ಆಗ್ರಾ: ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಭೇಟಿ ಹಿನ್ನೆಲೆಯಲ್ಲಿ ಸಾರ್ವಜನಿಕರಿಗೆ ವಿಶ್ವ ವಿಖ್ಯಾತ ಸ್ಮಾರಕ ತಾಜ್ಮಹಲ್ ವೀಕ್ಷಣೆಯನ್ನು ನಿಷೇಧಿಸಲಾಗಿದೆ.
ಟ್ರಂಪ್ ಅವರು ಪತ್ನಿ ಸಮೇತ ತಾಜ್ಮಹಲ್ ಕಟ್ಟಡ ಸಂಕೀರ್ಣಕ್ಕೆ ಸಂಜೆ 5.15ಕ್ಕೆ ಭೇಟಿ ನೀಡುತ್ತಿರುವ ಹಿನ್ನೆಲೆಯಲ್ಲಿ ಸಾರ್ವಜನಿಕರಿಗೆ ಪ್ರವೇಶ ರದ್ದುಪಡಿಸಲಾಗಿದೆ ಎಂದು ಆಗ್ರಾ ಜಿಲ್ಲಾಧಿಕಾರಿ ಪ್ರಭು ಎನ್ ಸಿಂಗ್ ತಿಳಿಸಿದ್ದಾರೆ.
ಅಧ್ಯಕ್ಷ ಟ್ರಂಪ್, ಪತ್ನಿ ಹಾಗೂ ಇಬ್ಬರು ಮಕ್ಕಳೊಂದಿಗೆ ತಾಜ್ ಮಹಲ್ ಸ್ಮಾರಕಕ್ಕೆ ಆಗಮಿಸುವ ಅವರು ಒಂದು ತಾಸು ಅಲ್ಲಿ ಕಳೆಯಲಿದ್ದಾರೆ.
ಸಾರ್ವಜನಿಕರಿಗೆ ಸೋಮವಾರ ಬೆಳಗ್ಗೆ 11 ಗಂಟೆವರೆಗೆ ವೀಕ್ಷಣೆಗೆ ಅವಕಾಶ ಕಲ್ಪಿಸಿ ನಂತರ ಪ್ರವೇಶವನ್ನು ರದ್ದು ಪಡಿಸಲಾಗುವುದು ಎಂದು ಅವರು ತಿಳಿಸಿದ್ದಾರೆ.
ಷಹಜಹಾನ್ 1631ರಲ್ಲಿ ಪತ್ನಿ ಮುಮತಾಜ್ ಮಹಲ್ ನೆನಪಿಗಾಗಿ ಯಮುನಾ ನದಿ ದಡದಲ್ಲಿ ನಿರ್ಮಿಸಿದ ಸ್ಮಾರಕ. ಮಾಲಿನ್ಯದಿಂದ ಕಪ್ಪು ಕಲೆಯಾಗಿರುವ ಸ್ಮಾರಕವನ್ನು ಟ್ರಂಪ್ ಆಗಮನದ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತ ಸ್ವಚ್ಛಗೊಳಿಸಿದೆ. ಅಲ್ಲದೆ ಉದ್ಯಾನವನ್ನು ಉತ್ತಮವಾಗಿ ನಿರ್ವಹಣೆ ಮಾಡಿ ಹಸಿರು ಕಾಪಾಡಿಕೊಳ್ಳಲಾಗಿದೆ. (ಏಜೆನ್ಸೀಸ್)