| ಹರ್ಷವರ್ಧನ್ ಬ್ಯಾಡನೂರು
ಇತ್ತೀಚಿನ ಕೆಲ ಬೆಳವಣಿಗೆಗಳು ಡಯಟ್ ಮತ್ತು ವರ್ಕೌಟ್ ಬಗ್ಗೆ ಜನರನ್ನು ಮತ್ತೆ ಯೋಚಿಸುವಂತೆ ಮಾಡಿವೆ. ವರ್ಕೌಟ್ ಮಾಡಿದರೆ ಹೃದಯಾಘಾತ ಸಂಭವಿಸುತ್ತಂತೆ, ಡಯಟ್ ಮಾಡಿದರೆ ಆರೋಗ್ಯ ಸಮಸ್ಯೆ ಉಂಟಾಗುತ್ತಂತೆ ಅಂತೆಲ್ಲ ಮಾತುಗಳು ಕೇಳಿಬರುತ್ತಿವೆ. ಅದರ ನಡುವೆಯೇ “777 ಚಾರ್ಲಿ’, “ಲಕ್ಕಿಮ್ಯಾನ್’ ನಟಿ ಸಂಗೀತಾ ಶೃಂಗೇರಿ ಮೊದಲ ಬಾರಿಗೆ ಸಿಕ್ಸ್ ಪ್ಯಾಕ್ ಮಾಡಿಕೊಂಡಿದ್ದಾರೆ. ಡಯಟ್, ವರ್ಕೌಟ್ ಬಗ್ಗೆ ಏನಂತಾರೆ? ಸಿಕ್ಸ್ ಪ್ಯಾಕ್ ಹೇಗೆ ಮಾಡಿಕೊಂಡರು? ಮುಂದಿನ ಯೋಜನೆಗಳೇನು? ಎಂಬುದನ್ನು ವಿಜಯವಾಣಿ ಜತೆ ಮಾತನಾಡಿದ್ದಾರೆ.
ನನಸಾಯಿತು ಬಾಲ್ಯದ ಕನಸು
ಸಂಗೀತಾಗೆ ಚಿಕ್ಕ ವಯಸ್ಸಿನಿಂದಲೂ ಸಿಕ್ಸ್ ಪ್ಯಾಕ್ ಆಸೆಯಿತ್ತಂತೆ. “ಶಾಲಾದಿನಗಳಿಂದ ಕ್ರೀಡೆಗಳಲ್ಲಿದ್ದೆ. ಆಗಿನಿಂದಲೂ ಸಿಕ್ಸ್ ಪ್ಯಾಕ್ ಆಸೆಯಿತ್ತು. ಬಳಿಕ ಸೀರಿಯಲ್ ಮತ್ತು ಸಿನಿಮಾಗಳಲ್ಲಿ ಬಿಜಿಯಿದ್ದ ಕಾರಣ ಸಾಧ್ಯವಾಗಿರಲಿಲ್ಲ. ಈಗ ಬ್ರೇಕ್ ಸಿಕ್ಕಿತು. 9 ವಾರಗಳಲ್ಲಿ ಸಿಕ್ಸ್ ಪ್ಯಾಕ್ ಮಾಡಿಕೊಂಡೆ. ಫಿಟ್ನೆಸ್ ತರಬೇತುದಾರ ಸವೀನ್ ಅವರಿಂದ ತರಬೇತಿ ಪಡೆದೆ, ಈಗ ಅಂದುಕೊಂಡಿದ್ದನ್ನು ಸಾಧಿಸಿದ ಖುಷಿಯಿದೆ’ ಎಂದು ಹೇಳಿಕೊಳ್ಳುತ್ತಾರೆ.
ಇದನ್ನೂ ಓದಿ : ದುಲ್ಕರ್ ಸಲ್ಮಾನ್ ಜತೆ ಹೀಗೊಂದು ಮಾತುಕತೆ: ಮೊದಲ ಒಟಿಟಿ, ವೆಬ್ಸರಣಿ ಅನುಭವ ಹಂಚಿಕೊಂಡ ನಟ
ಹೇಗಿತ್ತು ವರ್ಕೌಟ್, ಡಯಟ್?
ವರ್ಕೌಟ್ಗಿಂತ ಡಯಟ್ ತುಂಬ ಕಷ್ಟ ಎನ್ನುವ ಸಂಗೀತಾ, “ಪ್ರತಿ ಮೂರು ತಾಸಿಗೆ ದಿನ ಏಳು ಬಾರಿ ಅಲಾರ್ಮ್ ಇಟ್ಟುಕೊಂಡು ಊಟ ಮಾಡಬೇಕು. ಕೋಚ್ ಹೇಳಿದ್ದನ್ನು, ಹೇಳಿದಷ್ಟೇ ತಿನ್ನಬೇಕು. ಪ್ರೋಟಿನ್ ಪೌಡರ್, ಸಪ್ಲಿಮೆಂಟ್ ಸೇವಿಸುವಂತಿಲ್ಲ. ಮೊದಲ ಎರಡು ವಾರ ಕಷ್ಟವಿತ್ತು, ಹೀಗಾಗಿ ಅತ್ತಿದ್ದೂ ಇದೆ. ಪ್ರತಿದಿನ ಜಿಮ್ಗೆ ಹೋಗಿ ಬರಲು 52 ಕಿಮೀ ಕ್ರಮಿಸಬೇಕಿತ್ತು. ಒಂದೂವರೆ ತಾಸು ವರ್ಕೌಟ್ ಮಾಡುತ್ತಿದ್ದೆ. ಮೊದಲೆಲ್ಲ ದೋಸೆ, ಸಮೋಸ, ಸ್ವೀಟ್ಸ್ ತಿನ್ನಬೇಕು ಅಂತ ಆಸೆಯಾಗುತ್ತಿತ್ತು. ಈಗ ಹೋಟೆಲ್ಗೆ ಹೋದರೂ ತಿನ್ನಬೇಕು ಅನ್ನಿಸುವುದಿಲ್ಲ’ ಎಂದು ಮಾಹಿತಿ ನೀಡುತ್ತಾರೆ.
ವರ್ಕೌಟ್ನಿಂದ ಹೃದಯಾಘಾತ ಸಂಭವಿಸುತ್ತಾ?
ಡಯಟ್, ವರ್ಕೌಟ್ ಮತ್ತು ಹೃದಯಾಘಾತ ಪ್ರಕರಣಗಳ ಬಗ್ಗೆ ಸಂಗೀತಾ, “ಪ್ರತಿದಿನ ಅಪಘಾತದಿಂದ ಸಾವುಗಳಾಗುತ್ತವೆ. ಹಾಗಂತ ಎಲ್ಲರೂ ಗಾಡಿ ಓಡಿಸುವುದನ್ನು ಬಿಡುವುದಿಲ್ಲ ಅಲ್ಲವಾ? ಜಾಸ್ತಿ ವರ್ಕೌಟ್ ಮಾಡಬೇಡಿ ಅಂತ ನನಗೂ ಹಲವರು ಕಮೆಂಟ್ ಮಾಡಿದ್ದರು. ಕಷ್ಟದಲ್ಲಿ ತಪ್ಪು ಕಂಡುಬಂದರೆ, ಕಷ್ಟಪಡುವುದೇ ಬೇಡ ಅಂತ ನೆಪ ಮಾಡಿಕೊಳ್ಳುವವರು ಹಾಗನ್ನುತ್ತಾರೆ. ವರ್ಕೌಟ್, ಡಯಟ್ ಬಗ್ಗೆ ತಿಳಿದಿರುವವರು ಹಾಗೆ ಮಾತನಾಡುವುದಿಲ್ಲ. ಕೆಲವರು ಆ್ಯಪ್ಸ್, ಗೂಗಲ್, ಮತ್ತೊಬ್ಬರ ಡಯಟ್ ಫಾಲೋ ಮಾಡುತ್ತಾರೆ. ಪ್ರತಿಯೊಬ್ಬರ ಡಯಟ್ ಬೇರೆ ಬೇರೆ ಇರುತ್ತದೆ. ನುರಿತ, ಅನುಭವಿ ಕೋಚ್ಗಳ ಬಳಿ ತರಬೇತಿ ಪಡೆಯಬೇಕು. ಡಯಟ್ ಅಂದರೆ ಊಟ ಬಿಡುವುದಲ್ಲ. ವರ್ಕೌಟ್ ಮಾಡಲಿ, ಮಾಡದಿರಲಿ ಸಾವು ಬಂದೇಬರುತ್ತದೆ. ಮಾನಸಿಕ, ದೈಹಿಕ ಸದೃಢತೆಗೆ ವರ್ಕೌಟ್ ಮಾಡಲೇಬೇಕು’ ಎನ್ನುತ್ತಾರೆ.
ಇದನ್ನೂ ಓದಿ : ಬಾಕ್ಸ್ ಆಫೀಸ್ನಲ್ಲಿ ‘ಜೈಲರ್’ ದಾಖಲೆ; ಸ್ನೇಹಿತರೊಟ್ಟಿಗೆ ಹಿಮಾಲಯಕ್ಕೆ ತೆರಳಿದ ತಲೈವಾ
ಕಷ್ಟಪಡುವ ಪಾತ್ರಕ್ಕೆ ಕಾಯುತ್ತಿದ್ದೇನೆ
ಸಂಗೀತಾ ವರ್ಕೌಟ್ ಜತೆಗೆ ಕಥೆಗಳನ್ನೂ ಕೇಳುತ್ತಿದ್ದಾರಂತೆ. “ಈಗ ಆಯ್ಕೆಯ ವಿಷಯದಲ್ಲಿ ತುಂಬ ಎಚ್ಚರವಹಿಸಿದ್ದೇನೆ. ಕಷ್ಟವಾದರೂ ಪರವಾಗಿಲ್ಲ ಇಷ್ಟವಾಗುವ ಪಾತ್ರ ಮಾಡಬೇಕು ಅಂತ ನಿರ್ಧರಿಸಿದ್ದೇನೆ’ ಎಂದು ಹೇಳಿಕೊಳ್ಳುತ್ತಾರೆ.