ಕೋಲಾರ: ಸಾಲ ಮರುಪಾವತಿಯಲ್ಲಿ ಪ್ರಾಮಾಣಿಕತೆ ಮೆರೆದಿರುವ ತಾಲೂಕಿನ ಚನ್ನರಾಯಪುರದ ದಲಿತ ಮತ್ತು ಇತರ ಕುಟುಂಬಗಳು ಅವಿಭಜಿತ ಜಿಲ್ಲೆಗೆ ಮಾದರಿಯಾಗಿವೆ. ಇವರ ಬದ್ಧತೆ ಅರಿತು ಪ್ರತಿ ಮಹಿಳೆಯರಿಗೆ ತಲಾ 1 ಲಕ್ಷ, ಮಹಿಳಾ ಸಂಘಕ್ಕೆ 10 ಲಕ್ಷ ರೂ. ಸಾಲ ವಿತರಿಸುವ ಮೂಲಕ ಡಿಸಿಸಿ ಬ್ಯಾಂಕ್ ಕ್ರಾಂತಿಕಾರಿ ಹೆಜ್ಜೆ ಇಟ್ಟಿದೆ ಎಂದು ಕೋಲಾರ-&ಚಿಕ್ಕಬಳ್ಳಾಪುರ ಡಿಸಿಸಿ ಬ್ಯಾಂಕ್ ಅಧ್ಯಕ್ಷ ಬ್ಯಾಲಹಳ್ಳಿ ಗೋವಿಂದಗೌಡ ಹೇಳಿದರು.
ಚನ್ನರಾಯಪುರದ ಓಂಶಕ್ತಿ ದೇವಾಲಯ ಆವರಣದಲ್ಲಿ ಮಂಗಳವಾರ ಸಾಲ ವಿತರಿಸಿ ಮಾತನಾಡಿ, ಇದೇ ಮೊದಲ ಬಾರಿಗೆ ಜಿಲ್ಲೆಯಲ್ಲಿ ಈ ಗ್ರಾಮದ ಹೆಣ್ಣು ಮಕ್ಕಳಿಗೆ 1 ಲಕ್ಷ ರೂ. ಸಾಲ ನೀಡುತ್ತಿದ್ದು, 80 ಕುಟುಂಬಗಳಿಗೆ ಇದರ ಪ್ರಯೋಜನ ಸಿಕ್ಕಿದೆ ಎಂದರು. ಇಲ್ಲಿನ ಮಹಿಳಾ ಸಂಘಗಳ ಸದಸ್ಯರು ತಪ್ಪದೇ ವಾರದ ಸಭೆ ನಡೆಸಿ 1.5 ಲಕ್ಷ ರೂ. ಉಳಿತಾಯ ಮಾಡಿದ್ದಾರೆ. ಸಾಲದ ಕಂತು ಸಕಾಲಕ್ಕೆ ಮರುಪಾವತಿಸಿ ಬ್ಯಾಂಕ್ ನಂಬಿಕೆ ಉಳಿಸಿಕೊಳ್ಳುವಲ್ಲೂ ಮಾದರಿಯಾಗಿದ್ದಾರೆ. ಸುಶಿಕ್ಷಿತರು ಮಾತ್ರವಲ್ಲ, ನಾವೂ ಸಾಲವನ್ನು ಸಮರ್ಪಕವಾಗಿ ಮರುಪಾವತಿ ಮಾಡಿ, ಆರ್ಥಿಕವಾಗಿ ಸದೃಢಗೊಳ್ಳಬಲ್ಲೆವು ಎಂಬುದನ್ನು ಸಮಾಜಕ್ಕೆ ಸಾಕ್ಷೀಕರಿಸಿದ್ದಾರೆ ಎಂದರು.
ಸಮರ್ಪಕ ಸಾಲ ಮರುಪಾವತಿ ಮಾಡುವ ಸಂಘಗಳನ್ನು ಗುರುತಿಸಿ ಅವರ ಆರ್ಥಿಕ ಸಬಲತೆಗೆ ಬ್ಯಾಂಕ್ ನೆರವಾಗಲು ನಿರ್ಧರಿಸಿದೆ. 1 ಲಕ್ಷದಲ್ಲಿ 50 ಸಾವಿರ ಬಡ್ಡಿರಹಿತ ಸಾಲವಾಗಿದ್ದು, ಉಳಿದ 50 ಸಾವಿರಕ್ಕೆ ಶೇ.4ರ ವಾರ್ಷಿಕ ಬಡ್ಡಿ ಮಾತ್ರ ಬೀಳುತ್ತದೆ. ಬ್ಯಾಂಕ್ನಿಂದ 7 ಲಕ್ಷಕ್ಕೂ ಹೆಚ್ಚು ಮಹಿಳೆಯರಿಗೆ ಸಾಲ ವಿತರಿಸಿದ್ದು, ಅವರನ್ನು ಮೀಟರ್ ಬಡ್ಡಿ ಶೋಷಣೆಯಿಂದ ರಕ್ಷಿಸುವ ಕೆಲಸ ಮಾಡಿದೆ ಎಂದರು.
ಡಿಸಿಸಿ ಬ್ಯಾಂಕ್ ನಿರ್ದೇಶಕ ನಾಗನಾಳ ಸೋಮಣ್ಣ ಮಾತನಾಡಿ, ಡಿಸಿಸಿ ಬ್ಯಾಂಕಿಗೆ ಮಹಿಳೆಯರೇ ಶಕ್ತಿ. ಸಾಲ ಪಡೆಯುವುದು ಮಾತ್ರವಲ್ಲಬ್ಯಾಂಕಿನಲ್ಲಿ ಠೇವಣಿ ಇಡುವ ಮೂಲಕ ಬ್ಯಾಂಕಿಗೆ ಶಕ್ತಿ ತುಂಬಿದ್ದಾರೆ. ನಂಬಿಕೆಗೆ ಮತ್ತೊಂದು ಹೆಸರು ಮಹಿಳೆಯರು ಎಂದು ಸಾಬೀತು ಮಾಡಿದ್ದಾರೆ ಎಂದರು. ಬ್ಯಾಂಕ್ ನಿರ್ದೇಶಕ ಯಲವಾರ ಸೊಣ್ಣೇಗೌಡ ಮಾತನಾಡಿ, ಪಡೆದ ಸಾಲವನ್ನು ಸಕಾಲಕ್ಕೆ ಪಾವತಿಸಿ, ಮುಂದಿನ ದಿನಗಳಲ್ಲಿ ಮತ್ತಷ್ಟು ಸಾಲ ಪಡೆಯಬಹುದು ಎಂದರು. ಬ್ಯಾಂಕ್ ನಿರ್ದೇಶಕ ಗೋವಿಂದರಾಜು ಮಾತನಾಡಿ, ಗಣಕೀಕರಣ, ಇ-&ಶಕ್ತಿ ಅನುಷ್ಠಾನದ ಮೂಲಕ ಬ್ಯಾಂಕಿಂಗ್ ವಹಿವಾಟಿನಲ್ಲಿ ಲೋಪ, ಭ್ರಷ್ಟಾಚಾರವಾಗದಂತೆ ಕ್ರಮ ಕೈಗೊಳ್ಳಲಾಗಿದೆ. ಪಾರದರ್ಶಕ ವಹಿವಾಟು ಇರುವುದರಿಂದ ಮಧ್ಯವರ್ತಿಗಳ ಹಾವಳಿಗೂ ತಡೆಯಾಗಿದೆ ಎಂದರು. ಬ್ಯಾಂಕ್ ಎಸ್ಎಸ್ಜಿ ಸಾಲ ವಿಭಾಗದ ಗೋಪಾಲಕೃಷ್ಣ ಮತ್ತಿತರರಿದ್ದರು.
ನಮಗೆ ಖಾಸಗಿ ಸಾಲಕ್ಕೆ ಕಟ್ಟುತ್ತಿದ್ದ ಬಡ್ಡಿಯ ಶೋಷಣೆಯಿಂದ ಮುಕ್ತಿ ಸಿಕ್ಕಿದೆ. ಇದಕ್ಕೆ ಕಾರಣವಾಗಿರುವ ಡಿಸಿಸಿ ಬ್ಯಾಂಕ್ ಎರಡೂ ಜಿಲ್ಲೆಗಳ ಮಹಿಳೆಯರಿಗೆ ದೇವಾಲಯವಿದ್ದಂತೆ. ನಾವು ಖಾಸಗಿಯವರಿಗೆ ನೀಡುತ್ತಿದ್ದ ಬಡ್ಡಿಯಷ್ಟು ಹಣದ ಕಂತು ಪಾವತಿಸದರೆ ಸಾಕು, ಬ್ಯಾಂಕ್ ಸಾಲದಿಂದ ಮುಕ್ತವಾಗುತ್ತೇವೆ. ನಮ್ಮ ಜೀವನಕ್ಕೆ ಡಿಸಿಸಿ ಬ್ಯಾಂಕ್ ಆಧಾರವಾಗಿದೆ.
ಯಲ್ಲಮ್ಮ, ಪ್ರತಿನಿಧಿ, ಲಕ್ಷಿ$್ಮ ಮಹಿಳಾ ಸ್ವಸಹಾಯ ಸಂಘ, ಚನ್ನರಾಯಪುರ