ಬೆಂಗಳೂರು: ಐಪಿಎಲ್-17ರಲ್ಲಿ ಈಗಾಗಲೆ ಲೀಗ್ ಹಂತದ 63 ಪಂದ್ಯಗಳು ಮುಗಿದಿದ್ದು, 7 ಪಂದ್ಯಗಳಷ್ಟೇ ಬಾಕಿ ಇದೆ. ಆದರೆ ಇದುವರೆಗೆ ಕೆಕೆಆರ್ ಒಂದೇ ಪ್ಲೇಆಫ್ ಪ್ರವೇಶ ಖಚಿತಪಡಿಸಿಕೊಂಡಿದ್ದು, ಮುಂಬೈ ಇಂಡಿಯನ್ಸ್, ಪಂಜಾಬ್ ಕಿಂಗ್ಸ್ ಜತೆಗೆ ಮಳೆ ಕಾಟದಿಂದಾಗಿ ಹಾಲಿ ರನ್ನರ್ಅಪ್ ಗುಜರಾತ್ ಟೈಟಾನ್ಸ್ ಕೂಡ ಸೋಮವಾರ ಅಧಿಕೃತವಾಗಿ ರೇಸ್ನಿಂದ ಹೊರಬಿದ್ದಿದೆ. ಉಳಿದ 3 ಸ್ಥಾನಗಳಿಗಾಗಿ 6 ತಂಡಗಳ ನಡುವೆ ಪೈಪೋಟಿ ಏರ್ಪಟ್ಟಿದೆ. ಈ ಪೈಕಿ ಕೆಟ್ಟ ರನ್ರೇಟ್ನಿಂದಾಗಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಕೊನೇ ಪಂದ್ಯ ಗೆದ್ದರೂ ಪ್ಲೇಆಫ್ಗೇರುವುದು ಬಹುತೇಕ ಅಸಾಧ್ಯವೆನಿಸಿದೆ.
ಸತತ 3 ಸೋಲಿನಿಂದ ರಾಜಸ್ಥಾನ ರಾಯಲ್ಸ್ ಲಯ ತಪ್ಪಿದ್ದರೂ, ಈಗಾಗಲೆ 8 ಪಂದ್ಯ ಗೆದ್ದಿರುವುದರಿಂದ ಪ್ಲೇಆಫ್ ಪ್ರವೇಶ ಬಹುತೇಕ ಖಚಿತವೆನಿಸಿದೆ. ಸನ್ರೈಸರ್ಸ್ ಪ್ಲೇಆಫ್ಗೇರುವ ಮತ್ತೊಂದು ನೆಚ್ಚಿನ ತಂಡವಾಗಿದ್ದು, ಉಳಿದ ಎರಡೂ ಪಂದ್ಯ ಸೋತರಷ್ಟೇ ಹೊರಬೀಳುವ ಅಪಾಯ ಹೊಂದಿದೆ. ಲಖನೌ ತಂಡ ಕೊನೇ 2 ಪಂದ್ಯ ಗೆದ್ದು ಪ್ಲೇಆಫ್ಗೇರುವ ಅವಕಾಶ ಹೊಂದಿದೆ. ಆದರೆ ಇದೇ ವೇಳೆ ರನ್ರೇಟ್ ಭಾರಿ ಸುಧಾರಣೆ ಕಾಣದಿದ್ದರೆ ಲಖನೌ ತಂಡ ಪ್ಲೇಆಫ್ಗೇರಲು, ಆರ್ಸಿಬಿ ವಿರುದ್ಧದ ಕೊನೇ ಪಂದ್ಯದಲ್ಲಿ ಸಿಎಸ್ಕೆ ಸೋಲಲಿ ಅಥವಾ ಸನ್ರೈಸರ್ಸ್ ಉಳಿದೆರಡೂ ಪಂದ್ಯ ಸೋಲಲಿ ಎಂದು ಪ್ರಾರ್ಥಿಸಬೇಕಾಗುತ್ತದೆ.
ಇನ್ನು ಹಾಲಿ ಚಾಂಪಿಯನ್ ಚೆನ್ನೈ ಸೂಪರ್ಕಿಂಗ್ಸ್ ತಂಡ ಪ್ಲೇಆ್ಗೇರಬೇಕಾದರೆ, ಕೊನೇ ಪಂದ್ಯದಲ್ಲಿ ಜಯಿಸುವ ಜತೆಗೆ ಸನ್ರೈಸರ್ಸ್ ತಂಡ ಉಳಿದ 2ರಲ್ಲಿ ಒಂದಾದರೂ ಸೋಲಲಿ ಅಥವಾ ಲಖನೌ ಉಳಿದೆರಡು ಪಂದ್ಯ ಗೆದ್ದರೂ ರನ್ರೇಟ್ ಸುಧಾರಿಸದಿರಲಿ ಎಂದು ಪ್ರಾರ್ಥಿಸಬೇಕಾಗಿದೆ. ಸಿಎಸ್ಕೆ ಕೊನೇ ಪಂದ್ಯದಲ್ಲಿ ಆರ್ಸಿಬಿ ವಿರುದ್ಧ ಅಲ್ಪ ಅಂತರದಲ್ಲಿ ಸೋತರೂ ಪ್ಲೇಆಫ್ ಅವಕಾಶವಿದ್ದು, ಆಗ ಸನ್ರೈಸರ್ಸ್ ಉಳಿದೆರಡೂ ಅಥವಾ ಲಖನೌ ಒಂದಾದರೂ ಪಂದ್ಯ ಸೋಲಬೇಕಾಗುತ್ತದೆ.
ಉಳಿದ 7 ಲೀಗ್ ಪಂದ್ಯಗಳು
ಮೇ 14: ಡೆಲ್ಲಿ-ಲಖನೌ (ನವದೆಹಲಿ)
ಮೇ 15: ರಾಜಸ್ಥಾನ-ಪಂಜಾಬ್ (ಗುವಾಹಟಿ)
ಮೇ 16: ಸನ್ರೈಸರ್ಸ್-ಗುಜರಾತ್ (ಹೈದರಾಬಾದ್)
ಮೇ 17: ಮುಂಬೈ-ಲಖನೌ (ಮುಂಬೈ)
ಮೇ 18: ಆರ್ಸಿಬಿ-ಸಿಎಸ್ಕೆ (ಬೆಂಗಳೂರು)
ಮೇ 19: ಸನ್ರೈಸರ್ಸ್-ಪಂಜಾಬ್ (ಹೈದರಾಬಾದ್)
ಮೇ 19: ರಾಜಸ್ಥಾನ-ಕೆಕೆಆರ್ (ಗುವಾಹಟಿ).
ಆರ್ಸಿಬಿ ವಿರುದ್ಧ ಡೆಲ್ಲಿ ತಂಡದ ಸೋಲಿಗೆ ಕಾರಣ ವಿವರಿಸಿದ ಹಂಗಾಮಿ ನಾಯಕ ಅಕ್ಷರ್ ಪಟೇಲ್