ನವದೆಹಲಿ: ಐವತ್ತು ವರ್ಷಗಳ ಇತಿಹಾಸ ಇರುವ ಪ್ರತಿಷ್ಠಿತ ಕಂಪನಿ ಒಂದಷ್ಟು ಮಳಿಗೆಗಳನ್ನು ಮುಚ್ಚಬೇಕಾದ, ಉದ್ಯೋಗಿಗಳ ಸಂಖ್ಯೆಯನ್ನು ತಗ್ಗಿಸಬೇಕಾದ ಹಂತದವರೆಗೂ ನಷ್ಟಕ್ಕೆ ಒಳಗಾಗಿ ಎದೆಗುಂದಿದ ಉದ್ಯಮಿಯೊಬ್ಬರು ಗಗನಚುಂಬಿ ಕಟ್ಟವೊಂದರ 18ನೇ ಮಹಡಿಯಿಂದ ಧುಮುಕಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಬೆಡ್ ಬಾತ್ ಆ್ಯಂಡ್ ಬಿಯಾಂಡ್ ಎಂಬ ಪ್ರತಿಷ್ಠಿತ ಕಂಪನಿಯ ಚೀಫ್ ಫೈನಾನ್ಸಿಯಲ್ ಆಫೀಸರ್ ಆಗಿದ್ದ ಗಸ್ಟಾವೊ ಅರ್ನಲ್ (52) ಜೆಂಗಾ ಟವರ್ ಎಂದೇ ಹೆಸರಾಗಿರುವ ನ್ಯೂಯಾರ್ಕ್ನ ಟ್ರಿಬೆಕಾ ಕಟ್ಟಡದ 18ನೇ ಮಹಡಿಯಿಂದ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಶುಕ್ರವಾರ ಮಧ್ಯಾಹ್ನ ಈ ಆತ್ಮಹತ್ಯೆ ನಡೆದಿದೆ. ಸಾರ್ವಜನಿಕರು ಈ ಕುರಿತು ಪೊಲೀಸರಿಗೆ ಮಾಹಿತಿ ನೀಡಿದ್ದರು.
2020ರಲ್ಲಿ ಬೆಡ್ ಬಾತ್ ಆ್ಯಂಡ್ ಬಿಯಾಂಡ್ ಕಂಪನಿಯನ್ನು ಸೇರಿದ್ದ ಅರ್ನಲ್, ಇದಕ್ಕೂ ಮೊದಲು ಸೌಂದರ್ಯವರ್ಧಕಗಳ ಕಂಪನಿಯ ಅವಾನ್ನ ಸಿಎಫ್ಒ ಆಗಿದ್ದರು. ಅದಕ್ಕೂ ಮೊದಲು ಪ್ರಾಕ್ಟರ್ ಆ್ಯಂಡ್ ಗ್ಯಾಂಬಲ್ನಲ್ಲಿ 20 ವರ್ಷಗಳ ಕಾಲ ಉದ್ಯೋಗದಲ್ಲಿದ್ದರು.
ಬೆಡ್ ಬಾತ್ ಆ್ಯಂಡ್ ಬಿಯಾಂಡ್ ಗೃಹ ಬಳಕೆ ಉತ್ಪನ್ನಗಳ ಕಂಪನಿಯಾಗಿದ್ದು, ಐವತ್ತು ವರ್ಷಗಳ ಇತಿಹಾಸ ಹೊಂದಿದೆ. ಆದರೆ ಇತ್ತೀಚೆಗೆ ಈ ಕಂಪನಿಯ ನಷ್ಟದ ಹಾದಿಯಲ್ಲಿದ್ದು ಆಗಸ್ಟ್ 16ರಂದು ಅರ್ನಲ್ ತಮ್ಮ ಕಂಪನಿಯ 55,013 ಶೇರುಗಳನ್ನು ಮಾರಾಟ ಮಾಡಿದ್ದರು. ಮಾತ್ರವಲ್ಲ, ಕಳೆದ ವಾರ 150 ಮಳಿಗೆಗಳನ್ನು ಮುಚ್ಚುವ ಹಾಗೂ ಉದ್ಯೋಗಿಗಳ ಸಂಖ್ಯೆಯನ್ನು ತಗ್ಗಿಸುವ ಬಗ್ಗೆ ಈ ಕಂಪನಿ ಘೋಷಿಸಿತ್ತು. ಅದರ ಬೆನ್ನಿಗೇ ಅರ್ನಲ್ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. –ಏಜೆನ್ಸೀಸ್
ಭದ್ರತೆಗೆ ನಿಯೋಜಿಸಿದ್ದ ಸಿಐಎಸ್ಎಫ್ ಯೋಧ ಪಿಸ್ತೂಲ್-ಗುಂಡುಗಳ ಸಮೇತ ನಾಪತ್ತೆ!