ನವದೆಹಲಿ: ಕರೋನಾ ವೈರಸ್ ಸೋಂಕಿನ ಕಾರಣದಿಂದ ಜಾಗತಿಕ ಅರ್ಥವ್ಯವಸ್ಥೆಯೇ ಕುಸಿದು ಕುಳಿತಿರುವಾಗ ತಲಾ ಜಿಡಿಪಿಯ ಡಾಲರ್ ಲೆಕ್ಕಾಚಾರದಲ್ಲಿ ಭಾರತವನ್ನು ನೆರೆಯ ಬಾಂಗ್ಲಾದೇಶ ಹಿಂದಿಕ್ಕಲಿದೆಯಂತೆ! ಬಾಂಗ್ಲಾದೇಶದ ತಲಾ ಜಿಡಿಪಿಯು 2020ರಲ್ಲಿ ಶೇಕಡ 4 ವಿಸ್ತರಣೆಯಾಗಲಿದ್ದು, 1,888 ಡಾಲರ್ ಆಗಲಿದೆ. ಇದೇ ವೇಳೆ ಭಾರತದ ತಲಾ ಜಿಡಿಪಿಯು ಶೇಕಡ 10.5ಕ್ಕೆ ಕುಸಿಯಲಿದ್ದು, 1,877 ಡಾಲರ್ ಗೆ ಇಳಿಯಲಿದೆ. ಕಳೆದ ನಾಲ್ಕು ವರ್ಷಗಳ ಅವಧಿಯಲ್ಲಿ ಇದು ಕನಿಷ್ಠ ಮಟ್ಟವಾಗಿದೆ.
ಇಂಟರ್ ನ್ಯಾಷನಲ್ ಮಾನಿಟರಿ ಫಂಡ್ (ಐಎಂಎಫ್) ತನ್ನ ವರ್ಲ್ಡ್ ಎಕನಾಮಿಕ್ ಔಟ್ಲುಕ್ನಲ್ಲಿ ಈ ಅಂಶವಿದೆ ಎಂಬುದನ್ನು ಬಿಜಿನೆಸ್ ಟುಡೇ ಉಲ್ಲೇಖಿಸಿದೆ. ಎರಡೂ ದೇಶಗಳ ಜಿಡಿಪಿಯನ್ನು ಪ್ರಸ್ತುತ ಬೆಲೆಗಳನ್ನಾಧರಿಸಿ ನಿರ್ಧರಿಸಲಾಗುತ್ತಿದೆ. ಈ ಅಂದಾಜಿನ ಪ್ರಕಾರ ದಕ್ಷಿಣ ಏಷ್ಯಾದಲ್ಲಿ ಪಾಕಿಸ್ತಾನ, ನೇಪಾಳಗಳ ನಂತರದಲ್ಲಿ ಭಾರತ ಮೂರನೇ ಅತ್ಯಂತ ಬಡರಾಷ್ಟ್ರವೆನಿಸಿಕೊಳ್ಳಲಿದೆ. ಭೂತಾನ್, ಬಾಂಗ್ಲಾದೇಶ, ಮಾಲ್ಡೀವ್ಸ್, ಶ್ರೀಲಂಕಾಗಳ ತಲಾ ಜಿಡಿಪಿಯು ಭಾರತಕ್ಕಿಂತ ಹೆಚ್ಚಾಗಿದೆ.
ಇದನ್ನೂ ಓದಿ: ವಿದ್ಯಾರ್ಥಿಗಳನ್ನು ಉಗ್ರರ ತಂಡಕ್ಕೆ ಸೇರಿಸುತ್ತಿದ್ದ ಮೂವರು ಶಿಕ್ಷಕರು ಅರೆಸ್ಟ್!
ದಕ್ಷಿಣ ಏಷ್ಯಾದಲ್ಲಿ ಕರೊನಾ ಕಾರಣಕ್ಕೆ ಶ್ರೀಲಂಕಾದ ಆರ್ಥಿಕತೆಯ ನಂತರದಲ್ಲಿ ಅತಿಹೆಚ್ಚಿನ ನಷ್ಟ ಭಾರತಕ್ಕೆ ಆಗಲಿದೆ. ನೇಪಾಳ ಮತ್ತು ಭೂತಾನ್ಗಳ ಆರ್ಥಿಕತೆ ಬೆಳವಣಿಗೆಯ ಹಾದಿಯಲ್ಲಿದೆ. ಆದರೆ, ಪಾಕಿಸ್ತಾನದ ಡೇಟಾವನ್ನು ಐಎಂಎಫ್ನ ಈ ವರದಿ ಬಹಿರಂಗಪಡಿಸಿಲ್ಲ. ಆದಾಗ್ಯೂ, ಭಾರತದ ತಲಾ ಜಿಡಿಪಿಯು ಡಾಲರ್ಗಳ ಲೆಕ್ಕಾಚಾರದಲ್ಲಿ 2021ರಲ್ಲಿ ಶೇಕಡ 8.2ಕ್ಕೆ ಏರಿಕೆಯಾಗಲಿದೆ. ಅಂದರೆ, ಮುಂದಿನ ವರ್ಷ 2030 ಡಾಲರ್ ಮತ್ತು ಬಾಂಗ್ಲಾದೇಶದ ತಲಾ ಜಿಡಿಪಿ 1,990 ಡಾಲರ್ ಆಗಿರಲಿದೆ ಎಂಬುದನ್ನೂ ವರದಿ ಉಲ್ಲೇಖಿಸಿದೆ. (ಏಜೆನ್ಸೀಸ್)
ಕಬ್ಬನ್ಪಾರ್ಕ್ನಲ್ಲಿ ವಾಹನ ಸಂಚಾರ ನಿರ್ಬಂಧ ಕೋರಿದ ಪಿಐಎಲ್: ಸರ್ಕಾರಕ್ಕೆ ನೋಟಿಸ್