಗಳು ತಿಳಿಸಿವೆ.

ಐ-ಪ್ಯಾಕ್ ನಿಕಟ ಪೈಪೋಟಿಯ ಸ್ಥಾನಗಳ ಮೇಲೆ ಕೇಂದ್ರೀಕರಿಸಿತ್ತು. ಹಿಂದಿನ ವಿಧಾನಸಭಾ ಚುನಾವಣೆಯಲ್ಲಿ ಸಮಾಜವಾದಿ ಪಕ್ಷ ಸ್ವಲ್ಪ ಅಂತರದಿಂದ ಸೋತಿದ್ದ ಕ್ಷೇತ್ರಗಳಲ್ಲಿ ಈ ಸಂಸ್ಥೆ ಪ್ರಾಥಮಿಕವಾಗಿ ಕೆಲಸ ಮಾಡುತ್ತಿತ್ತು. ಉತ್ತರ ಪ್ರದೇಶ ನಿಯೋಜನೆಯನ್ನು ನಿರ್ವಹಿಸುವ ಐ-ಪ್ಯಾಕ್ ತಂಡದ ಹೆಚ್ಚಿನ ಸದಸ್ಯರು ರಾಜ್ಯದ ಹೊರಗಿನಿಂದ ಕಾರ್ಯನಿರ್ವಹಿಸುತ್ತಿದ್ದರು ಎಂದು ವರದಿಯಾಗಿದೆ. ವಿಧಾನಸಭಾ ಚುನಾವಣೆಗೆ ಮುನ್ನ ಆಡಳಿತಾರೂಢ ಬಿಜೆಪಿ ವಿರುದ್ಧದ ಅಭಿಯಾನವನ್ನು ತೀವ್ರಗೊಳಿಸಲು ಎಸ್‌ಪಿ ಸಿದ್ಧತೆ ನಡೆಸುತ್ತಿರುವಾಗ, ನಿರ್ಣಾಯಕ ರಾಜಕೀಯ ಘಟ್ಟದಲ್ಲಿ ಈ ಒಪ್ಪಂದವನ್ನು ಕೊನೆಗೊಳಿಸುವ ನಿರ್ಧಾರವನ್ನು ಪಕ್ಷ ತೆಗೆದುಕೊಂಡಿದೆ.

ಸಲಹಾ ಸಂಸ್ಥೆಯ ವಿರುದ್ಧ ಜಾರಿ ನಿರ್ದೇಶನಾಲಯ (ED) ಕ್ರಮ ಕೈಗೊಂಡ ನಂತರ ಎಸ್​​ಪಿ ಮತ್ತು ಐ-ಪ್ಯಾಕ್ ನಡುವಿನ ಒಪ್ಪಂದವು ಈಗಾಗಲೇ ಅನಿಶ್ಚಿತವಾಗಿದೆ ಎಂದು ಮೂಲಗಳು ತಿಳಿಸಿವೆ. ಬಂಗಾಳ ಕಲ್ಲಿದ್ದಲು ಕಳ್ಳಸಾಗಣೆ ಪ್ರಕರಣಕ್ಕೆ ಸಂಬಂಧಿಸಿದ ಹಣಕಾಸಿನ ಅಕ್ರಮಗಳಿಗೆ ಸಂಬಂಧಿಸಿದಂತೆ ಇಡಿ ಕಳೆದ ತಿಂಗಳು ಐ-ಪ್ಯಾಕ್ ನಿರ್ದೇಶಕ ವಿನೇಶ್ ಚಾಂಡೆಲ್​ರನ್ನು ಬಂಧಿಸಿತ್ತು.

ಈ ವಿಷಯದ ಬಗ್ಗೆ ತಿಳಿದಿರುವ ಮೂಲದ ಪ್ರಕಾರ, ದಾಳಿಗಳು ಮತ್ತು ಬಂಧನವು ವ್ಯವಸ್ಥೆಯ ಮೇಲಿನ ವಿಶ್ವಾಸವನ್ನು ದುರ್ಬಲಗೊಳಿಸಿದ್ದು, ನಮ್ಮ ಕಚೇರಿಗಳ ಮೇಲೆ ಚುನಾವಣಾ ಆಯೋಗ ದಾಳಿ ನಡೆಸಿದೆ ಮತ್ತು ನಮ್ಮ ನಿರ್ದೇಶಕ ವಿನೇಶ್ ಚಾಂಡೆಲ್ ಬಂಧನವು ಒಪ್ಪಂದವನ್ನು ಅತಂತ್ರವಾಗುವಂತೆ ಮಾಡಿದೆ ಎಂದು ಸಂಸ್ಥೆಯ ಮೂಲಗಳು ತಿಳಿಸಿವೆ.

ಇತ್ತೀಚಿನ ವಿಧಾನಸಭಾ ಚುನಾವಣಾ ಫಲಿತಾಂಶಗಳು ಕೂಡ ಐ-ಪ್ಯಾಕ್​ನಿಂದ ಎಸ್‌ಪಿ ಅಂತರಕಾಯ್ದುಕೊಳ್ಳಲು ಕಾರಣವಾಗಿರಬಹುದು ಎನ್ನಲಾಗಿದೆ. ವಿಧಾನಸಭೆ ಚುನಾವಣೆಯಲ್ಲಿ ಟಿಎಂಸಿ ಮತ್ತು ಡಿಎಂಕೆ ಸೋತಿರುವುದು ಎಸ್‌ಪಿಯನ್ನು ಚಿಂತೆಗೆ ದೂಡಿವೆ ಎಂದು ಮೂಲಗಳು ತಿಳಿಸಿವೆ. ವಿಶೇಷವಾಗಿ ಮಮತಾ ಬ್ಯಾನರ್ಜಿ ತಮ್ಮದೇ ಸ್ಥಾನದಿಂದ ಭಾರಿ ಅಂತರದಿಂದ ಸೋತ ಬಳಿಕ ಐ-ಪ್ಯಾಕ್ ಮೇಲಿನ ವಿಶ್ವಾಸಾರ್ಹತೆ ಕಡಿಮೆಯಾಗಿದೆ ಎಂಬ ಚರ್ಚೆಗಳು ನಡೆದಿವೆ(ಏಜೆನ್ಸೀಸ್​).