ಸಂತೆ ಕರ ಲಿಲಾಲು- ದಾಖಲೆ ಬರೆದ ವಿಜಯಪುರ ಮಹಾನಗರ ಪಾಲಿಕೆ

ವಿಜಯಪುರ: ಐತಿಹಾಸಿಕ ಗುಮ್ಮಟ ನಗರಿಯ ವಿವಿಧ ಸಂತೆ ಬಜಾರ್‌ಗಳ ಲಿಲಾವು ಪ್ರಕ್ರಿಯೆಯಲ್ಲಿ 99.25 ಲಕ್ಷ ರೂ.ಗಳಿಗೆ ಬೇಡಿಕೆ ಬರುವ ಮೂಲಕ ಐತಿಹಾಸಿಕ ದಾಖಲೆ ಬರೆದಿದೆ.
ಗುರುವಾರ ಮಹಾನಗರ ಪಾಲಿಕೆಯಲ್ಲಿ 2022-23ನೇ ಸಾಲಿಗೆ ಸಂತೆ ಬಜಾರ್, ಸಂಡೆ ಬಜಾರ್, ನೆಹರು ಮಾರುಕಟ್ಟೆ ಒಳಬದಿಯಲ್ಲಿರುವ ಕಟ್ಟೆಗಳು ಹಾಗೂ ಕೋಳಿ ಬಜಾರ್ ಬಹಿರಂಗ ಲಿಲಾವು ಪ್ರಕ್ರಿಯೆ ನಡೆಯಿತು.
ಈ ವೇಳೆ ಸಂತೆ ಬಜಾರ್ ಹಾಗೂ ಸಂಡೆ ಬಜಾರ್ ಲಿಲಾವು ಮೊತ್ತ 99.25 ಲಕ್ಷ ರೂ.ಗಳಿಗೆ ಬಂದು ನಿಂತಿತು. ಈ ಮೊತ್ತದೊಂದಿಗೆ ಜಿಎಸ್‌ಟಿ ಶೇ. 18 ಸೇರಿ ಒಟ್ಟು 1,17,11,500 ರೂ.ಗಳಾಗುತ್ತದೆ. ಇದು ಹಿಂದಿನ ದರಕ್ಕಿಂತ ಐದು ಪಟ್ಟು ಹೆಚ್ಚಾಗಿದ್ದು, ಪಾಲಿಕೆ ಇತಿಹಾಸದಲ್ಲೇ ಇದು ಮೊದಲು ಎನ್ನುತ್ತಾರೆ ಅಧಿಕಾರಿಗಳು.
ಈ ಹಿಂದೆ 2018-19ರಲ್ಲಿ ಲಿಲಾವು ಪ್ರಕ್ರಿಯೆ ನಡೆದಿತ್ತು. ಪ್ರತಿ ವರ್ಷ ಶೇ.5ರಂತೆ ಮೊತ್ತ ಹೆಚ್ಚಿಸಿ ಮುಂದುವರಿಸಲಾಗಿತ್ತು. ಇದೀಗ ನಡೆದ ಹರಾಜು ಆರ್.ಎಚ್. ಜಾನವೇಕರ ಪಡೆದಿದ್ದಾರೆ.
ಇನ್ನು ನೆಹರು ಮಾರುಕಟ್ಟೆ ಒಳಬದಿಯಲ್ಲಿರುವ ಕಟ್ಟೆಗಳ ಲಿಲಾವು 2017-18ರಲ್ಲಿ ನೆರವೇರಿಸಲಾಗಿತ್ತು. ಇದೀಗ ಅದು ಸಹ 1.41 ಲಕ್ಷ ರೂ.ಗಳಿಗೆ ಬೇಡಿಕೆ ಬಂದಿದೆ. ಈ ಹಿಂದಿನ ಮೊತ್ತಕ್ಕೆ ಹೋಲಿಸಿದರೆ ಇದು 2 ಪಟ್ಟು ಹೆಚ್ಚಾಗಿದೆ. ಶೇ.18ರಷ್ಟು ಜಿಎಸ್‌ಟಿ ಸೇರಿ ಒಟ್ಟು 1,66,380 ರೂ.ಮೊತ್ತವಾಗಲಿದೆ. ಅಲ್ತಾಫ್ ಅಬ್ದುಲ್‌ರಶೀದ್ ಬಾಗವಾನ ಈ ಹರಾಜು ಪಡೆದಿದ್ದಾರೆ.
ಕೋಳಿ ಬಜಾರ್ ವ್ಯಾಪಾರ ಸ್ಥಳದ ಬಹಿರಂಗ ಹರಾಜು 1.20 ಲಕ್ಷ ರೂ.ಗಳಿಗೆ ಅಂತಿಮಗೊಂಡಿದೆ. ಜಿಎಸ್‌ಟಿ ಸೇರಿ ಇದರ ಮೊತ್ತ 1,41,600 ರೂ.ಗಳಿಗೆ ನಿಗದಿಯಾಗಿದೆ. ಹಸನ ಬಾಲವನಕರ ಈ ಹರಾಜು ಪಡೆದಿದ್ದಾರೆ.
ಪ್ರಕ್ರಿಯೆಲ್ಲಿ ಆಯುಕ್ತ ವಿಜಯ ಮೆಕ್ಕಳಕಿ, ವಲಯ ಆಯುಕ್ತ ಸಿದ್ದಣ್ಣ ಮಹಾಜನ, ಉಪ ಆಯುಕ್ತ ಮಹಾವೀರ ಬೋರಣ್ಣವರ, ಆರ್.ಬಿ. ಶಿರಶ್ಯಾಡ, ಕಂದಾಯ ಅಧಿಕಾರಿಗಳಾದ ಕೆ.ಎ. ಲೈನ್, ಶಿವಾನಂದ ಪೂಜಾರ, ಆರ್.ಎ. ಮುಜಾವರ, ಎಲ್.ಎಂ. ಕಾಂಬಳೆ, ಎನ್.ಆರ್. ಶಟಗಾರ ಮತ್ತಿತರರು ಪಾಲ್ಗೊಂಡಿದ್ದರು.