ಟ್ರಂಪ್​ ಟು ಶುಭಾಂಶು ಶುಕ್ಲಾ... ಇವರೇ ನೋಡಿ ಈ ವರ್ಷ ಹೆಚ್ಚು ಸುದ್ದಿಯಾದ ಟಾಪ್​ 10 ಸೆಲೆಬ್ರಿಟಿಗಳು! Rewind 2025

ನವದೆಹಲಿ: ಇಡೀ ಜಗತ್ತು 2026ರ ಹೊಸ ವರ್ಷವನ್ನು ಆತ್ಮೀಯವಾಗಿ ಬರಮಾಡಿಕೊಳ್ಳಲು ತುದಿಗಾಲಲ್ಲಿ ನಿಂತಿದೆ. ಅದೇ ಸಮಯದಲ್ಲಿ ನಮ್ಮಿಂದ ದೂರವಾಗಿ ಇತಿಹಾಸ ಪುಟ ಸೇರಲಿರುವ 2025ನೇ ವರ್ಷವನ್ನು ನೆನೆದು ಅನೇಕರು ಭಾವುಕ ವಿದಾಯ ಹೇಳಲು ಸಜ್ಜಾಗಿದ್ದಾರೆ. ಈ ವರ್ಷ ಸಾಕಷ್ಟು ಘಟನೆಗಳು ನಡೆದಿವೆ. ಪ್ರತಿ ಕ್ಷೇತ್ರದಲ್ಲೂ ಮರೆಯುವಂತಹ ಹಾಗೂ ಮರೆಯಲಾರದಂತಹ ಎಷ್ಟೋ ಕ್ಷಣಗಳು ಘಟಿಸಿವೆ. ಅದೇ ರೀತಿ ಸಾಕಷ್ಟು ಮಂದಿ ವಿಶ್ವದ ಗಮನ ಸೆಳೆದಿದ್ದಾರೆ. ಅನೇಕ ಸೆಲೆಬ್ರಿಟಿಗಳು ವಿಶೇಷ ಕಾರಣಕ್ಕೆ ಹೆಚ್ಚು ಸುದ್ದಿಯಾಗಿದ್ದಾರೆ. ಹಾಗಾದರೆ, 2025ರಲ್ಲಿ ಹೆಚ್ಚು ಸುದ್ದಿ ( Rewind 2025 ) ಮಾಡಿದ ಟಾಪ್​ 10 ಸೆಲೆಬ್ರಿಟಿಗಳು ಯಾರು ಎಂಬುದನ್ನು ನಾವೀಗ ತಿಳಿದುಕೊಳ್ಳೋಣ.

2025ರಲ್ಲಿ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಎರಡನೇ ಅವಧಿಗೆ ಅಧಿಕಾರ ವಹಿಸಿಕೊಂಡರು ಮತ್ತು ಇತರ ದೇಶಗಳ ಮೇಲೆ ಹೆಚ್ಚಿನ ಸುಂಕಗಳನ್ನು ವಿಧಿಸುವ ಮೂಲಕ ವಿಶ್ವದ ಗಮನ ಸೆಳೆದರು. ಭಾರತೀಯ ಶುಭಾಂಶು ಶುಕ್ಲಾ ಅವರು ಆಕ್ಸಿಯಮ್ ಮಿಷನ್ 4ರ ಭಾಗವಾಗಿ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (ISS) ಗೆ ಭೇಟಿ ನೀಡಿದ ಎರಡನೇ ಭಾರತೀಯ ಗಗನಯಾತ್ರಿ ಎನಿಸಿಕೊಂಡರು. ಭಾರತದ 'ಆಪರೇಷನ್ ಸಿಂಧೂರ್' ಬ್ರೀಫಿಂಗ್‌ನಲ್ಲಿ ಸಹ ನೇತೃತ್ವ ವಹಿಸಿದ್ದ ಇಬ್ಬರು ಮಹಿಳಾ ಅಧಿಕಾರಿಗಳಾದ ಸೋಫಿಯಾ ಖುರೇಷಿ ಮತ್ತು ವ್ಯೋಮಿಕಾ ಸಿಂಗ್ ಕೂಡ ಹೆಚ್ಚು ಸುದ್ದಿಯಾದರು.

ಕಳೆದ ಜನವರಿಯಲ್ಲಿ ಶ್ವೇತಭವನಕ್ಕೆ ಮರಳಿದ ನಂತರ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಅಂತಾರಾಷ್ಟ್ರೀಯ ಗಮನ ಸೆಳೆಯುತ್ತಿದ್ದಾರೆ. 78 ವರ್ಷದ ರಿಪಬ್ಲಿಕನ್ ಪಕ್ಷದ ನಾಯಕ ದೊಡ್ಡ ಪ್ರಮಾಣದಲ್ಲಿ ಬಹಿಷ್ಕಾರಗಳನ್ನು ಜಾರಿಗೆ ತಂದಿದ್ದಾರೆ. ರಷ್ಯಾದಿಂದ ತೈಲ ಖರೀದಿಗಾಗಿ ಭಾರತ ಸೇರಿದಂತೆ ಹಲವಾರು ದೇಶಗಳ ಮೇಲೆ ದಂಡನಾತ್ಮಕ ಸುಂಕಗಳನ್ನು ವಿಧಿಸಿದ್ದಾರೆ. ವೆನೆಜುವೆಲಾದ ಮಾದಕವಸ್ತು ದೋಣಿಗಳ ಮೇಲೆ ದಾಳಿ ಮಾಡಲು ಆದೇಶಿಸಿದರು. ರಷ್ಯಾ-ಯೂಕ್ರೇನ್ ಯುದ್ಧ, ಇಸ್ರೇಲ್​ ಮತ್ತು ಇರಾನ್​ ಸಂಘರ್ಷ ಹಾಗೂ ಇಸ್ರೇಲ್​ ಹಾಗೂ ಗಾಜಾ ಯುದ್ಧ ಮತ್ತು ಭಾರತ ಹಾಗೂ ಪಾಕಿಸ್ತಾನ ನಡುವಿನ ಸಂಘರ್ಷ ಸೇರಿದಂತೆ ಎಂಟು ಜಾಗತಿಕ ಸಂಘರ್ಷಗಳಲ್ಲಿ ಕದನ ವಿರಾಮಕ್ಕಾಗಿ ಮಧ್ಯಸ್ಥಿಕೆ ವಹಿಸಿರುವುದಾಗಿ ಸ್ವತಃ ಟ್ರಂಪ್ ಹೇಳಿಕೊಂಡಿದ್ದಾರೆ. ಈ ಕಾರಣಗಳಿಂದ ಟ್ರಂಪ್​ ಜಾಗತಿಕವಾಗಿ ಈ ವರ್ಷ ಭಾರಿ ಸುದ್ದಿಯಾದರು.

ವಿಶ್ವದ ನಂಬರ್​ 1 ಶ್ರೀಮಂತ ಎಲಾನ್ ಮಸ್ಕ್, ತಮ್ಮ ವ್ಯವಹಾರ ಉದ್ಯಮಗಳು, ರಾಜಕೀಯ, ಕಾನೂನು ವಿವಾದಗಳು ಮತ್ತು ವಿವಾದಾತ್ಮಕ ಹೇಳಿಕೆಗಳಿಂದಲೇ ಈ ವರ್ಷ ಹೆಚ್ಚು ಸುದ್ದಿಯಲ್ಲಿದ್ದರು. ಈ ವರ್ಷದ ಆರಂಭದಲ್ಲಿ ಟ್ರಂಪ್ ಆಡಳಿತದಲ್ಲಿ DOGE ನ ಹೊಸ ವಿಭಾಗಕ್ಕೆ ನೇಮಕಗೊಂಡಾಗ ಮಸ್ಕ್ ಪ್ರಾಮುಖ್ಯತೆ ಪಡೆದರು. ಆದಾಗ್ಯೂ, ಮೇ ತಿಂಗಳಲ್ಲಿ ಅವರು ಹಠಾತ್ತನೆ ಆ ಹುದ್ದೆಯಿಂದ ಕೆಳಗಿಳಿದರು. ಅಲ್ಲದೆ, ಟ್ರಂಪ್​ ಆಡಳಿತದ ವಿರುದ್ಧ ಗುಡುಗಿದರು. ಈ ಕಾರಣಗಳಿಂದ ಮಸ್ಕ್​ ಈ ವರ್ಷ ಹೆಚ್ಚು ಸುದ್ದಿಯಾದರು.

ಮರಿಯಾ ಕೊರಿನಾ ಮಚಾದೊ ಅವರು ಈ ವರ್ಷದ ನೊಬೆಲ್ ಶಾಂತಿ ಪ್ರಶಸ್ತಿಗೆ ಭಾಜನರಾಗುವ ಮೂಲಕ ಹೆಚ್ಚು ಸುದ್ದಿಯಾದರು. ವೆನೆಜುವೆಲಾದ ಸಂಸತ್ತಿನ ಸದಸ್ಯೆ ಮರಿಯಾ, ತಮ್ಮ ದೇಶದ ಜನರ ಹಕ್ಕುಗಳಿಗಾಗಿ ಅವಿಶ್ರಾಂತ ಹೋರಾಟದ ಪರಿಣಾಮವಾಗಿ ಈ ನೊಬೆಲ್ ಪ್ರಶಸ್ತಿಯನ್ನು ಗೆದ್ದಿದ್ದಾರೆ. ವೆನೆಜುವೆಲಾದ ಜನರ ಪ್ರಜಾಪ್ರಭುತ್ವ ಹಕ್ಕುಗಳನ್ನು ಉಳಿಸುವಲ್ಲಿ ಮಚಾದೊ ಅವರು ಮಾಡಿದ ಅನೇಕ ಕಾರ್ಯಗಳಿಗಾಗಿ ಈ ಅಪರೂಪದ ಗೌರವವನ್ನು ನೀಡಲಾಗಿದೆ. ಸರ್ವಾಧಿಕಾರದಿಂದ ಪ್ರಜಾಪ್ರಭುತ್ವದೆಡೆಗೆ ನ್ಯಾಯಯುತ ಮತ್ತು ಶಾಂತಿಯುತ ಪರಿವರ್ತನೆಗಾಗಿ ಮಚಾದೊ ಹೋರಾಟ ಮಾಡಿದರು. ಮರಿಯಾ ಅವರನ್ನು ವೆನೆಜುವೆಲಾದ ಉಕ್ಕಿನ ಮಹಿಳೆ ಅಂತಾನೂ ಕರೆಯಲಾಗುತ್ತದೆ. ಈ ಎಲ್ಲ ಕಾರಣಗಳಿಂದ ಈ ವರ್ಷ ಅತಿ ಹೆಚ್ಚು ಸುದ್ದಿಯಲ್ಲಿದ್ದ ಸೆಲೆಬ್ರಿಟಿಗಳ ಪಟ್ಟಿಯಲ್ಲಿ ಮಚಾದೊ ಕೂಡ ಸ್ಥಾನ ಪಡೆದಿದ್ದಾರೆ.

2024, ಜುಲೈ ತಿಂಗಳಲ್ಲಿ ಬಾಂಗ್ಲಾದೇಶದಲ್ಲಿ ನಡೆದ ವಿದ್ಯಾರ್ಥಿ ದಂಗೆಯನ್ನು ಹತ್ತಿಕ್ಕಲು ಮತ್ತು ವಿದ್ಯಾರ್ಥಿ ಪ್ರತಿಭಟನಾಕಾರರನ್ನು ಕೊಲ್ಲಲು ಆದೇಶಿಸಿದ ಆರೋಪ ಶೇಖ್​ ಹಸೀನಾ ಅವರ ಮೇಲಿದೆ. ಪ್ರಧಾನಿ ಆಗಿದ್ದ ಸಮಯದಲ್ಲಿ ಅಧಿಕಾರ ದುರ್ಬಳಕೆ ಮಾಡಿಕೊಂಡು, ಸಾಕಷ್ಟು ಹತ್ಯೆಗೆ ಕಾರಣವಾದ ಆರೋಪದ ಮೇಲೆ ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಶೇಖ್ ಹಸೀನಾ ಅವರಿಗೆ ಮರಣದಂಡನೆ ವಿಧಿಸಲಾಗಿದೆ. ಬಾಂಗ್ಲಾದೇಶ ಅಂತಾರಾಷ್ಟ್ರೀಯ ಅಪರಾಧ ನ್ಯಾಯಮಂಡಳಿಯು ಹಸೀನಾ ಅವರನ್ನು ಮೂರು ಆರೋಪಗಳ ಮೇಲೆ ತಪ್ಪಿತಸ್ಥರೆಂದು ಘೋಷಿಸಿದೆ. ಪ್ರಚೋದನೆ, ಹತ್ಯೆಗೆ ಆದೇಶಿಸುವುದು ಮತ್ತು ಹತ್ಯೆಗಳನ್ನು ತಡೆಯಲು ಕ್ರಮ ಕೈಗೊಳ್ಳದಿರುವ ಆರೋಪ ಅವರ ಮೇಲಿದೆ. 78 ವರ್ಷದ ಮಾಜಿ ಪ್ರಧಾನಿ ಹಸೀನಾ, 2024, ಆಗಸ್ಟ್ 5 ರಿಂದ ಭಾರತದಲ್ಲಿ ತಲೆಮರೆಸಿಕೊಂಡಿದ್ದಾರೆ. ಮರಣದಂಡನೆ ಶಿಕ್ಷೆಗೆ ಒಳಗಾದ ಕಾರಣ ಈ ವರ್ಷ ಹಸೀನಾ ಅವರು ಹೆಚ್ಚು ಸುದ್ದಿಯಾದರು.

ಪಹಲ್ಗಾಮ್ ದಾಳಿಗೆ ಪ್ರತೀಕಾರವಾಗಿ ಪಾಕಿಸ್ತಾನದಲ್ಲಿರುವ ಭಯೋತ್ಪಾದಕ ಶಿಬಿರಗಳನ್ನು ನಾಶಮಾಡಲು ಭಾರತ ಆಪರೇಷನ್ ಸಿಂಧೂರ್ ಅನ್ನು ಪ್ರಾರಂಭಿಸಿತು. ಈ ಕಾರ್ಯಾಚರಣೆಯ ಪತ್ರಿಕಾಗೋಷ್ಠಿಯು ವಿಶೇಷವಾಗಿತ್ತು. ಸೇನೆಯ ಕರ್ನಲ್ ಸೋಫಿಯಾ ಖುರೇಷಿ ಮತ್ತು ವಾಯುಪಡೆಯ ವಿಂಗ್ ಕಮಾಂಡರ್ ವ್ಯೋಮಿಕಾ ಸಿಂಗ್ ಕಾರ್ಯಾಚರಣೆಯ ಬಗ್ಗೆ ಜಗತ್ತಿಗೆ ವಿವರಿಸಿದರು. ಮಹಿಳಾ ನೇತೃತ್ವದಲ್ಲಿ ನಡೆದ ಕಾರ್ಯಾಚರಣೆ ಯಶಸ್ವಿಯಾಗಿದ್ದರಿಂದ ಇಡೀ ಜಗತ್ತು ಅವರಿಬ್ಬರ ಬಗ್ಗೆ ತಿಳಿದುಕೊಳ್ಳಲು ಉತ್ಸಾಹ ತೋರಿತು. ಹೀಗಾಗಿ ಇವರಿಬ್ಬರು ಈ ವರ್ಷ ಹೆಚ್ಚು ಸುದ್ದಿಯಲ್ಲಿದ್ದರು.

1984ರಲ್ಲಿ ರಾಕೇಶ್ ಶರ್ಮ ನಂತರ ಬಾಹ್ಯಾಕಾಶಕ್ಕೆ ಪ್ರಯಾಣ ಬೆಳೆಸಿದ ಎರಡನೇ ಭಾರತೀಯ ಎಂಬ ಹೆಗ್ಗಳಿಕೆಗೆ ಗಗನಯಾತ್ರಿ ಶುಭಂಶು ಶುಕ್ಲಾ ಪಾತ್ರರಾಗಿದ್ದಾರೆ. ಆಕ್ಸಿಯಮ್ ಮಿಷನ್ 4 ರ ಗ್ರೂಪ್ ಕ್ಯಾಪ್ಟನ್ ಆಗಿ, ಶುಭಾಂಶು ಅವರು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಭೇಟಿ ನೀಡಿದರು. ಈ ವೇಳೆ ಬಾಹ್ಯಕಾಶದಲ್ಲಿ ಸಾಕಷ್ಟು ಪ್ರಯೋಗಗಳನ್ನು ಮಾಡಿದರು. ಅಲ್ಲದೆ, ಸಾಕಷ್ಟು ಫೋಟೋಗಳನ್ನು ಹಂಚಿಕೊಂಡರು. ಅವರ ಇಡೀ ಪ್ರಯಾಣ ಸಿಕ್ಕಾಪಟ್ಟೆ ಸುದ್ದಿಯಾಯಿತು.

ಅಕ್ಟೋಬರ್‌ ತಿಂಗಳಲ್ಲಿ ಸಾನೈ ತಕೈಚಿ ಅವರು ಜಪಾನ್‌ನ ಮೊದಲ ಮಹಿಳಾ ಪ್ರಧಾನಿಯಾಗುವ ಮೂಲಕ ಇತಿಹಾಸ ನಿರ್ಮಿಸಿದರು. 1961ರ ಮಾರ್ಚ್ 7ರಂದು ನಾರಾ ಪ್ರಿಫೆಕ್ಚರ್‌ನಲ್ಲಿ ಜನಿಸಿದ ತಕೈಚಿ, ಲಿಬರಲ್ ಡೆಮಾಕ್ರಟಿಕ್ ಪಾರ್ಟಿ (LDP)ಯ ಮೊದಲ ಮಹಿಳಾ ಅಧ್ಯಕ್ಷೆಯಾಗಿ 2025ರ ಅಕ್ಟೋಬರ್‌ನಿಂದ ಜಪಾನ್‌ನ ಪ್ರಧಾನಮಂತ್ರಿಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಇದು ದೇಶದ ಇತಿಹಾಸದಲ್ಲಿ ಮೊದಲ ಬಾರಿಗೆ ಮಹಿಳೆಯೊಬ್ಬರು ಈ ಹುದ್ದೆಗೆ ಆಯ್ಕೆಯಾಗಿರುವುದು. ಸಂಪ್ರದಾಯವಾದಿ ನಿಲುವುಗಳಿಗೆ ಹೆಸರುವಾಸಿಯಾದ ಅವರು ಆರ್ಥಿಕತೆ, ರಕ್ಷಣಾ ನೀತಿ ಮತ್ತು ಅಂತಾರಾಷ್ಟ್ರೀಯ ಸಂಬಂಧಗಳಲ್ಲಿ ಬಲವಾದ ನಿಲುವುಗಳನ್ನು ಹೊಂದಿದ್ದು, "ಸನಾಯೆನಾಮಿಕ್ಸ್" ಎಂಬ ಆರ್ಥಿಕ ಯೋಜನೆಯ ಮೂಲಕ ದೇಶದ ಬೆಳವಣಿಗೆಗೆ ಕೊಡುಗೆ ನೀಡುತ್ತಿದ್ದಾರೆ.

ಅಮೆರಿಕನ್ ರಾಬರ್ಟ್ ಫ್ರಾನ್ಸಿಸ್ ಪ್ರೆವೋಸ್ಟ್, ರೋಮನ್ ಕ್ಯಾಥೋಲಿಕ್ ಚರ್ಚ್‌ನ ಹೊಸ ಪೋಪ್ ಆಗಿ ಆಯ್ಕೆಯಾಗಿದ್ದಾರೆ. ರಾಬರ್ಟ್ ಫ್ರಾನ್ಸಿಸ್ ಅವರು ಯುನೈಟೆಡ್ ಸ್ಟೇಟ್ಸ್‌ನಿಂದ ಪೋಪ್ ಆಗಿ ಆಯ್ಕೆಯಾದ ಮೊದಲ ವ್ಯಕ್ತಿ ಎಂಬ ದಾಖಲೆಯನ್ನು ಸೃಷ್ಟಿಸಿದ್ದಾರೆ. ಹೊಸದಾಗಿ ಆಯ್ಕೆಯಾದ ಪೋಪ್ ಅವರನ್ನು ಪೋಪ್ ಲಿಯೋ XIV ಎಂದು ಹೆಸರಿಸಲಾಗಿದೆ. ಪೋಪ್ ಫ್ರಾನ್ಸಿಸ್ ಅವರ ಮರಣದ ನಂತರ ಅವರು ಆಯ್ಕೆಯಾದರು.

ಈ ವರ್ಷದ ಆರಂಭದಲ್ಲಿ ಹಾಸ್ಯನಟ ಸಮಯ್ ರೈನಾ 'ಇಂಡಿಯಾಸ್ ಗಾಟ್ ಟ್ಯಾಲೆಂಟ್' ಕಾರ್ಯಕ್ರಮದಲ್ಲಿ ಆಕ್ಷೇಪಾರ್ಹ ಹೇಳಿಕೆ ನೀಡಿ ವಿವಾದ ಸೃಷ್ಟಿಸಿದರು. ಅವರ ವಿರುದ್ಧ ಹಲವಾರು ಎಫ್‌ಐಆರ್‌ಗಳು ದಾಖಲಾಗಿದ್ದವು. ಪೊಲೀಸರು ಮತ್ತು ಸೈಬರ್ ಸೆಲ್ ಸಮನ್ಸ್ ಜಾರಿ ಮಾಡುವ ಮೂಲಕ ದೊಡ್ಡ ವಿವಾದದ ಕೇಂದ್ರಬಿಂದುವಾದರು. ಇದರ ಪರಿಣಾಮವಾಗಿ, ಅವರು ತಮ್ಮ ಯೂಟ್ಯೂಬ್ ಚಾನೆಲ್‌ನಿಂದ ಕಾರ್ಯಕ್ರಮಕ್ಕೆ ಸಂಬಂಧಿಸಿದ ಎಲ್ಲಾ ಸಂಚಿಕೆಗಳನ್ನು ತೆಗೆದುಹಾಕಿದರು.

ಗಾಯಕಿ ಟೇಲರ್ ಸ್ವಿಫ್ಟ್ ಅವರ ಎರಾಸ್ ಟೂರ್ ಅನ್ನು ಅಧಿಕೃತವಾಗಿ ಸಾರ್ವಕಾಲಿಕ ಅತಿ ಹೆಚ್ಚು ಗಳಿಕೆಯ ಸಂಗೀತ ಕಚೇರಿ ಪ್ರವಾಸವೆಂದು ಘೋಷಿಸಲಾಗಿದೆ. ಇದು ಅವರನ್ನು 2025 ರ ಅತಿದೊಡ್ಡ ಸೆಲೆಬ್ರಿಟಿಯನ್ನಾಗಿ ಮಾಡಿದೆ. ಈ ಪ್ರವಾಸವು ಐದು ಖಂಡಗಳಲ್ಲಿ 149 ಪ್ರದರ್ಶನಗಳನ್ನು ಒಳಗೊಂಡಿತ್ತು. ಅಲ್ಲದೆ, ವಿಶ್ವಾದ್ಯಂತ ಲಕ್ಷಾಂತರ ಅಭಿಮಾನಿಗಳನ್ನು ಸೆಳೆಯಿತು ಮತ್ತು ಸುಮಾರು 2 ಬಿಲಿಯನ್ ಡಾಲರ್​ ಗಳಿಸಿತು, (ಏಜೆನ್ಸೀಸ್​).