ಧಾರವಾಡ: ಇಲ್ಲಿಯ ಹಿಂದು ಕುಟುಂಬವೊಂದು ಗಣೇಶ, ಮೊಹರಂ ಹಬ್ಬದಾಚರಣೆಯ ಮೂಲಕ ಭಾವೈಕ್ಯ ಸಾರುತ್ತಿದೆ. ನಗರದ ಭೂಸಪ್ಪ ಚೌಕ್ನ ಮೇದಾರ ಓಣಿಯ ಮುಧೋಳ ಕುಟುಂಬದವರು ಗಣೇಶ ಮೂರ್ತಿ ಹಾಗೂ ದಾವಲ್ ಮಲ್ಲಿಕ್ ಪಾಂಜಾ ಪ್ರತಿಷ್ಠಾಪಿಸಿ ಪೂಜೆಗೈಯುತ್ತಿದ್ದಾರೆ.
ಮಹಾದೇವಪ್ಪ ಹಾಗೂ ನೀಲವ್ವ ದಂಪತಿ ಕಳೆದ 40 ವರ್ಷಗಳಿಂದ ಈ ವಿಶಿಷ್ಟ ಸಂಪ್ರದಾಯ ಪಾಲಿಸಿಕೊಂಡು ಬಂದಿದ್ದರು. ಈ ವರ್ಷ ಅವರ ಅನುಪಸ್ಥಿತಿಯಲ್ಲಿ ಮಕ್ಕಳಾದ ಸುಧೀರ ಮುಧೋಳ ಹಾಗೂ ಸಹೋದರರು ತಂದೆ- ತಾಯಿಯ ಸಂಪ್ರದಾಯವನ್ನು ಪಾಲಿಸುತ್ತಿದ್ದಾರೆ. ನಿತ್ಯವೂ ಗಣೇಶನಿಗೆ ಪೂಜೆಗೈದು ಆರತಿ, ನೈವೇದ್ಯ ಅರ್ಪಿಸುತ್ತಾರೆ. ಪಾಂಜಾಗಳಿಗೆ ಮುಸ್ಲಿಂ ಸಂಪ್ರದಾಯದಂತೆ ಪೂಜೆ ಸಲ್ಲಿಸುತ್ತಿದ್ದಾರೆ. ಕೋಮು ಸೌಹಾರ್ದತೆ ಸಾರುವ ಈ ಆಚರಣೆ ತಿಳಿದು ಸಾರ್ವಜನಿಕರು ಮುಧೋಳ ಅವರ ಮನೆಗೆ ತೆರಳಿ ಭಕ್ತಿ ಸಮರ್ಪಿಸುತ್ತಿದ್ದಾರೆ.