ಬೆಂಗಳೂರು: ನಟ ರಕ್ಷಿತ್ ಶೆಟ್ಟಿ ಅಭಿನಯದ ಸೂಪರ್ ಹಿಟ್ “777 ಚಾರ್ಲಿ” ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿ, ತನ್ನ ಅಭಿನಯದಿಂದಲೇ ಎಲ್ಲರ ಮನಸ್ಸನ್ನು ಗೆದ್ದಿರುವ ಶ್ವಾನ, ವಾರದ ಹಿಂದಷ್ಟೇ 6 ಮರಿಗಳಿಗೆ ಜನ್ಮ ನೀಡಿದೆ. ಈ ಸುದ್ದಿಯನ್ನು ಸ್ವತಃ ರಕ್ಷಿತ್ ಶೆಟ್ಟಿಯವರು ತಮ್ಮ ಸಾಮಾಜಿಕ ಜಾಲತಾಣದ ಮೂಲಕ ಹಂಚಿಕೊಂಡು ಖುಷಿ ವ್ಯಕ್ತಪಡಿಸಿದ್ದಾರೆ.
ಶ್ವಾನ ತರಬೇತುದಾರ ಬಿ.ಸಿ. ಪ್ರಮೋದ್ ಅವರ ಮೈಸೂರಿನ ಡಿ. ಸಾಲುಂಡಿ ಗ್ರಾಮದ ನಿವಾಸದಲ್ಲಿ ಚಾರ್ಲಿಗೆ ಚೊಚ್ಚಲ ಹೆರಿಗೆಯಾಗಿದೆ. ಜನ್ಮ ನೀಡಿದ ಒಟ್ಟು ಆರು ಮರಿಗಳಲ್ಲಿ ಐದು ಹೆಣ್ಣು ಮತ್ತು ಒಂದು ಗಂಡು. ತಾಯಿ ಮತ್ತು ಮರಿಗಳು ಆರೋಗ್ಯವಾಗಿವೆ ಎಂದು ತಿಳಿದುಬಂದಿದೆ.
ಈ ವಿಷಯ ತಿಳಿಯುತ್ತಿದ್ದಂತೆ ಸಂತಸ ವ್ಯಕ್ತಪಡಿಸಿರುವ ರಕ್ಷಿತ್ ಶೆಟ್ಟಿ, ಬುಧವಾರ (ಮೇ 15) ಮೈಸೂರಿನ ಸಾಲುಂಡಿಗೆ ಆಗಮಿಸಿ, ಚಾರ್ಲಿ ಮತ್ತು ಅದರ ಮರಿಗಳನ್ನು ನೋಡಿ ಸಂಭ್ರಮಿಸಿದ್ದಾರೆ. ಅಲ್ಲದೆ, ಸ್ಥಳದಿಂದಲೇ ಇನ್ಸ್ಟಾಗ್ರಾಂ ಲೈವ್ ಬಂದು, ಇದೊಂದು ಸರ್ಪ್ರೈಸ್ ಲೈವ್, 777 ಚಾರ್ಲಿ ಸಿನಿಮಾ ಬಿಡುಗಡೆಯಾಗಿ 2 ವರ್ಷ ಕಳೆಯುತ್ತಾ ಬಂತು. ನನಗೆ ಮತ್ತು ‘777 ಚಾರ್ಲಿ’ ಚಿತ್ರತಂಡಕ್ಕೆ ಚಾರ್ಲಿ ತಾಯಿಯಾಗಬೇಕು ಎಂಬ ಆಲೋಚನೆ ಇತ್ತು. ಚಾರ್ಲಿ ತಾಯಿಯಾದರೆ ಈ ಪಯಣ ಸಂಪೂರ್ಣವಾಗಲಿದೆ ಎಂಬ ಭಾವನೆ ಇತ್ತು. ನಾನು ಯಾವಾಗಲೂ ಪ್ರಮೋದ್ ಅವರಿಗೆ ಕರೆ ಮಾಡಿ ವಿಚಾರಿಸುತ್ತಿದ್ದೆ. ಚಾರ್ಲಿಗೆ ವಯಸ್ಸಾಗಿದೆ ಏನಾಗುತ್ತದೆ ಅಂತಾ ಕಾದು ನೋಡಬೇಕು ಎಂದು ಹೇಳುತ್ತಿದ್ದರು. ಅಂತಿಮವಾಗಿ ಅಚ್ಚರಿಯೆಂಬಂತೆ ಮೇ 9ರಂದು ಚಾರ್ಲಿ 6 ಮರಿಗಳಿಗೆ ಜನ್ಮ ನೀಡಿದೆ. ಕೊನೆಗೂ ಚಾರ್ಲಿ ಲೈಫ್ ಜರ್ನಿ ಕಂಪ್ಲೀಟ್ ಆಯಿತು ಎಂದಿದ್ದಾರೆ.
ಚಾರ್ಲಿ ಮರಿಗಳಿಗೆ ಜನ್ಮ ನೀಡಿದ ವಿಚಾರ ತಿಳಿಯುತ್ತಿದ್ದಂತೆ ನಾನು ಮೈಸೂರಿಗೆ ಬಂದೆ. ನೀವು 777 ಚಾರ್ಲಿ ಚಿತ್ರದ ಮೇಲೆ ತೋರಿದ ಪ್ರೀತಿಗಾಗಿ ನಾನು ನಿಮಗೆ ಚಾರ್ಲಿ ಮತ್ತು ಅದರ ಮರಿಗಳನ್ನು ತೋರಿಸಬೇಕು ಅಂತ ಈ ಲೈವ್ ಬಂದೆ ಎಂದು ರಕ್ಷಿತ್ ಶೆಟ್ಟಿ ಹೇಳಿದ್ದಾರೆ.
ಶ್ವಾನ ತರಬೇತುದಾರ ಪ್ರಮೋದ್ ಮಾತನಾಡಿ, ವಾರದ ಹಿಂದೆಷ್ಟೇ ಚಾರ್ಲಿ ನಮ್ಮ ಮನೆಯಲ್ಲಿ 6 ಮರಿಗಳಿಗೆ ಜನ್ಮ ನೀಡಿದೆ. ಎಲ್ಲ ಮರಿಗಳು ಮತ್ತು ಚಾರ್ಲಿ ಆರೋಗ್ಯವಾಗಿದ್ದಾರೆ. ನಟ ರಕ್ಷಿತ್ ಶೆಟ್ಟಿಯವರು ಮನೆಗೆ ಆಗಮಿಸಿ, ಚಾರ್ಲಿ ಮತ್ತು ಅದರ ಮರಿಗಳನ್ನು ನೋಡಿಕೊಂಡು ಹೋಗಿದ್ದು, ತುಂಬಾ ಖುಷಿ ಕೊಟ್ಟಿದೆ ಎಂದು ಹೇಳಿದ್ದಾರೆ.
ಪ್ಲೇಆಫ್ಗೇರಲು RCB-CSK ನಡುವೆ ಹೈವೋಲ್ಟೇಜ್ ಪಂದ್ಯ! ಭಜ್ಜಿ ಪ್ರಕಾರ ಗೆಲ್ಲೋದು ಇವರೇ…
ಆರ್ಸಿಬಿ ಈ ಒಂದು ಕೆಲಸ ಮಾಡಿದ್ರೆ ಸಾಕು ಪ್ಲೇಆಫ್ ಅಲ್ಲ ಕಪ್ ಸಹ ಗೆಲ್ಲುತ್ತದೆ ಎಂದ ಮೊಹಮ್ಮದ್ ಕೈಫ್!