ನವದೆಹಲಿ: ಆನಂದ್ ಮಹೀಂದ್ರಾ ಎಂದರೆ ವಾಹನ ಉದ್ಯಮದ ದೊಡ್ಡ ಕೈ ಎನ್ನುವುದು ಎಲ್ಲರಿಗೂ ಗೊತ್ತೇ ಇದೆ. ಇವರು ಮಾಡುವ ಒಂದೊಂದು ಟ್ವೀಟ್ ಕೂಡ ಅರ್ಥಪೂರ್ಣ. ಇದೀಗ ಅವರು ಹಳ್ಳಿ ಜನರು ತಯಾರಿಸಿದ ಬೈಕ್ ಹೋಲುವ ರಿಕ್ಷಾದ ವಿಡಿಯೋವನ್ನು ಟ್ವಿಟರ್ನಲ್ಲಿ ಶೇರ್ ಮಾಡಿದ್ದಾರೆ.
ವಾಹನದ ವೀಡಿಯೊವನ್ನು ಹಂಚಿಕೊಳ್ಳುವಾಗ, ಆನಂದ್ ಮಹೀಂದ್ರಾ ‘ಸರಳ ವಿನ್ಯಾಸದ ಈ ವಾಹನಕ್ಕೆ ಜಾಗತಿಕವಾಗಿ ಉತ್ತಮ ಮಾರುಕಟ್ಟೆ ಸಿಗಬಹುದು. ಇದನ್ನು ಯುರೋಪಿನಲ್ಲಿರುವ ಜನದಟ್ಟಣೆ ಹೆಚ್ಚಾಗಿರುವ ಪ್ರವಾಸಿ ತಾಣಗಳಲ್ಲಿ ಬಳಸಬಹುದೇ? ನಾನು ಯಾವಾಗಲೂ ಗ್ರಾಮೀಣ ಜನರ ನವೀನ ವಾಹನಗಳಿಂದ ಪ್ರಭಾವಿತನಾಗಿದ್ದೇನೆ, ಅಲ್ಲಿ ಅವಶ್ಯಕತೆಯು ಆವಿಷ್ಕಾರದ ತಾಯಿ’ ಎಂದು ಬರೆದಿದ್ದಾರೆ,
ವಿಡಿಯೋದಲ್ಲಿರುವ ವ್ಯಕ್ತಿ ಈ ವಾಹನ ಒಮ್ಮೆ ಚಾರ್ಜ್ ಮಾಡಿದರೆ 150 ಕಿಮೀ ತನಕ ಹೋಗುತ್ತೆ, ಒಮ್ಮೆ ಚಾರ್ಜ್ ಮಾಡಲು 8 ರಿಂದ 10 ರೂ. ಖರ್ಚಾಗುತ್ತದೆ ಎಂದು ಹೇಳಿದ್ದಾರೆ.
ಕೆಲವು ಗಂಟೆಗಳ ಹಿಂದೆ ಪೋಸ್ಟ್ ಮಾಡಲಾಗಿದ್ದ ಈ ವಿಡಿಯೋ ಟ್ವಿಟರ್ನಲ್ಲಿ 1,99,000 ಕ್ಕೂ ಹೆಚ್ಚು ವೀವ್ಸ್ ಪಡೆದುಕೊಂಡಿದೆ. ಕೆಲವರು ಈ ವಾಹನವನ್ನು ಮಾರುಕಟ್ಟೆಗೆ ತರಲು ಸುರಕ್ಷತಾ ಕ್ರಮಗಳನ್ನು ಸೂಚಿಸಿದ್ದಾರೆ. ಕೆಲವರು ‘ಮೃಗಾಲಯ, ಪಾರ್ಕ್, ಕಾರ್ಪ್ ಕಾಂಪ್ಲೆಕ್ಸ್‌ಗಳಂತಹ ಸ್ಥಳಗಳಿಗೆ ಇದು ಉತ್ತಮ ವಾಹನ. ಈ ಐಡಿಯಾ ಸಾಮಾನ್ಯ ಟ್ರಾಫಿಕ್‌ಗೆ ಸರಿಹೊಂದುವುದಿಲ್ಲ. ಆದರೆ ಹೆಚ್ಚು ದೂರ ಕ್ರಮಿಸಲು ಈ ವಾಹನ ಸಹಾಯ ಮಾಡುತ್ತದೆ’ ಎಂದು ಬರೆದಿದ್ದಾರೆ. ಈ ಬಗ್ಗೆ ತಮ್ಮ ಕಂಪೆನಿಯ ಎಲೆಕ್ಟ್ರಿಕ್ ಕಾರುಗಳ ವಿಭಾಗದ ಪ್ರತಾಪ್ ಬೋಸ್ ಎನ್ನುವವರನ್ನೂ ಟ್ಯಾಗ್ ಮಾಡಿದ್ದು ಎಲ್ಲರ ಹುಬ್ಬೇರುವಂತೆ ಮಾಡಿದೆ.