ಥೈಲ್ಯಾಂಡ್: 26 ಜನರನ್ನು ಗುಂಡಿಕ್ಕಿ ಕೊಂದ ಸೈನಿಕನಿಗೆ ವೈಯಕ್ತಿಕ ಸಮಸ್ಯೆ ಇತ್ತು. ಹಾಗಾಗಿ ಈ ಕೃತ್ಯ ಎಸಗಿದ್ದಾನೆ ಎಂದು ಥಾಯ್ ಪ್ರಧಾನ ಮಂತ್ರಿ ಪ್ರಯುತ್ ಚಾನ್ ಒ ಚಾ ಭಾನುವಾರ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಶಾಪಿಂಗ್ ಮಾಲ್ನಲ್ಲಿ ಗುಂಡಿಕ್ಕಿ 26 ಮಂದಿ ಸಾವಿಗೆ ಕಾರಣವಾದ ಆತನನ್ನು ಕಮಾಂಡೋಗಳು ಗುಂಡಿಕ್ಕಿದ್ದರು. ಇಂತಹ ಘಟನೆ ಥೈಲ್ಯಾಂಡ್ನಲ್ಲಿ ಹಿಂದೆಂದೂ ನಡೆದಿರಲಿಲ್ಲ. ಇದೇ ಕೊನೆಯಾಗಲಿ ಎಂದು ನಾನು ಬಯಸುತ್ತೇನೆ ಎಂದು ಪ್ರಧಾನಿ ಅಭಿಪ್ರಾಯಪಟ್ಟರು.
ಗುಂಡಿನ ದಾಳಿ ನಡೆದ ಮಾಲ್ನ ಟರ್ಮಿನಲ್ 21ರಲ್ಲಿ ಅಷ್ಟು ಜನ ಇದ್ದರು ಎಂದು ತಿಳಿದಿರಲಿಲ್ಲ. ಬ್ಯಾರಕ್ಗಳಿಂದ ಕದ್ದ ಶಸ್ತ್ರಾಸ್ತ್ರಗಳನ್ನು ಬಳಸಿ ಗುಂಡಿನ ದಾಳಿ ನಡೆಸಿದ್ದಾನೆ. ಇದಕ್ಕೆ ಅವನು ರಾತ್ರಿಯಿಡೀ ಹೊರಗೆ ಕಾಯುತ್ತಿದ್ದ ಎಂದು ಮಾಹಿತಿ ನೀಡಿದ್ದಾರೆ.
ಗುಂಡಿನ ದಾಳಿ ನಡೆಸಿದವನು ಕಿರಿಯ ಸೇನಾಧಿಕಾರಿ ಸಾರ್ಜೆಂಟ್-ಮೇಜರ್ ಜಕ್ರಪಾಂತ್ ಥೋಮ್ಮ ಎಂದು ಗುರುತಿಸಲಾಗಿದೆ. ಮುಂಜಾನೆಯ ಹೊತ್ತಿಗೆ ಶಾಪಿಂಗ್ ಮಾಲ್ನ ನೆಲಮಹಡಿಯಲ್ಲಿ ಗುಂಡಿನ ಚಕಮಕಿ ನಡೆದಿದೆ. ತಕ್ಷಣ ಭದ್ರತಾ ಸೇವೆಗಳು ನೆಲ ಮಹಡಿಗೆ ನುಗ್ಗಿ, ಭಯಭೀತರಾದ ಸಾರ್ವಜನಿಕರನ್ನು ರಕ್ಷಿಸಿದ್ದಾರೆ.
ಥಾಯ್ ಪೊಲೀಸ್ನ ಕಮಾಂಡೋಗಳು ಗುಂಡಿನ ದಾಳಿ ನಡೆಸಿದ ಸೇನಾ ಅಧಿಕಾರಿಯನ್ನು ಗುಂಡಿಕ್ಕಿ ಕೊಂದಿದ್ದಾರೆ. ಈ ಕಾರ್ಯಚರಣೆಯಲ್ಲಿ ಭದ್ರತಾ ಪಡೆಯ ನೂರಾರು ಅಧಿಕಾರಿಗಳು ಭಾಗವಹಿಸಿದ್ದರು.
ಭದ್ರತಾ ಪಡೆಗಳು ದಾಳಿ ನಡೆಸಿದ ತಕ್ಷಣ ಅವನು ಗಾಯಗೊಂಡನು. ಆದ್ದರಿಂದ ಮತ್ತೆ ಗುಂಡಿನ ದಾಳಿ ನಡೆಸಲಾಗಲಿಲ್ಲ. ವಾರದ ಕೊನೆ ದಿನವಾದ್ದರಿಂದ ಶಾಪಿಂಗ್ ಮಾಲ್ ತುಂಬಿತ್ತು. ಆದರೆ ಇಂತಹ ಭಯಾನಕ ಘಟನೆ ನಡೆದೇ ಹೋಯಿತು ಉಪ ಪ್ರಧಾನಿ ಅನುತಿನ್ ಚಾರ್ನ್ವಿರಾಕುಲ್ ವಿವರಿಸಿದರು.
“ಇದು ಒಂದು ಕನಸಿನಂತಾಗಿತ್ತು. ನನ್ನ ಅದೃಷ್ಟ ಬದುಕಿಬಂದೆ” ಎನ್ನುತ್ತಾರೆ 48 ವರ್ಷದ ಸೊತ್ತಿಯಾನೀ ಉಂಚಾಲಿ. ಗುಂಡಿನ ಸದ್ದು ಕೇಳಿದ ತಕ್ಷಣ ನಾನು ಟಾಯ್ಲೆಟ್ ಒಳಗೆ ಓಡಿದೆ. ಆದರೆ ಮೃತಪಟ್ಟವರ ಬಗ್ಗೆ ವಿಷಾದವಿದೆ ಎಂದಿದ್ದಾರೆ.
ಥಾಯ್ಲೆಂಡ್ ರಾಷ್ಟ್ರವು ವಿಶ್ವದಲ್ಲೇ ಅತಿ ಹೆಚ್ಚು ಬಂದೂಕು ಮಾಲೀಕತ್ವವನ್ನು ಹೊಂದಿರುವ ದೇಶ. ಕಳೆದ ವರ್ಷ ನಡೆದ ಹಲವು ಗುಂಡಿನ ದಾಳಿಗಳ ಪ್ರಕರಣಗಳ ಬಗ್ಗೆ ನ್ಯಾಯಾಲಯಗಳಲ್ಲಿ ವಿಚಾರಣೆ ನಡೆಯುತ್ತಿದೆ. (ಏಜೆನ್ಸೀಸ್)