ಭೋಪಾಲ್: ರಾಷ್ಟ್ರಾದ್ಯಂತ ಕರೊನಾ ಭೀತಿ. ಲಾಕ್ಡೌನ್ ನಿಯಮ ಮೀರಿ ಮನೆಯಿಂದ ಹೊರಗೆ ಹೋಗುವಂತಿಲ್ಲ. ಆದರೆ ಕೆಲವು ಸ್ಯಾಡಿಸ್ಟ್ಗಳಿಗೆ, ರೇಪಿಸ್ಟ್ಗಳಿಗೆ ಇದೆಲ್ಲ ಅನ್ವಯ ಆಗುವುದೇ ಇಲ್ಲ. ಈಗ ಭೋಪಾಲ್ನಲ್ಲಿ ಒಂದು ಅಮಾನವೀಯ ಘಟನೆ ನಡೆದಿದೆ. ಪಾಪಿಯನ್ನು ಪೊಲೀಸರು ಹುಡುಕುತ್ತಿದ್ದಾರೆ.
ಮೂಲತಃ ರಾಜಸ್ಥಾನದ ಸಿರೋಹಿ ಜಿಲ್ಲೆಯವರಾದ 53 ವರ್ಷದ ಮಹಿಳೆಯೋರ್ವರು ಭೋಪಾಲ್ನ ಪಾಶ್ ಶಹ್ಪುರದಲ್ಲಿರುವ ತಮ್ಮ ಫ್ಲಾಟ್ನಲ್ಲಿ ಒಬ್ಬರೇ ಇದ್ದರು. ಅವರು ರಾಜ್ಯಸರ್ಕಾರದ ಬ್ಯಾಂಕ್ವೊಂದರಲ್ಲಿ ಮ್ಯಾನೇಜರ್. ಪತಿ ಕೆಲವು ದಿನಗಳ ಹಿಂದೆ ರಾಜಸ್ಥಾನಕ್ಕೆ ಹೋದವರು, ಲಾಕ್ಡೌನ್ ಇದ್ದುದರಿಂದ ಅವರಿಗೆ ವಾಪಸ್ ಬರಲು ಆಗಿರಲಿಲ್ಲ. ಹಾಗಾಗಿ ಮಹಿಳೆಯೋರ್ವರೇ ಫ್ಲಾಟ್ನಲ್ಲಿ ಇದ್ದರು. ಅವರಿಗೆ ದೃಷ್ಟಿದೋಷ ಕೂಡ ಇದೆ.
ಆದರೆ ಶುಕ್ರವಾರ ಅವರ ಪಾಲಿಗೆ ಅಶುಭ ಕಾದಿತ್ತು. ಅದ್ಯಾವುದೋ ಅಪರಿಚಿತ ವ್ಯಕ್ತಿಯೋರ್ವ ಮನೆಗೆ ನುಗ್ಗಿ ವಯಸ್ಸಾದ ಮಹಿಳೆ ಮೇಲೆ ಅತ್ಯಾಚಾರ ಮಾಡಿದ್ದ. ಇಂಥ ಲಾಕ್ಡೌನ್ ಇದೆ. ರಸ್ತೆ ಮೇಲೆ ಜನರು ಓಡಾಡಬಾರದು ಎಂದು ನಿಯಮವೇ ಇದೆ. ಬಹುತೇಕ ಎಲ್ಲ ಏರಿಯಾಗಳಲ್ಲೂ ಪೊಲೀಸ್ ಕಣ್ಗಾವಲು ಇದೆ. ಹಾಗಿದ್ದರೂ ಫ್ಲಾಟ್ಗೆ ನುಗ್ಗಿ ಅತ್ಯಾಚಾರ ಮಾಡಿದ್ದಾನೆ.
ಈತ ಏಣಿಯನ್ನು ಬಳಸಿ ಕಟ್ಟಡದ ಸೆಕೆಂಡ್ ಫ್ಲೋರ್ಗೆ ಹೋಗಿ, ನಂತರ ಬಾಲ್ಕನಿಯ ಬಾಗಿಲಿನಿಂದ ಬ್ಯಾಂಕ್ ಮ್ಯಾನೇಜರ್ ಮನೆಗೆ ನುಗ್ಗಿದ್ದಾನೆ ಎಂದು ಪ್ರಾಥಮಿಕ ತನಿಖೆಯಲ್ಲಿ ಗೊತ್ತಾಗಿದ್ದಾಗಿ ಪೊಲೀಸರು ತಿಳಿಸಿದ್ದಾರೆ.
ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. (ಏಜೆನ್ಸೀಸ್)