ಕಂಟೈನ್ಮೆಂಟ್ ಝೋನ್ ಹೊರತುಪಡಿಸಿ ಉಳಿದೆಡೆ ಮದ್ಯ ಮಾರಾಟಕ್ಕೆ ಅವಕಾಶ

ತುಮಕೂರು: ಕರೊನಾ ಭೀತಿ ಹಿನ್ನೆಲೆಯಲ್ಲಿ ಲಾಕ್‌ಡೌನ್ ಜಾರಿಯಾದಾಗಿನಿಂದ ಬಂದ್ ಆಗಿದ್ದ ಮದ್ಯದಂಗಡಿಗಳ ಬಾಗಿಲು ಮೇ 4 ರಂದು ತೆರೆಯಲಿವೆ. 40 ದಿನಗಳಿಂದ ‘ಎಣ್ಣೆ’ ಇಲ್ಲದೆ ಚಡಪಡಿಸುತ್ತಿದ್ದ ಮದ್ಯಪ್ರಿಯರು ಸೋಮವಾರ ಬೆಳಗ್ಗೆಯೇ ವೈನ್‌ಶಾಪ್, ಎಂಎಸ್‌ಐಎಲ್‌ಗಳಿಗೆ ಮುಗಿಬೀಳುವ ಸಾಧ್ಯತೆ ಇದೆ.

ರಾಜ್ಯ ಸರ್ಕಾರದ ಆದೇಶದಂತೆ ಕಂಟೈನ್ಮೆಂಟ್ ರೆನ್ ಹೊರತುಪಡಿಸಿ ಉಳಿದೆಡೆ ಮದ್ಯ ಮಾರಾಟಕ್ಕೆ ಅವಕಾಶ ಇದೆ. ಜಿಲ್ಲೆಯಲ್ಲಿ ವೈನ್‌ಶಾಪ್‌ಗಳು (ಸಿಎಲ್-2) ಹಾಗೂ ಎಂಎಸ್‌ಐಎಲ್ (ಸಿಎಲ್-11) ಮಳಿಗೆಗಳಲ್ಲಿ ಮಾರಾಟ ಮಾಡಬಹುದಾಗಿದೆ. ಬೆಳಗ್ಗೆ 9 ರಿಂದ ಸಂಜೆ 7ರವರೆಗೆ ಮದ್ಯದಂಗಡಿಗಳು ತೆರೆದಿರಲಿದ್ದು, ಎಣ್ಣೆ ಖರೀದಿಸಲು ಬರುವ ಪ್ರತಿಯೊಬ್ಬರೂ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದು ಕಡ್ಡಾಯ.

ಪಬ್, ಕ್ಲಬ್, ಬಾರ್ ಆ್ಯಂಡ್ ರೆಸ್ಟೋರೆಂಟ್, ವೈನ್ : ಬೋಟಿಕ್‌ಗಳಲ್ಲಿ ಮದ್ಯಮಾರಾಟಕ್ಕೆ ಅವಕಾಶವಿರುವುದಿಲ್ಲ. ಸಿಎಲ್-2 ಹಾಗೂ ಸಿಎಲ್-11 ಮಳಿಗೆಗಳಲ್ಲಿ ಷರತ್ತುಬದ್ಧ ಮಾರಾಟಕ್ಕೆ ಅನುವು ಮಾಡಿಕೊಡಲಾಗಿದೆ. ಈ ಮಳಿಗೆಗಳಲ್ಲಿ ಪಾರ್ಸಲ್ ಮೂಲಕ ಮಾರಾಟ ಮಾಡಬಹುದು.

239 ಮದ್ಯಮಳಿಗೆಗಳು: ಜಿಲ್ಲೆಯಲ್ಲಿ 239 ಮದ್ಯಮಳಿಗೆಗಳಿವೆ. 46 ಎಂಎಸ್‌ಐಎಲ್ ಮಳಿಗೆಗಳು ಹಾಗೂ 193 ವೈನ್‌ಶಾಪ್‌ಗಳಿದ್ದು, ಈ ಮಳಿಗೆಗಳಲ್ಲಿ ಮದ್ಯ ಮಾರಾಟಕ್ಕೆ ಅವಕಾಶವಿದೆ. ಈ ಮಳಿಗೆಗಳಿಗೆ 6 ಅಡಿ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವ ದೊಡ್ಡ ಸವಾಲಿದೆ. ಉಲ್ಲಂಘನೆ ಆಗದಂತೆ ಕ್ರಮ ತೆಗೆದುಕೊಳ್ಳುವ ಹೊಣೆಗಾರಿಕೆ ಮದ್ಯಮಳಿಗೆಗಳದ್ದಾಗಿದ್ದು ಆದೇಶ ಉಲ್ಲಂಘಿಸಿದರೆ ಕ್ರಮ ಜರುಗಿಸುವುದಾಗಿ ಪೊಲೀಸರು ಎಚ್ಚರಿಕೆ ನೀಡಿದ್ದಾರೆ. ಇದು ಮದ್ಯಮಾರಾಟಗಾರರಿಗೆ ತಲೆಬಿಸಿ ತಂದಿದೆ.

ಖಾಸಗಿ ಸೆಕ್ಯುರಿಟಿ: ದೈಹಿಕ ಅಂತರ ಕಾಯ್ದುಕೊಳ್ಳುವುದು ಕಡ್ಡಾಯ : ಈ ಹಿನ್ನೆಲೆಯಲ್ಲಿ ಯಾವುದೇ ರೀತಿಯಲ್ಲೂ ನೂಕುನುಗ್ಗಲು ಊಂಟಾಗದಂತೆ ಕ್ರಮವಹಿಸುವ ಜವಾಬ್ದಾರಿ ಮದ್ಯದಂಗಡಿಗಳ ಮೇಲಿದೆ. ಹಾಗಾಗಿ, ಖಾಸಗಿ ಸೆಕ್ಯುರಿಟಿ ಗಾರ್ಡ್‌ಗಳ ಸೇವೆ ಬಳಸಿಕೊಳ್ಳುವಂತೆ ಪೊಲೀಸ್ ಇಲಾಖೆ ಮದ್ಯದಂಗಡಿ ಮಾಲೀಕರಿಗೆ ಸೂಚನೆ ನೀಡಿದೆ.

ಒಬ್ಬರಿಗೆ ಫುಲ್‌ಬಾಟಲ್?: 40 ದಿನಗಳ ಬಳಿಕ ಮದ್ಯದಂಗಡಿಗಳು ಬಾಗಿಲು ತೆರೆಯುತ್ತಿರುವುದರಿಂದ ಆರಂಭದಲ್ಲಿ ನೂಕುನುಗ್ಗಲು ಉಂಟಾಗುವ ಹಿನ್ನೆಲೆಯಲ್ಲಿ ಗ್ರಾಹಕನಿಗೆ 1 ಫುಲ್‌ಬಾಟಲ್ ಖರೀದಿಗೆ ಅಥವಾ 180 ಎಂಎಲ್ 4-5 ಕ್ವಾರ್ಟರ್ ಬಾಟಲ್ ಖರೀದಿಸಲು ಅವಕಾಶ ಇರಲಿದೆ. ಮೊದಲ 3-4 ದಿನ ಇದನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆ ಜಿಲ್ಲಾ ಅಬಕಾರಿ ಇಲಾಖೆ ಮದ್ಯದಂಗಡಿಗಳಿಗೆ ಸಲಹೆ ನೀಡಿದೆ.

ಮದ್ಯಮಾರಾಟ ಪುನರಾರಂಭಕ್ಕೂ ಮುನ್ನ ಅನುಮಾನಗಳು, ದೂರುಗಳು ಬಂದ ಮದ್ಯದಂಗಡಿಗಳ ಸ್ಟಾಕ್ ಪರಿಶೀಲನೆ ಮಾಡಲಾಗಿದೆ. ಜಿಲ್ಲೆಯಲ್ಲಿ 7 ಮದ್ಯದಂಗಡಿಗಳ ಲೈಸೆನ್ಸ್ ಅಮಾನತುಪಡಿಸಲಾಗಿದೆ. ಮೇ 4ರಿಂದ ಸಿಎಲ್-2, ಸಿಎಲ್-11 ಮಳಿಗೆಗಳಲ್ಲಿ ಬೆಳಗ್ಗೆ 9 ರಿಂದ ಸಂಜೆ 7ರ ತನಕ ಮದ್ಯಮಾರಾಟಕ್ಕೆ ಅವಕಾಶ ಕೊಡಲಾಗಿದೆ.
ಎಸ್.ನಾಗಾರಜಪ್ಪ ಅಬಕಾರಿ ಅಧೀಕ್ಷಕ

ಮದ್ಯದಂಗಡಿಗಳ ಬಳಿ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದು ಕಡ್ಡಾಯ. ಈ ಬಗ್ಗೆ ಮಾಲೀಕರ ಜತೆ ಸಭೆ ನಡೆಸಿ ನೂಕುನುಗ್ಗಲು ಉಂಟಾಗದಂತೆ ಖಾಸಗಿ ಸೆಕ್ಯುರಿಟಿ ಗಾರ್ಡ್‌ಗಳನ್ನು ನೇಮಿಸಿಕೊಳ್ಳುವುದು ಸೇರಿ ಕೆಲವು ನಿರ್ದೇಶನ ನೀಡಲಾಗಿದೆ. ಎಲ್ಲ ಕಡೆ ಪೊಲೀಸರನ್ನು ನಿಯೋಜಿಸಲು ಸಾಧ್ಯವಿಲ್ಲ. ಬದಲಾಗಿ ಮದ್ಯದಂಗಡಿಗಳ ಮೇಲೆ ನಿಗಾ ಇಡಲಾಗುವುದು.
ಟಿ.ಜೆ.ಉದೇಶ್ ಎಎಸ್ಪಿ