ಒಂದು ಕಡೆ ವಯಸ್ಸು, ಇನ್ನೊಂದು ಕಡೆ ಅನಾರೋಗ್ಯ, ಮತ್ತೊಂದು ಕಡೆ ಅಷ್ಟೇನೂ ಯಶಸ್ವಿ ಆಗದ ಹಿಂದಿನ ಚಿತ್ರಗಳು … ಇದೆಲ್ಲದರಿಂದ ರಜನಿಕಾಂತ್ ಇನ್ನು ಅಭಿನಯಿಸುವುದು ಸಂಶಯ, ಬಹುಶಃ “ಅಣ್ಣಾತ್ತೆ’ ಅವರ ಕೊನೆಯ ಚಿತ್ರವಾಗುವ ಸಾಧ್ಯತೆ ಇದೆ ಎಂಬ ಗುಸುಗುಸು ಇತ್ತು. ಆದರೆ, ರಜನಿಕಾಂತ್ ಇದನ್ನು ಸುಳ್ಳು ಮಾಡುವುದಕ್ಕೆ ಹೊರಟಿದ್ದಾರೆ. ಎಲ್ಲ ಅಂದುಕೊಂಡಂತೆ ಆದರೆ, ಅವರ ಹೊಸ ಚಿತ್ರ ಏಪ್ರಿಲ್ನಿಂದ ಶುರುವಾಗಲಿದೆ.
ಹೌದು, ಎಷ್ಟೇ ಅಡೆತಡೆಗಳ ನಡುವೆಯೂ, ರಜನಿಕಾಂತ್ಗೆ ಸದ್ಯಕ್ಕೆ ವಿಶ್ರಾಂತಿ ತೆಗೆದುಕೊಳ್ಳುವ ಮನಸ್ಸಿಲ್ಲ. ಒಂದರಹಿಂದೊಂದು ಚಿತ್ರ ಮಾಡುತ್ತಲೇ ಇರಬೇಕು ಎನ್ನುವ ಅವರಿಗೆ ನೆಲ್ಸನ್ ದಿಲೀಪ್ ಕುಮಾರ್ ಹೇಳಿದ ಕಥೆಯೊಂದು ಬಹಳ ಇಷ್ಟವಾಗಿದೆಯಂತೆ.
ಈ ಕಥೆಗೆ ರಜನಿಕಾಂತ್ ಗ್ರೀನ್ ಸಿಗ್ನಲ್ ನೀಡಿದ್ದು, ಅದೇ ಅವರ 169ನೇ ಚಿತ್ರವಾಗಲಿದೆ ಎಂದು ಹೇಳಲಾಗುತ್ತಿದೆ. “ಕೊಲಮಾವು ಕೋಕಿಲ’, “ಡಾಕ್ಟರ್’ ಮತ್ತು ವಿಜಯ್ ಅಭಿನಯದ “ಬೀಸ್ಟ್’ ಚಿತ್ರಗಳನ್ನು ನಿರ್ದೇಶಿಸಿರುವ ನೆಲ್ಸನ್ ದಿಲೀಪ್ ಕುಮಾರ್, ರಜನಿಕಾಂತ್ ಜತೆಗೆ ಚಿತ್ರ ಮಾಡಬೇಕು ಎನ್ನುವುದು ಬಹಳ ವರ್ಷಗಳ ಕನಸ್ಸಾಗಿತ್ತಂತೆ. ಅದು “ತಲೈವಾ 169′ ಮೂಲಕ ಈಡೇರುತ್ತಿದೆ. ಏಪ್ರಿಲ್ ಕೊನೆಗೆ ಪ್ರಾರಂಭವಾಗುವ ಈ ಚಿತ್ರವು, ಮುಂದಿನ ವರ್ಷದ ಸಂಕ್ರಾಂತಿ ವೇಳೆಗೆ ಬಿಡುಗಡೆ ಆಗಲಿದೆಯಂತೆ.