ಡಂಬಳ: ಹೋಬಳಿ ವ್ಯಾಪ್ತಿಯ ಕೆಲ ಗ್ರಾಮ ಪಂಚಾಯಿತಿ ಕಾರ್ಯಾಲಯಗಳಲ್ಲಿ ಇಂಟರ್ನೆಟ್ ಸಮಸ್ಯೆ ಉಂಟಾಗಿದ್ದು ವಿವಿಧ ಕೆಲಸಗಳಿಗಾಗಿ ಕಚೇರಿಗೆ ಬರುವ ಸಾರ್ವಜನಿಕರು ತೊಂದರೆ ಅನುಭವಿಸುವಂತಾಗಿದೆ.
ಹೋಬಳಿ ವ್ಯಾಪ್ತಿಯ 11 ಗ್ರಾಮ ಪಂಚಾಯಿತಿಗಳ ಪೈಕಿ ಕದಾಂಪುರ ಗ್ರಾಪಂ, ಜಂತ್ಲಿ ಶಿರೂರ, ಶಿಂಗಟಾಲಕೇರಿ ತಾಂಡ, ಪೇಠಾಲೂರ, ಮೇವುಂಡಿ, ಹಳ್ಳಿಕೇರಿ ಗ್ರಾಮ ಪಂಚಾಯಿತಿಗಳಲ್ಲಿ ತಾಂತ್ರಿಕ ದೋಷದಿಂದ ಇಂಟರ್ನೆಟ್ ಸಮಸ್ಯೆ ಉಂಟಾಗಿದೆ. ಅಲ್ಲದೆ, ಡಂಬಳ ಗ್ರಾಮ ಪಂಚಾಯಿತಿಯಲ್ಲಿ ಬಿಎಸ್ಎನ್ಎಲ್ ಬಿಲ್ ಪಾವತಿಸದ ಕಾರಣ ಕಂಪನಿಯವರು ನೆಟ್ವರ್ಕ್ ಸ್ಥಗಿತಗೊಳಿಸಿದ್ದಾರೆ.
ನೆಟ್ ಸಮಸ್ಯೆಯಿಂದಾಗಿ ಆಸ್ತಿ ನೋಂದಣಿ, ಕ್ರಿಯಾ ಯೋಜನೆ ತಯಾರಿಸುವುದು, ರೇಷನ್ ಕಾರ್ಡ್ ವಿತರಣೆ, ಉದೋಗ್ಯ ಖಾತ್ರಿ ವೇತನ ಪಾವತಿ, ಆಯುಷ್ಮಾನ್ ಆರೋಗ್ಯ ಕಾರ್ಡ್ ವಿತರಣೆ, ಉದ್ಯೋಗ ಖಾತ್ರಿ ಯೋಜನೆಯಡಿ ಜಾಬ್ಕಾರ್ಡ್ ಮಾಡಿಸುವುದು ಸೇರಿ ವಿವಿಧ ಕೆಲಸ ಕಾರ್ಯಗಳಿಗೆ ಅಡ್ಡಿ ಉಂಟಾಗಿದೆ. ಸಾರ್ವಜನಿಕರ ಅನುಕೊಲಕ್ಕಾಗಿ ಕಂಪ್ಯೂಟರ್ ಆಪರೇಟರ್ಗಳು ತಮ್ಮ ಮೊಬೈಲ್ಗಳ ಹಾಟ್ಸ್ಪಾಟ್ ಮೂಲಕ ಇಂಟರ್ನೆಟ್ ಕನೆಕ್ಟ್ ಮಾಡಿಕೊಂಡು ಕೆಲಸ ಕಾರ್ಯ ಮಾಡಿಕೊಡುತ್ತಿದ್ದಾರೆ. ಈ ಮೂಲಕ ಸರ್ಕಾರದ ಯೋಜನೆಗಳನ್ನು ಫಲಾನುಭವಿಗಳಿಗೆ ತಲುಪಿಸುತ್ತಿದ್ದಾರೆ. ಮೊಬೈಲ್ಫೋನ್ನಲ್ಲಿನ ಇಂಟರ್ನೆಟ್ ಡಾಟಾ ಖಾಲಿಯಾದರೆ ಕೆಲಸ ಅರ್ಧಕ್ಕೆ ಸ್ಥಗಿತಗೊಂಡು ಮುಂದೂಡಲಾಗುತ್ತದೆ.
ಗ್ರಾಮ ಪಂಚಾಯಿತಿ ಕಚೇರಿಯಲ್ಲಿ ಸಾರ್ವಜನಿಕರಿಗೆ ಸರ್ಕಾರಿ ಸೌಲಭ್ಯ ತಲುಪಿಸಲು ಇಂಟರ್ನೆಟ್ ಸೇವೆ ಇಲ್ಲದೇ ಮೊಬೈಲ್ ಮೂಲಕ ಕನೆಕ್ಟ್ ಮಾಡಿ ಕೆಲಸ ಮಾಡುವಂತಾಗಿದೆ. ಮೊಬೈಲ್ ಕರೆಗಳು ಬಂದ ಸಂದರ್ಭದಲ್ಲಿ ಕೆಲಸ ನಿಲ್ಲುತ್ತದೆ. ನಮ್ಮ ಮೊಬೈಲ್ನಲ್ಲಿ 1 ಜಿಬಿ, 2 ಜಿಬಿ ನೆಟ್ ಇರುವವರೆಗೆ ಕಾರ್ಯನಿರ್ವಹಿಸುತ್ತೇವೆ.
| ಹೆಸರು ಹೇಳಲಿಚ್ಛಿಸದ ಕಂಪ್ಯೂಟರ್ ಆಪರೇಟರ್
ಮುಂಡರಗಿ ತಾಲೂಕಿನ ಕೆಲ ಗ್ರಾಮ ಪಂಚಾಯಿತಿಯವರು ಬಿಎಸ್ಎನ್ಎಲ್ ಬಿಲ್ ಪಾವತಿಸದ ಕಾರಣ ಕಂಪನಿಯವರು ಇಂಟರ್ನೆಟ್ ಬಂದ್ ಮಾಡಿದ್ದಾರೆ. ಇನ್ನುಳಿದ ಗ್ರಾಪಂ ಕಚೇರಿಗಳಲ್ಲಿ ತಾಂತ್ರಿಕ ದೋಷದಿಂದ ಇಂಟರ್ನೆಟ್ ಸಮಸ್ಯೆಯಾಗಿದೆ. ತಕ್ಷಣ ಬಾಕಿ ಇರುವ ಬಿಲ್ ಪಾವತಿಸಿ, ತಾಂತ್ರಿಕ ಸಮಸ್ಯೆ ಬಗೆಹರಿಸಲಾಗ್ತುತದೆ.
| ಎಸ್.ಎಸ್. ಕಲ್ಮನಿ, ಮುಂಡರಗಿ ತಾಪಂ ಇಒ