ಕೊನೆಗೂ ಬರ್ಮುಡಾ ರಹಸ್ಯ ಭೇದಿಸಿದ ವಿಜ್ಞಾನಿಗಳು: ಸಮುದ್ರದ ಅಡಿಯಲ್ಲಿದೆ ದೈತ್ಯ ತೆಪ್ಪ! Scientists Solve Bermuda Mystery

Scientists Solve Bermuda Mystery : ಅಟ್ಲಾಂಟಿಕ್ ಮಹಾಸಾಗರದ ಮಧ್ಯಭಾಗದಲ್ಲಿರುವ ಪುಟ್ಟ ಜ್ವಾಲಾಮುಖಿ ದ್ವೀಪ 'ಬರ್ಮುಡಾ'. ಅಲ್ಲಿನ ಜ್ವಾಲಾಮುಖಿಗಳು ಸುಮಾರು 3 ಕೋಟಿ ವರ್ಷಗಳ ಹಿಂದೆಯೇ ಸ್ಫೋಟಗೊಳ್ಳುವುದನ್ನು ನಿಲ್ಲಿಸಿದ್ದರೂ ಸಹ ಬರ್ಮುಡಾ ದ್ವೀಪ ಸಮುದ್ರಮಟ್ಟಕ್ಕಿಂತ ಇಷ್ಟು ಎತ್ತರದಲ್ಲಿ ಹೇಗೆ ಉಳಿದುಕೊಂಡಿದೆ ಎಂಬ ರಹಸ್ಯವನ್ನು ವಿಜ್ಞಾನಿಗಳು ಈಗ ಪತ್ತೆಹಚ್ಚಿದ್ದಾರೆ.

ಕಾರ್ನೆಗೀ ಇನ್ಸಿಟಿಟ್ಯೂಷನ್ ಆಫ್ ವಾಷಿಂಗ್ಟನ್ ಮತ್ತು ಯೇಲ್ ವಿಶ್ವವಿದ್ಯಾಲಯದ ಸಂಶೋಧಕರ ತಂಡವು ಬರ್ಮುಡಾ ದ್ವೀಪದ ಅಡಿಯಲ್ಲಿ ಅಡಗಿರುವ ಒಂದು ವಿಶಿಷ್ಟ ರಚನೆಯನ್ನು ಪತ್ತೆಹಚ್ಚಿದ್ದಾರೆ. ಈ ರಚನೆಯು ದ್ವೀಪದ ಕೊನೆಯ ಜ್ವಾಲಾಮುಖಿ ಸ್ಫೋಟದ ನಂತರ ರೂಪುಗೊಂಡಿದೆ ಎಂದು ಹೇಳಲಾಗಿದೆ. ಪ್ರಾಗೈತಿಹಾಸಿಕ ಕಾಲದಿಂದಲೂ ಈ ರಹಸ್ಯ ರಚನೆಯೇ ದ್ವೀಪವು ಸಮುದ್ರದ ಆಳಕ್ಕೆ ಕುಸಿಯದಂತೆ ಎತ್ತರದಲ್ಲಿ ಹಿಡಿದಿಟ್ಟುಕೊಂಡಿದೆ ಎಂದು ವಿಜ್ಞಾನಿಗಳು ಬಹಿರಂಗಪಡಿಸಿದ್ದಾರೆ.

ಉತ್ತರ ಅಟ್ಲಾಂಟಿಕ್ ಮಹಾಸಾಗರದಲ್ಲಿರುವ, ಸುಮಾರು 64,000 ಜನಸಂಖ್ಯೆಯನ್ನು ಹೊಂದಿರುವ ಬರ್ಮುಡಾ ದ್ವೀಪವು ಸುತ್ತಲಿನ ಆಳವಾದ ಸಮುದ್ರದ ತಳಕ್ಕಿಂತ ಹೇಗೆ ಎತ್ತರದಲ್ಲಿ ಉಳಿದಿದೆ ಎಂಬುದು ದಶಕಗಳಿಂದ ವಿಜ್ಞಾನಿಗಳಿಗೆ ದೊಡ್ಡ ಕುತೂಹಲವಾಗಿತ್ತು. ಸಾಮಾನ್ಯವಾಗಿ ಇಂತಹ ದ್ವೀಪಗಳು ನೀರಿನ ಮೇಲೆ ತೇಲುವಂತೆ ಇರಲು ನಿರಂತರವಾದ ಜ್ವಾಲಾಮುಖಿ ಶಾಖದ ಅಗತ್ಯವಿರುತ್ತದೆ, ಆದರೆ ಬರ್ಮುಡಾದಲ್ಲಿ ಜ್ವಾಲಾಮುಖಿಗಳು ಲಕ್ಷಾಂತರ ವರ್ಷಗಳ ಹಿಂದೆಯೇ ಸ್ಥಗಿತಗೊಂಡಿವೆ. ಇದೀಗ ಸಂಶೋಧಕರು ಈ ದ್ವೀಪದ ಸಾಮಾನ್ಯ ಸಮುದ್ರದ ಪದರದ ಅಡಿಯಲ್ಲಿ ಸುಮಾರು 12 ಮೈಲಿ ದಪ್ಪವಿರುವ ಗುಪ್ತ ಶಿಲಾ ಪದರವೊಂದನ್ನು ಪತ್ತೆಹಚ್ಚಿದ್ದು, ಇದು ಸುತ್ತಮುತ್ತಲಿನ ಬಂಡೆಗಳಿಗಿಂತ ಹಗುರವಾಗಿದೆ. ಈ ಪದರವು ಒಂದು ದೈತ್ಯ ತೆಪ್ಪದಂತೆ ಕಾರ್ಯನಿರ್ವಹಿಸುತ್ತಾ ಇಡೀ ದ್ವೀಪ ಪ್ರದೇಶವನ್ನು ಸಮುದ್ರ ಮಟ್ಟಕ್ಕಿಂತ ಎತ್ತರದಲ್ಲಿ ಹಿಡಿದಿಟ್ಟುಕೊಂಡಿದೆ ಎಂಬುದು ತಿಳಿದುಬಂದಿದೆ.

ವಿಜ್ಞಾನಿಗಳ ಪ್ರಕಾರ, ಈ ಹಗುರವಾದ ಶಿಲಾ ಪದರವು ಸುಮಾರು 3 ರಿಂದ 3.5 ಕೋಟಿ ವರ್ಷಗಳ ಹಿಂದೆ ಭೂಮಿಯ ಆಳದಿಂದ ಬಿಸಿ ಮತ್ತು ಕರಗಿದ ಶಿಲೆಗಳು ಮೇಲೆ ಬಂದು, ಭೂಮಿಯ ಪದರದ ಅಡಿಯಲ್ಲಿ ಹರಡಿ, ನಂತರ ತಣ್ಣಗಾಗಿ ಗಟ್ಟಿಯಾದಾಗ ರೂಪುಗೊಂಡಿದೆ. ಸಾಮಾನ್ಯವಾಗಿ ಎತ್ತರದ ಸಮುದ್ರ ಪ್ರದೇಶಗಳು ಸಕ್ರಿಯ ಜ್ವಾಲಾಮುಖಿಗಳ ಮೇಲೆ ಅವಲಂಬಿತವಾಗಿರುತ್ತವೆ. ಆದರೆ, ಬರ್ಮುಡಾದ ಎತ್ತರಕ್ಕೆ ಹಿಂದೆಂದೂ ಕಾಣದ ಭೂವೈಜ್ಞಾನಿಕ ವಿದ್ಯಮಾನವೇ ಕಾರಣವೆಂದು ಸಾಬೀತಾಗಿದೆ. ಈ ಸಂಶೋಧನೆಯು ಪ್ರಾಚೀನ ಜ್ವಾಲಾಮುಖಿಗಳ ಅವಶೇಷಗಳು ಕೂಡ ದ್ವೀಪಗಳನ್ನು ದೀರ್ಘಕಾಲದವರೆಗೆ ಸಮುದ್ರದ ಮೇಲೆ ಸುರಕ್ಷಿತವಾಗಿರಿಸಬಲ್ಲವು ಎಂಬುದನ್ನು ಖಚಿತಪಡಿಸಿದೆ.

ಸಂಶೋಧಕರಾದ ವಿಲಿಯಂ ಫ್ರೇಜರ್ ಮತ್ತು ಜೆಫ್ರಿ ಪಾರ್ಕ್ ಅವರು ಬರ್ಮುಡಾ ಅಡಿಯಲ್ಲಿ ಪತ್ತೆಹಚ್ಚಿರುವ ಈ ಬೃಹತ್ ಶಿಲಾ ಪದರವು ಸುಮಾರು 12 ಮೈಲಿ ದಪ್ಪವಿದ್ದು, ಇದು ನ್ಯೂಯಾರ್ಕ್ ನಗರದ ಮ್ಯಾನ್‌ಹ್ಯಾಟನ್ ದ್ವೀಪದ ಒಟ್ಟು ಉದ್ದಕ್ಕೆ ಸಮನಾಗಿದೆ. ಯಾವುದೇ ಹೊಸ ಕೊರೆಯುವಿಕೆ ಪ್ರಕ್ರಿಯೆ ನಡೆಸದೆ ಇದನ್ನು ಪತ್ತೆಹಚ್ಚಲು ವಿಜ್ಞಾನಿಗಳು ದ್ವೀಪದಲ್ಲಿರುವ ಏಕೈಕ ಭೂಕಂಪನ ಆಲಿಸುವ ಕೇಂದ್ರದಲ್ಲಿ ಕಳೆದ 20 ವರ್ಷಗಳಿಂದ ದಾಖಲಾದ ನೈಸರ್ಗಿಕ ಭೂಕಂಪನ ಕಂಪನಗಳನ್ನು ಬಳಸಿಕೊಂಡಿದ್ದಾರೆ. ಭೂಕಂಪದ ಒತ್ತಡದ ಅಲೆಗಳು ವಿಭಿನ್ನ ಶಿಲಾ ಪದರಗಳನ್ನು ಸಂಧಿಸಿದಾಗ ಅವುಗಳ ವೇಗವು ಹೇಗೆ ಬದಲಾಗುತ್ತದೆ ಮತ್ತು ಅವು ಅಕ್ಕಪಕ್ಕಕ್ಕೆ ಅಲುಗಾಡುವ 'ಶಿಯರ್' (shear) ಅಲೆಗಳಾಗಿ ಹೇಗೆ ರೂಪಾಂತರಗೊಳ್ಳುತ್ತವೆ ಎಂಬುದನ್ನು ಸೂಕ್ಷ್ಮವಾಗಿ ಟ್ರ್ಯಾಕ್ ಮಾಡುವ ಮೂಲಕ ಈ ರಹಸ್ಯವನ್ನು ಭೇದಿಸಲಾಗಿದೆ.

ಸಂಶೋಧಕರು ಭೂಕಂಪದ ಸಂಕೇತಗಳನ್ನು ಅತ್ಯಾಧುನಿಕ ತಂತ್ರಜ್ಞಾನದ ಮೂಲಕ ವಿಶ್ಲೇಷಿಸಿ, ಬರ್ಮುಡಾ ದ್ವೀಪದ ಅಡಿಯಲ್ಲಿ ಸುಮಾರು 25 ಮೈಲಿಗಳಷ್ಟು ಆಳದವರೆಗೆ ಇರುವ ಶಿಲಾಪದರಗಳ ನಕ್ಷೆಯನ್ನು ಸಿದ್ಧಪಡಿಸಿದ್ದಾರೆ. ಈ ಅಧ್ಯಯನದಿಂದ ಬರ್ಮುಡಾ ಪ್ರದೇಶವು ಸಮುದ್ರದ ಇತರ ಭಾಗಗಳಿಗಿಂತ 1,300 ರಿಂದ 2,000 ಅಡಿಗಳಷ್ಟು ಎತ್ತರದಲ್ಲಿರಲು ಕಾರಣವೇನು ಎಂಬುದು ಪತ್ತೆಯಾಗಿದೆ. ಇಲ್ಲಿನ ಬಂಡೆಗಳು ಸುತ್ತಮುತ್ತಲಿನ ಮ್ಯಾಂಟಲ್ ಬಂಡೆಗಳಿಗಿಂತ ಸುಮಾರು 1.5 ಪ್ರತಿಶತದಷ್ಟು ಕಡಿಮೆ ಸಾಂದ್ರತೆಯನ್ನು ಹೊಂದಿರುವ ಜ್ವಾಲಾಮುಖಿ ಶಿಲೆಗಳಿಂದ (Magma) ಕೂಡಿದ್ದು, ಈ ಸಾಂದ್ರತೆಯ ವ್ಯತ್ಯಾಸವೇ ಬರ್ಮುಡಾವನ್ನು ಒಂದು ಬೃಹತ್ ತೇಲುವ ಸಾಧನದಂತೆ (Flotation device) ಸಮುದ್ರದ ಮೇಲ್ಮಟ್ಟದಲ್ಲಿ ಹಿಡಿದಿಟ್ಟಿದೆ.

ಈ ಸಂಶೋಧನೆಯು ವಿಜ್ಞಾನ ಲೋಕಕ್ಕೆ ಹೊಸ ಸವಾಲನ್ನು ಒಡ್ಡಿದೆ, ಏಕೆಂದರೆ ಬರ್ಮುಡಾದ ಭೌಗೋಳಿಕ ಲಕ್ಷಣಗಳು ಸಾಂಪ್ರದಾಯಿಕ 'ಮ್ಯಾಂಟಲ್ ಪ್ಲೂಮ್' (Mantle Plume) ಮಾದರಿಗೆ ಹೊಂದಿಕೆಯಾಗುತ್ತಿಲ್ಲ. ವಿಜ್ಞಾನಿ ಫ್ರೇಜರ್ ಅವರ ಪ್ರಕಾರ, ಭೂಮಿಯ ಆಳದಿಂದ ದ್ರವ್ಯಗಳು ಮೇಲ್ಮೈಗೆ ಬರಲು ಕೇವಲ ಜ್ವಾಲಾಮುಖಿಯ ಸಾಮಾನ್ಯ ಪ್ರಕ್ರಿಯೆಗಳಷ್ಟೇ ಅಲ್ಲದೆ, ಇನ್ನು ನಮಗೆ ಸರಿಯಾಗಿ ತಿಳಿಯದ ಭೂಮಿಯ ಒಳಗಿನ ಇತರ ಸಂವಹನ ಪ್ರಕ್ರಿಯೆಗಳೂ ಕಾರಣವಾಗಿರಬಹುದು. ಇದು ಭೂಮಿಯ ಮ್ಯಾಂಟಲ್ ಪದರದಲ್ಲಿ ನಡೆಯುವ ನಿಗೂಢ ಪ್ರಕ್ರಿಯೆಗಳ ಬಗ್ಗೆ ಮತ್ತಷ್ಟು ಅಧ್ಯಯನ ನಡೆಸಲು ದಾರಿ ಮಾಡಿಕೊಟ್ಟಿದೆ.

ಬರ್ಮುಡಾ ಪ್ರದೇಶದ ಸಮುದ್ರದ ತಳವು ಸಾಮಾನ್ಯಕ್ಕಿಂತ 1,600 ರಿಂದ 3,300 ಅಡಿಗಳಷ್ಟು ಎತ್ತರದಲ್ಲಿದ್ದು, ಇದನ್ನು 'ಬರ್ಮುಡಾ ರೈಸ್' (Bermuda Rise) ಎಂದು ಕರೆಯಲಾಗುತ್ತದೆ. ಯಾವುದೇ ಸಕ್ರಿಯ ಜ್ವಾಲಾಮುಖಿಗಳಿಲ್ಲದಿದ್ದರೂ ಈ ಪ್ರದೇಶವು ಲಕ್ಷಾಂತರ ವರ್ಷಗಳಿಂದ ಎತ್ತರವಾಗಿಯೇ ಉಳಿದಿರುವುದು ವಿಜ್ಞಾನಿಗಳಲ್ಲಿ ಕುತೂಹಲ ಮೂಡಿಸಿತ್ತು. ಇಲ್ಲಿನ ಭೂಮಿಯ ಆಳದಲ್ಲಿ ಹಗುರವಾದ ಬಂಡೆಗಳಿರುವುದರಿಂದ ಗುರುತ್ವಾಕರ್ಷಣೆಯು ಅಲ್ಪ ಪ್ರಮಾಣದಲ್ಲಿ ದುರ್ಬಲವಾಗಿದೆ (Gravitational Anomaly). ಈ ಕಾರಣದಿಂದಾಗಿ ಸಮುದ್ರದ ಮಟ್ಟವು ಇಲ್ಲಿ ಸ್ವಲ್ಪ ಉಬ್ಬಿದಂತಿದ್ದು, ಇದನ್ನು 'ಜಿಯೋಯ್ಡ್ ಅನಾಮಲಿ' ಎಂದು ಕರೆಯಲಾಗುತ್ತದೆ.

ಮತ್ತೊಂದು ವಿಶೇಷವೆಂದರೆ, ಈ ಪ್ರದೇಶದಲ್ಲಿ ಅತಿ ಹೆಚ್ಚು ಕಾಂತೀಯ ಏರಿಳಿತಗಳು (Magnetic Anomalies) ಕಂಡುಬರುತ್ತವೆ. ಬರ್ಮುಡಾದ ಪ್ರಾಚೀನ ಜ್ವಾಲಾಮುಖಿ ಚಟುವಟಿಕೆಯಿಂದ ಉಳಿದುಕೊಂಡಿರುವ ಕಬ್ಬಿಣ ಮತ್ತು ಟೈಟಾನಿಯಂ ಸಮೃದ್ಧವಾಗಿರುವ ಬಂಡೆಗಳು ಈ ಪ್ರಬಲ ಕಾಂತೀಯ ಸಂಕೇತಗಳನ್ನು ಹೊರಸೂಸುತ್ತವೆ. ಈ ನೈಸರ್ಗಿಕ ಪ್ರಕ್ರಿಯೆಯಿಂದಾಗಿ ಹಡಗು ಅಥವಾ ವಿಮಾನಗಳು ಈ ಭಾಗದಲ್ಲಿ ಹಾದುಹೋಗುವಾಗ ದಿಕ್ಸೂಚಿ (Compass) ಮತ್ತು ನ್ಯಾವಿಗೇಷನ್ ಉಪಕರಣಗಳಲ್ಲಿ ವ್ಯತ್ಯಾಸಗಳು ಕಾಣಿಸಿಕೊಳ್ಳಬಹುದು. ಇದು ಸಂಪೂರ್ಣವಾಗಿ ನೈಸರ್ಗಿಕವಾಗಿದ್ದು, ಅಪಾಯಕಾರಿಯಲ್ಲದಿದ್ದರೂ ಬರ್ಮುಡಾದ ಸುತ್ತಲಿನ ನಿಗೂಢತೆಗೆ ಒಂದು ವೈಜ್ಞಾನಿಕ ಕಾರಣವನ್ನು ಒದಗಿಸುತ್ತದೆ, (ಏಜೆನ್ಸೀಸ್​).