ನವದೆಹಲಿ: ಕೆಲವೇ ದಿನಗಳ ಹಿಂದೆ ಭಾರಿ ಸುದ್ದಿಯಲ್ಲಿದ್ದ ಬಾಬಾ ಕಾ ಢಾಬಾ ಈಗ ಮತ್ತೆ ಸುದ್ದಿಯಾಗುತ್ತಿದೆ. ಹಾಗಂತ ಈ ಸುದ್ದಿ ಈಗ ಬಾಬಾನಿಗೆ ಮತ್ತೆ ಸಹಾಯ ಬೇಕಾಗಿ ಅಲ್ಲ. ಈಗ ದೊಡ್ಡ ದೊಡ್ಡ ಕಂಪನಿಗಳೇ ಬಾಬಾ ಸಹಾಯವನ್ನು ತೆಗೆದುಕೊಳ್ಳುತ್ತಿದ್ದಾರೆ!
ದಕ್ಷಿಣ ದೆಹಲಿಯ ಮಾಳವೀಯ ನಗರದಲ್ಲಿ ವಯೋವೃದ್ಧ ಕಾಂತ ಪ್ರಸಾದ್ (ಬಾಬಾ) ದಂಪತಿ ನಡೆಸುವ ‘ಬಾಬಾ ಕಾ ಢಾಬಾ’ದಲ್ಲಿ ಗ್ರಾಹಕರೇ ಇಲ್ಲ ಎಂಬ ಕಾರಣಕ್ಕೆ ಬಾಬಾ ಅತ್ತಿದ್ದ ವಿಡಿಯೋ ಕೆಲವು ದಿನಗಳ ಹಿಂದೆ ವೈರಲ್ ಆಗಿತ್ತು. ಪರಿಣಾಮ ಮಾರನೇ ದಿನವೇ ಅಲ್ಲಿ ಜನಜಂಗುಳಿ ಸೃಷ್ಟಿಯಾಗಿತ್ತು.
ಇದೀಗ ಅದು ಒಂದು ದೆಹಲಿಗರ ಫೇವರಿಟ್ ಈಟೌಟ್ ಎಂಬಂತಾಗಿದ್ದು, ನಿತ್ಯವೂ ಸಾರ್ವಜನಿಕರ ದಂಡು ಅಲ್ಲಿ ಸೇರಿರುತ್ತದೆ. ಮಾತ್ರವಲ್ಲ ಅದೀಗ ದೊಡ್ಡ ದೊಡ್ಡ ಕಂಪನಿಗಳ ಜಾಹೀರಾತು ತಾಣವೂ ಆಗಿದೆ. ತುಂಬ ಕಂಪನಿಗಳವರು ‘ಬಾಬಾ ಕಾ ಢಾಬಾ’ವನ್ನು ತಮ್ಮ ಜಾಹೀರಾತಿಗೆ, ಪ್ರಮೋಷನಲ್ ಆ್ಯಕ್ಟಿವಿಟೀಸ್ಗೆ ಬಳಸಿಕೊಳ್ಳುತ್ತಿದ್ದಾರೆ. ಎಷ್ಟರಮಟ್ಟಿಗೆ ಎಂದರೆ ಅಲ್ಲಿ ಈಗ ವಿವಿಧ ಕಂಪನಿಗಳ ಜಾಹೀರಾತುಗಳು ಆವರಿಸಿದ್ದು, ಒಂದು ಸ್ಟಿಕ್ಕರ್ ಅಂಟಿಸಲು ಅಥವಾ ಪೋಸ್ಟರ್ ಹಚ್ಚಲೂ ಜಾಗ ಹುಡುಕುವಂತಾಗಿದೆ. ಇನ್ನು ಜನರು ಕೂಡ ಇಲ್ಲಿ ನಿಂತು ಢಾಬಾ ಮುಂದೆ, ಬಾಬಾ ಜತೆ ಸೆಲ್ಫೀ ತೆಗೆಯುವಂಥ ಕ್ರೇಜ್ ಕೂಡ ಸೃಷ್ಟಿಯಾಗಿದೆ.
‘ನಾನು ಮೊದಲು ಬರೀ ಮುಕ್ಕಾಲು ಕೆ.ಜಿ. ಅಕ್ಕಿಯ ಅನ್ನ ಮಾರಲು ಪರದಾಡುತ್ತಿದ್ದೆ. ಇದೀಗ ಅರ್ಧ ದಿನದಲ್ಲಿ 5 ಕೆ.ಜಿ. ಅಕ್ಕಿಯ ಅನ್ನ ಮಾರಾಟವಾಗುತ್ತಿದೆ. ಗ್ರಾಹಕರು ಹೆಚ್ಚಾಗಿರುವುದರಿಂದ ಇನ್ನೊಬ್ಬರು ಯಾರನ್ನಾದರೂ ಕೆಲಸಕ್ಕೆ ತೆಗೆದುಕೊಳ್ಳಬೇಕು’ ಎನ್ನುತ್ತಾರೆ ಬಾಬಾ. ಇನ್ನು ಜಾಹೀರಾತಿನ ಬಗ್ಗೆ ಮಾತನಾಡುವ ಅವರು, ‘ಅದು ಸಹಾಯ ಹಾಗೂ ಜಾಹೀರಾತು ಕೂಡ. ನನಗೆ ಈಗ ಸಹಾಯ ಬೇಕಾಗಿಲ್ಲ, ಬೇರೆಯವರಿಗಾದರೂ ಸಹಾಯವಾಗಲಿ’ ಎನ್ನುತ್ತಾರೆ. (ಏಜೆನ್ಸೀಸ್)